1 Avami 21 - KITABU KITAKATIFU

Kizabibu cha Nabozi

¹ Nabozi kutura Jezireeli yaali ni kizabibu ahimbi ni nyumba yu vwami yu mwami Ahabu wa Samaria.

² Lidiku lilala Ahabu yavolera Nabozi, “Mbe kizabibu chicho; keveeye himbi ninyumba yange yu vwami, na nyenya ndumikiri mulimi zana kuli mulimi gwi zinguza. Ndakuha kizabibu kindi kilahi kuvita yiki kigira yiki, anoho, niiva ulenya mutungu ndakutunga vuguli vwagwo vulahi ligali.”

³ Nabozi yativura, “Inzi ndanyoora mwandu gwi kizabibu yiki kutura ku vaguuga vange. Yahova angaye mburi koleka ivi ove nacho.”

⁴ Ahabu yazia yengo, nakuzi mwoyo kandi naasinyiki kigira likuva lia Nabozi yaali namuvooleye. Yagona ku kidali chiche, nahenzi mwidigi, kandi siyaali anyala kulia mba.

⁵ Mukali weve Jezebeli yazia kuye namuteeva, “Kigira ki oveereye ligali? Kigira ki nuvuli kulia?”

⁶ Ahabu yativura, “Mbeereye kigira amakuva ga Nabozi amboleeye. Ndaali ninyenyi kugura mulimi gwigwe gwi kizabibu, anoho, niiva aleenya muhe gundi mu vogono vwagwo, navuzwa yamboleeye sianyala kuguvugula mba.”

⁷ Jezebeli yativura, “Ivi sioveeye mwami wa Isiraeli? Vuka, tula mu kidali, sangala kandi ulie. Inzi ndakuha kizabibu cha Nabozi Mujezereli!”

⁸ Hene yaho Jezebeli yang'oda zibarwa, naviika ku mukono nilieta lia Ahabu, naduya mu muhuri gwigwe, kandi naazituma ku vatumikiri na vimiliri vamenyaa mu lidaala linene lia Jezireeli.

⁹ Zibarwa zana ziavoola, “Landizi lidiku lie lihonga lilia, langi vandu vavugane harara, na muhaane ku Nabozi havundu huluyali.

¹⁰ Nyooli vandu vadamanu vaviri vamuyaale imbiri wizimoni zizie kigira linyega Nyasaye kandi mwami. Hene yaho muvuguli mumuhile ichova wi lidaala linene na mumulase magina kuduuka akuzi.”

¹¹ Vatumikiri na vimiliri vamenyaa mu Jezireeli vaakora cha Jezebeli yaali nalagi.

¹² Valandiza lidiku lielihonga lilia, nivalanga vandu vavungi harara, kandi nivaha anaku Nabozi vogono vwu luyali.

¹³ Avadamanu vaviri zana vamuyaara imbiri wa vandu havulavu kigira linyega Nyasaye kandi mwami, nandio Nabozi yahilwa ichova wi lidaala linene naalaswa magina kuduuka ku likuza.

¹⁴ Likuva liahilwa ku Jezebeli kovora, “Nabozi alasiywi magina, ma ukuzi!”

¹⁵ Nonoho lwa Jezebeli yanyoora likuva zana, yavolera Ahabu, “Nabozi ukuzi. Kalunu zia uvuguli kizabibu cha yasura ku kugulizira.”

¹⁶ Nonoho Ahabu yazia mu kizabibu kukivugula kuva chiche.

¹⁷ Maku Yahova yavolera Elija, muporofeti kutura Tishibe,

¹⁸ “Zia ku mwami Ahabu wa Samaria. Ulamunyoola mu mulimi gwi kizabibu cha Nabozi, aveeye himbi ku kivugula kigwi chiche.

¹⁹ Muvoolere ndi Inzi, Yahova, muvooleraga, ‘Inyima wukwita mundu, ivi uvugura miandu jije kandi?’ Umuvolere ndi yaganigo ga mboraa: ‘Havundu he zimbwa ziakombera masahi ga Nabozi, zilakombera ho masahi googo!’ ”

²⁰ Lwa Ahabu yalora Elija, yavoola, “Unyooye kandi, O, musigu wange?” Elija yativura navoora, “Yee, mali kokonyoola. Ivi wihaani mwene kokora agaveeye madamanu mu zimoni zia Yahova.

²¹ Kunangwa Yahova akovoleraa, ‘Ndaleta kivi ku ivi. Ndakudiviza ligali kandi ndiita vuli wikisaza mu vandu vinyumba yooyo, avasoleri anoho avasaakulu, muvoholore anoho muvohe vosi kindu kilala.

²² Avandu vinyumba yooyo valava kuli vandu avinyumba yu mwami Jeroboamu muyaayi wa Nebati, kandi kuli vandu avinyumba ya Baasha muyaayi wa Ahija, kigira umali kuvukiza vutima vwange ku likora vandu va Isiraeli kuduuka mu likora vwoni.’

²³ Kolondekana na Jezebeli, Yahova avoora ndi zimbwa zilaliira muviri gwigwe mu lidaala linene lia Jezireeli.

²⁴ Mundu woosi oveeye mwiko woovo ukuzira mu lidaala linene, alaliivwa ni zimbwa, kandi mundu woosi ukuzira mu milimi, alaliivwa nizisoti.”

²⁵ Sihaali ho nu mundu wosi waluvilira nu mwoyo gwosi kokora vudamanu mu zimoni zia Yahova kuli Ahabu mba, na Jezebeli mukali weve yamuzuva mu vindu yivi viosi.

²⁶ Yakola vwoni vwizisoni kuvita vwosi ligali mu lisigamira vifananyi, kuli vandu va amori vaali ni vakora, va Yahova yaali niyakunga kutura mu kivala zana lwa vandu va Isiraeli visunda imbiri kukivugula.

²⁷ Lwa Elija yamala komoloma, Ahabu yatandula zinguvu zizie, niyinavuula kandi niyiviika zinguvu zia magunia. Yasura kulia, naagona mu zinguvu zia magumia, nokogendagenda novovereri kandi mwoyo ni guukuzi.

²⁸ Yahova yavolera muporofeti Elija,

²⁹ “Ukaloli kuli Ahabu yegehizi umwene imbiri wange? Kigira umali kokora yaga, sindaleeta kivi kuye mu ing'inga yi livamwoyo lilie mba; galakave mu ing'inga yi livamwoyo liu muyaayi weve lwa ndileeta kivi ku vinyumba ya Ahabu.”