1 Avami 3 - KITABU KITAKATIFU

Solomoni asavaa Nyasaye amuhe ovogeri

¹ Solomoni yalomba uvuhambani nu mwami wa Egebeti ku lileeta mukaana weve. Yamuleta amenye mu Lidaala lia Daudi kuduuka lwa yaali niyakamara kwumbaka inyumba yeeye yu vwami, Litembeli kandi lidigi kukumbiriza Jerusalemi.

² Avandu vaali nivakihaanira Yahova visiuviliru viavo ku vwali vunyingi vwukusigamira vifananyi, kigira Yahova yaali nakikiri kwumbakirwa Litembeli.

³ Solomoni yayanza Yahova kandi nalonda amigizu ga baba weve Daudi, navuzwa naye kandi yahaana visiuviliru vivie nukusamba vimuli ha vwali vunyingi vwu kusigamira vifananyi.

⁴ Ku ing'inga ndala, mwami Solomoni yazia Gibeoni kuhaana visiuviliru kigira yaho niho hu vwali vonene kuvita vwosi vwukusigamira vifananyi. Yaali nahaani zimia ni zimia zie visiuviliru hene yaho maziambiri.

⁵ Vudiku yivwo, Yahova yaloleka kuye mu maloto kandi namuteeva, “Wakayaanzi ngohe kindiki?”

⁶ Solomoni yativura, “Ivi wamanya uvuyanzi vonene kazozo ku baba wange Daudi, mutumikiri woovo, kandi naye yaali mulahi, musuuvirifu muvuhambani vwivwe niivi. Kandi ivi uzizagiliyi kumanyia vuyanzi vuvwo vonene kandi vutaveeye niligirung'ana ku limuha muyaayi wamiiha mu vogono vwivwe kalunu.

⁷ O, Yahova Nyasaye, ivi umali koleka inzi mbuguli vogono vwa baba wange Daudi kuli mwami, kali nimbeeye vuzwa mwana mukekeeke ligali kandi simanyi kuli nzamiiha mba.

⁸ Inzi mbeeye hano hagati ha avandu va ivi wamala kotovola kuva avoovo vene, avandu vaveeye vanyingi ligali muno kali vatavula kuvalizwa.

⁹ Kunangwa uhaane ku inzi, mutumikiri woovo vogeri vwa nyenya nduuki kwamiiha avandu nu vulungi kandi kumanya liavukanyia hagati hu vulahi nuvudamanu. Nigataveeye ndio, nyara ndi kwamiiha avandu vovo vanene yava?”

¹⁰ Yahova yayanza ligali ndi, Solomoni yali nateevi kindu yiki.

¹¹ Kunangwa Nyasaye yamuvolera, “Kigira oteevi ovogeri wamihi nuvulungi, mu vogono vwu kwetevera livamwoyo lie mihiga minyingi kinga uvutugi (uvuhinda) kinga likuza lia avasigu vovo,

¹² ndakora kuli uteevi: Ndakuha vogeri vunyingi kandi limanyiriza kuvita vwu mundu wundi woosi yaali navwo ku maziambiri, anoho aliva navwo.

¹³ Kali ndio, ndakuha kali cha utateevi? Mu livamwoyo liilio liosi, ulava nuvutugi kandi nuluyali kuvita vwu mwami munene wundi woosi.

¹⁴ Na ulambulira nukugumira malago gange kandi miima jange kuli baba woovo Daudi yakola, ndakuha livamwoyo litambi.”

¹⁵ Solomoni yavuka ma namanyiriza ndi Nyasaye yaali komoloma naye mu maloto. Maku yirana Jerusalemi, nasingira imbiri wi Lisandugu lie Lilagana lia Yahova kandi nahaana vihaanwa viukusambwa kandi vie mirembe ku Yahova. Inyima wa yago, yalombera vatumikiri veve lilia.

Solomoni Yakalaga kiyaalo kidinyu

¹⁶ Lidiku lilala, vakali malaya vaviri vaza nivasingira imbiri wu mwami Solomoni.

¹⁷ Mulala kuvo yavoola, “Mwami wu Luyali wange, mukali uyu ninzi komenyi munyumba ndala. Inzi ndivura mwana muyaayi naye naveeye ho.

¹⁸ Madiku gaviri inyima wi liivulwa liu mwana wange naye kandi yivula mwana muyaayi. Kunyi vaviri kwaali munyumba zana yimwo, mundu wundi woosi siyaali mu mba.

¹⁹ Maku vudiku vulala, mukali uyu yiizukana aagoni ku mwana weve ma namwiita.

²⁰ Yavuka vudiku hagati, navugura mwana wange kutura haluvalu lwange mutumikiri woovo lwa ndaali ning'onaa; yamuhira ku kidali chiche (ha kiritu chiche). Maku yavika mwana mukuzu weve kukitali hakiritu change.

²¹ Mugamba gwalonda ku, lwa ndavuka nyunyie mwana wange, ndanyora nakuzi! Ndamuhenza vulahi ligali mu vulavu vwu mugamba nindora ndi siyaali mwana wange wa ndivuura mba.”

²² Navuzwa mukali wundi yavoola, “Awa! Mwana oveeye mwoyo aveeye wange, nu umwana ukuzi nu woovo!” Mukali wukutanga yativura, “Awa! Mwana ukuzi nu uwoovo, na oveeye mwoyo nu wange!” Nandio vahangalizana imbiri wu mwami.

²³ Hene yaho, mwami Solomoni yavoola, “Sa mulala ku munyi avoora mwana oveeye mwoyo ni weve, kandi ndi mwana ukuzi nu wu mukali wundi.”

²⁴ Yatumana vamuleetere kivavi, na lwa chaletwa,

²⁵ yavoola, “kalanyia mwana oveeye mwoyo hagati (mu vidonye viviri) na ohe vuli mukali inusu.”

²⁶ Mukali wu mwana weve yaali mwoyo yizula ovovereri kigira mwana navolera mwami, “Umwami wuluyali wange mwaza, muhe mwana oveeye mwoyo! Utamwiita mba!” Navuzwa mukali wundi oyo yavoola, “Sialava wange kinga woovo mba. Mukalanyie mu vidonye viviri.”

²⁷ Hene yaho Solomoni yavoola, “Utiita mwana mba. Muhaane ku mukali wukutanga, niye mama weve.”

²⁸ Lwa avandu va Isiraeli vahulira amakuva gi likalaga lia Solomoni, vosi vaaha Solomoni uluyali lonene ligali, kigira valora ndi Nyasaye umali kumuha ovogeri kukalaga ovosooro nuvulungi.