1 Avami 22 - KITABU KITAKATIFU

Muporofeti Mikaya yiganihizaa Ahabu

¹ Ku mihiga giviri Siria na Isiraeli vazizagilira komenya vugira vulwani.

² Navuzwa mu muhiga gwa kavaga, Jehoshafati, mwami wi Ivuyuda, yazia kolola mwami Ahabu wa Isiraeli.

³ Mwami Ahabu yateeva vatumikiri veve, “Kigira ki kukikiri kokora kindu kwirana kuvugura lidaala linene lia Ramozi mu kivala cha Gileadi kutura ku mwami wa Siria? Liveeye lidaala lietu.”

⁴ Kunangwa Ahabu yateeva Jehoshafati, “Ulazia ninzi kwingilira lidaala linene lia Ramozi mu Gileadi?” Jehoshafati yavolera mwami wa Isiraeli, “Inzi mbeeye kuli ivi oveeye, vandu vange kuli vovo, zibarasi ziu vulwani ziange kuli zizio.”

⁵ Na Jehoshafati yavolera mwami wa Isiraeli, “Leka kutange koteeva likuva lia Yahova?”

⁶ Kunangwa mwami Ahabu wa Isiraeli yalanga vaporofeti vosi harara, himbi vasaza zimia zine, navateeva, “Nyara kuzia kulwaana Ramozi mu Gileadi, anoho ndeke?” Avaporofeti zana vamuvolera; “Zia ulingiliri. Yahova alakuha liguuta.”

⁷ Navuzwa Jehoshafati yateeva, “Haveeye ho muporofeti wundi wa Yahova uwa kunyala koteeva uvulariri vwa Nyasaye?”

⁸ Mwami Ahabu yativura navoora, “Akikiri ho musaza mulala wa kunyala koteeva likuva lia Yahova, Mikaya muyaayi wa Imula. Navuzwa ndamuvihilira ligali, kigira siaporofetaa ku kindu kilahi ku inzi mba; nitali vudamanu vwere.” Jehoshafati yavoola, “Utavoola ndio mba!”

⁹ Maku mwami Ahabu yalanga mutumikiri mulala namuvolera, “Zia vwangu oleete Mikaya muyaayi wa Imula.”

¹⁰ Avami vaviri yavo, niviviiki zinguvu ziavo ziu vwami, vaali nivikaye ku zindeve ziavo ziu vwami ha loze ichova wi kirivwa cha Samaria, na vaporofeti vosi vaali nivaporofetaa imbiri wavo.

¹¹ Mulala kuvo, Zedekia muyaayi wa Kenaana yalomba zinziga zie kivia navolera Ahabu, “Yiki nicho cha Yahova avoora, ‘ulalwana Vandu Asiria nukuvaguuta ligali.’ ”

¹² Avaporofeti vandi vosi vavoola kindu kilala chere. “Zia ulwaane Ramozi na ivi ulaguuta. Yahova alakuha liguuta.”

¹³ Ku ing'inga yeyo, mutumikiri waali naaziyi koleta Mikaya yamuvolera, “Avaporofeti vandi vosi vamali koporofeta vuguuti ku mwami, na vwakaveeye vulahi ligali na ivi wakakoli ndio.”

¹⁴ Navuzwa Mikaya yativura, “Ngwisuuhiraa ku Yahova oveeye mwoyo, ndi inzi ndavoora cha Yahova yambolera mbore.”

¹⁵ Lwa Mikaya yaduuka imbiri wu mwami Ahabu, mwami yamuteeva, “Mikaya, mwami Jehoshafati, anyala kuzia ninzi kulwana Ramozi Gileadi anoho mba?” Mikaya yativura navoora, “Zia ulingiliri! Ligali ulaguuta. Yahova alakuha uvuguuti.”

¹⁶ Navuzwa Ahabu yativura, “Lwa omolomanga ku inzi mu lieta lia Yahova, vola agiligali! Ni haali kanga ningovolera ndio?”

¹⁷ Mikaya yativura navoora, “Ndolaa liihi lia Isiraeli nilisalani ku kiguru kuli magondi gata veeye nu mwayi. Yahova yavoola, ‘Avasaza yava sivaveeye numwimiliri mba. Leka vazie yengo mu mirembe.’ ”

¹⁸ Mwami Ahabu yavolera Jehoshafati, “Singovoleye ndi siaporofetaa ku kindu kilahi ku inzi mba, navuzwa uvudamanu vweng'ine?”

¹⁹ Mikaya yaazizagilira kovora, “Kalunu huliri cha Yahova avola! Ndoli Yahova niyikaye koendeve yeeye yu vwami mwigulu naveeye harara nizingelosi veve vosi nivasingiyi ku zimbega zizie ziombi;

²⁰ Yahova yateeva, ‘Nivwaha uzia kugaada Ahabu kunangwa aduuki kuzia nukwitirwa ha Ramozi mu Gileadi?’ Valala ku zingelosi vavoola kindu yiki navandi nivavoora kindu kindi vuzwa.

²¹ Maku Roho mulala gwituliza ni gusingiraa imbiri wa Yahova nigovoora, ‘Inzi ndazia kumugaada.’

²² Yahova yateeva, ‘Kuli ndi?’ Roho zana gwativula, ‘Ndazia kolomba avaporofeti va Ahabu vosi vavoole vovehi.’ Yahova yavoola, ‘Zia na umugaade. Ivi ulanyaliza ligali zia na okole ndio!’ ”

²³ Na Mikaya yamaliriza, “Yiki nicho chekoleki. Yahova umali kokora vaporofeti vovo yava vakugaade. Navuzwa oyo mwene amali kulaga ndi ivi uduuki konyoora kivi!”

²⁴ Hene yaho muporofeti Zedekia yazia ku Mikaya, naamwala luhi mumoni, navoora, “Kutura ng'inga ki Roho gwa Yahova goleki inzi nokomoloma ku ivi?”

²⁵ Mikaya yativura navoora “Ivi ulamanya lwa nuuzie kwivisa mu keng'oze chi inyima.”

²⁶ Maku mwami Ahabu yalaga mulala ku vatumikiri veve, “Gumira Mikaya na umuhili ku Amoni mwamihi wi lidaala linene, kandi ku Joashi muyaayi wu mwami.

²⁷ Uvoolere vamuviki vuhambe kandi umulie mugadi namazi mere kuduuka lwa nzirana nimirembe.”

²⁸ Mikaya yativura, “Niiva ulirana nimirembe, Yahova siamolomi kuvitira mu inzi mba!” Kandi yameda kovora, “Muhulirizi, mundu sa mulala, ku ga mali kovora!”

Likuza lia Ahabu

²⁹ Kunangwa mwami Ahabu wa Isiraeli nu mwami Jehoshafati wi Ivuyuda vazia kwingilira lidaala linene lia Ramozi mu kivala cha Gileadi.

³⁰ Ahabu yavolera Jehoshafati, “Lwa na kove nikuzizaa mu vulwani, inzi ndigirung'anyia mburi kumanyikana, navuzwa ivi wiviki zinguvu zizio ziu vwami.” Kunangwa mwami Ahabu wa Isiraeli yingira mu vulwani ni yigirunganyi.

³¹ Mwami wa Siria yaali nalagi vatumikiri veve va magare gu vulwani salasini na mbiri ndi, “Muta lwaani mundu wundi woosi, natali mwami wa Isiraeli.”

³² Kunangwa lwa valora mwami Jehoshafati, vosi vaganagana ndi oyo niyie mwami wa Isiraeli, vosi vamwingilira. Navuzwa lwa yakuba lwangwa,

³³ vamanyiriza ndi siayaali mwami wa Isiraeli mba, ma nivaleka limulondelera nu ku mwingiliraa.

³⁴ Musikari wa Siria yalasa muvano gwu vuta vwamanya nivutumita mwami Ahabu hagati huvwungilu vwi isalamba yeeye. Yakuba lwanga navolera muhiri wi ligare lilie lie liihi, “Ndasiywi vudamanu ligali! Girung'ana na undulizi ichova wi liihi!”

³⁵ Ku lidiku yilio liosi, vulwani vwali vululu ligali, nu umwami yasedeminywa mu ligare lilie nahenzi vandu va Siria. Amasahi gataaza kutura mu vutumiti vwivwe nigidoloka kuduuka ku lwaalo lwi ligare, ma yakuza mugolova yigwo.

³⁶ Lwi liuva liali niliyeraa, likuva lie lilaga lialanda mu liihi liosi: “Mundu sa mulala yirane mu lidaala lilie; sa mulala azie mu kivala chiche!”

³⁷ Kunangwa mwami Ahabu yakuza. Muviri gwigwe gwahilwa Samaria nigoteevwa yo.

³⁸ Ligare lie liihi lilie liogizirwa ha lidavalia lia Samaria, hi zimbwa ziakombera masahi geege kandi ha malaya gisingira, kuli Yahova yaali navooye galakekoleke.

³⁹ Vindu vindi viosi vio mwami Ahabu yakola, komeeda ku livaala lie inyumba yeeye yu vwami ya yasiahila miinu gizizogu, kandi amadara manene goosi ga yumbaka, viosi viang'odwa mu kitabu cha makuva ga kale ga vami va Isiraeli.

⁴⁰ Ahabu yakuza nayavirwa na vaguuga veve vaayavirwa. Muyaayi weve Ahazia yavugula vogono vwivwe kuli mwami.

Mwami Yehoshafati wi Ivuyuda

⁴¹ Mu muhiga gwa kane gwi liamiiha liu mwami Ahabu wa Isiraeli, Jehoshafati muyaayi wa Asa yakolwa mwami wa Ivuyuda.

⁴² Yaali naveeye ni mihiga salasini natano, na yamiha mu Jerusalemi ku mihiga sirini na tano. Mama weve yaali Azuba mukaana wa Shilihi.

⁴³ Kuli baba weve Asa waali imbiri weve, yakola agaali malungi imbiri wa Yahova; navuzwa siyononyia havundu hoosi hukusigamira misambwa mba, na avandu zana yavo vazizagilira kuhaanira visiuviliru nukusambira ho vimuli.

⁴⁴ Jehoshafati yalomba mirembe numwami wa Isiraeli.

⁴⁵ Vindu vindi viosi via Jehoshafati yakola, vuluviliri vwivwe vwosi kandi nuvulwani vwa yalwana, viang'odwa mu vitabu via makuva ga kale ga vami vi Ivuyuda.

⁴⁶ Yaatuliza ho masaaza vakora voheyi na vasaza vandi goosi gatumikanga ha vwali vwu kusigamira misambwa vaali nivatigara mu kivala kutura mu madiku ga baba weve Asa.

⁴⁷ Kivala cha Edomu si chaali numwami mba; chamihangwa numunene mulondeleri wu mwami wi Ivuyuda yatovolanga.

⁴⁸ Mwami Jehoshafati yalomba zimeri zie viasara kuzia mu kivala cha Ofura koleta izahabu, navuzwa sizielema kuduuka yo mba - ziavunanyirwa ha Ezionigeberi.

⁴⁹ Maku mwami Ahazi muyaayi wa Ahabu wa Isiraeli yihaana koleka vandu vasaza veve veeleme harara na va Jehoshafati, navuzwa Jehoshafati yasura.

⁵⁰ Maku Yehoshafati yakuza, naateevwa mu vilindwa viu vwami mu Lidaala linene lia Daudi; na muyaayi weve Jehoramu yavugula vogono vwivwe kuli mwami.

Mwami Ahazia wa Isiraeli

⁵¹ Mu muhiga gwa komi na saba gwa vwamihi vwu mwami Jehoshafati, wi Ivuyuda, Ahazia muyaayi wa Ahabu yagwa mwami wa Isiraeli, na yamiha mu Samaria ku mihiga giviri.

⁵² Yakola vwoni ku Yahova naalondanga mwima mudamanu gwa baba weve Ahabu, no gwa mama weve Jezebeli, kandi gwu mwami Jeroboamu, wimilira Isiraeli kuduuka mu likora vwoni.

⁵³ Ahazia yasigamira nukutumikira Baali, na kuli baba weve waali imbiri weve, yavuukiza vutima vwa Yahova, Nyasaye wa Isiraeli.