1 Avami 20 - KITABU KITAKATIFU

Siria Yingiliraa Isiraeli

¹ Mwami Benihadadi wa Siria yavungiza harara mahi geege goosi, nakonyelerwa na vami vandi salasini na mbiri, nizibarasi ziavo kandi namagare gu vulwani. Yanigira, nakumbiriza lidaala lia Samaria kandi ni valingilira kulilwana.

² Yatuma avatumwa mu lidaala linene ku Mwami Ahabu wa Isiraeli kovora, “Mwami Benihadadi akuteva

³ uhaane kuye ifeza ni zahabu yooyo, vakali kandi valala ku vana vizingulu kuvita vosi.”

⁴ Ahabu yativura, “Volera mwami wange, Benihadadi ndi inzi mbugiliyi anyala kuvugura inzi harara ni vindu viosi via mbeeye navio.”

⁵ Lwi nyima, vatumwa zana virana ku Ahabu ni lienya lindi kutura ku Benihadadi; “Ngutumiyi likuva ndi ivi kuduuka uhaane ku inzi ifeza ni zahabu yooyo, vakali vovo kandi vana vovo.

⁶ Kalunu, inzi ndatuma avanene vange kuuza kwenyeleriza inyumba yooyo yu vwami, kandi mu zingo zia vanene vovo; kandi kuvugura vindu viosi via vaganagana kuva ni viuvuguli ligali. Valava yaho ahimbi ing'inga kuli yinu mugamba.”

⁷ Mwami Ahabu yalanga harara aviimiliri vosi vikivala navoora; “Muloraa ndi mundu uyu yenya kukwamiiha. Andumiyi likuva niyenyaa muhe vakali valahi vange, vana vange, ifeza ni zahabu yange, na inzi ndavugilira.”

⁸ Aviimiliri harara na vandu vaativura nivavoora “Utahuliriza amakuva geege kinga lienya lilie mba.”

⁹ Kunangwa Ahabu yativulira avatumwa va Benihadadi navoora, “Volera mwami wange ndi inzi ndaali nimbugiliyi ku lienya lilie liukutanga, navuzwa sinyala kuvugilira ku liakaviri kali hakuzu mba.” Avatumwa yavo vaatura, ni viirana namakuva gandi

¹⁰ kutura ku Benihadadi, “Inzi ndaleta avasaza vaduuka kwononyia lidaala linene liilio yili nukuginga magina gatigala mu makono gaavo. Avanyasaye vanzite niiva sindakola ndio!”

¹¹ Mwami Ahabu yativura navoora, “Vooleri mwami Benihadadi ndi musikari wiligali avoora lieyizominya lilie inyima wuvulwaani, siliveeye imbiri wavwo mba.”

¹² Benihadadi yanyoora litivuli lia Ahabu harara na vakonyeleri veve muvulwani avami vaali nivanweza malwa malulu mu mahema gaavo. Yalaga avasaza vi liihi lilie vetegeke kwingilira lidaala linene zana yilio; kunangwa visunda mu vwiyangu vwavo.

¹³ Ing'inga yeyo, muporofeti yazia ku mwami Ahabu navoora, “Yahova avoora, ‘Utatia liihi linene lila mba! Inzi ndakuha vuguuti kulio kalunu ndi, kandi ulamanya ndi inzi mbeeye Yahova.’ ”

¹⁴ Ahabu yateeva, “Nivwaha wimilira liihi zana yili?” Muporofeti zana yativura, “Yahova avoora ndi, avasikari vasoleri hasi ha malago ga vaamiihi vi vivala, valakola ndio.” Ahabu yateeva “Nivwaha alava munene wi liihi?” Muporofeti yativura, “Ivi ulakola ndio.”

¹⁵ Kunangwa mwami yalanga avasikari vasoleri, vaali hasi ha vanene vi vivala, vosi ni vaveeye 232. Kandi yalanga liihi lia vandu va Isiraeli, nivaduuka vosi 7,000.

¹⁶ Uvulwani vwatanga mbasu hagati lwa Benihadadi na vami vakonyeleri veve vaali 32 nivanweza malwa mu mahema gaavo.

¹⁷ Avasikari vasoleri zana vatura kuzia imbiri kutanga. Vatumwa vaatumwa ichova na Benihadadi kuzia kohenza chekoleka, valetera makuva ndi muganda gwa vasikari niguzaa kutura Samaria.

¹⁸ Yavoola, “Vagumiri nivaveeye mwoyo kali niiva vaza kulwaana anoho vaza koteeva mirembe.”

¹⁹ Avasikari vasoleri yavo vatangiza vulwani, nivalondwa ni liihi lia vandu va Isiraeli,

²⁰ samulala yita musaza wa yalwana naye. Avasiria viruka na vandu va Isiraeli vavadaaliza ligali, navuzwa Benihadadi mwami wa Siria yahononokera ku barasi harara na valala ku vasikari vahiraa zibarasi.

²¹ Mwami Ahabu wa Isiraeli yazia mu kiguti chi liihi, yavugula zibarasi na magare gu vulwani kandi yalegelera vandu va Siria ni liguuta linene ligali.

²² Maku muporofeti yazia ku Mwami Ahabu namuvolera, “Yirana na udinyirizi amahi googo, na ugalohizi vulahi kigira mwami wa Siria alakwingilira kulwaana niivi kandi mumadiku gi imbura muhiga guzaa.”

Litulira lia kaviri lia Vandu va Siria

²³ Avanene vu mwami Benihadadi vamuvolera, “Avanyasaye va Isiraeli vaveeye vi vigulu, na yicho nicho chagira vandu va Isiraeli nivakuguuta. Navuzwa ligali kulavaguuta niiva kulalwaana navo mu vileremo.

²⁴ Tuliza avamihi salasini na mbiri kutura mu vonene vwavo na uviiki vanene vu muviguuti mu vogono vwavo.

²⁵ Maku ulange liihi linene ligali kuli yilio liagatizwa, ni livaliza lilala liere lie zibarasi na magare gu vulwani. Kulalwaana vandu va Isiraeli mu vileremo, na ing'inga yiyi kulavaguuta.” Mwami Benihadadi yaavugilira kandi nalonda zing'anagani ziavo.

²⁶ Ing'inga ya madiku gimbula yu muhiga gwalonda ku, yalanga avasaza viliihi veve kandi nazia navo kuduuka ku lidaala linene lia Afeki kuzia kwingilira vandu va Isiraeli.

²⁷ Avandu va Isiraeli navo valangwa harara kandi nivahevwa viukulia niviugi; vazia kwagana nukulwana navo. Valomba hokososa haavo mu viduma viviri viahenza lovega lwa vandu va Siria. Avandu va Isiraeli vaali kuli viayo viviri vie zimburi nolenganyia na Vandu va Siria vizura kivala choosi.

²⁸ Muporofeti yazia ku mwami Ahabu navoora: “Yiki nicho cha Yahova avoora; ‘Kigira Vandu va Siria vavoola ndi inzi ni Nyasaye wivigulu navuzwa simbeeye Nyasaye wivileremo, ndakuha vuguuti ku liihi liavo linene, ivi na vandu vovo mulamanya ndi inzi mbeeye Yahova.’ ”

²⁹ Ku madiku saba, Vandu va Siria na vandu va iraeli vamenya mu hokososa haavo nivahenzani. Ku lidiku lia saba, vatanga kulwaana na vandu va iraeli ni vita Vandu va Siria zielefu imia indala.

³⁰ Avatigara virukira mu lidaala linene lia Afeki mwi lidigi lie lidaala linene zana liagwira vasaza 27,000. Benihadadi yirukira mu lidaala linene zana kandi, naahalira mu keng'oze chi nyima winyumba.

³¹ Avatumikiri veve vazia kuye nivavoora, “Kuhuliyi ndi avami va vandu va vandu va isiraeli vaveeye zimbavasi. Kohe munwa kuzie ku mwami wa Isiraeli nikwevohi zinguvu zia magunia mu visindi vietu kandi migoye mu magoti giitu; mbula alahonyia livamwoyo liilio.”

³² Kunangwa vevoha amagunia mu vikenge viavo kandi migoye mu magoti gaavo, kandi ni vazia ku Ahabu nivavoora, “Mutumikiri woovo Benihadadi akogoonyaa oleke ave mwoyo.” Ahabu yativura, “Akikiri mwoyo? Vulahi! Aveeye kuli amwavo ku inzi!”

³³ Avatumikiri va Benihadadi vahenza valore kelolero kilahi, na lwa Ahabu yavoola, “Amwavo,” vavugura vwangu nivavoora, “Kuli ivi ovola, Benihadadi ni amwavo woovo!” Ahabu yalaga, “Muleeti ku inzi.” Lwa Benihadadi yaduuka, Ahabu ya munyinyia mu ligare liuvulwani.

³⁴ Benihadadi yamuvolera, “Ndakwilanyira madaala ga baba wange yavugula kutura ku baba woovo, na ivi unyala kutangiza havundu hu kukiranyira mu Damasiko kuli baba wange yakola mu Samaria.” Ahabu yativura, “Ku livugilizana yili, ndakoleka uzie.” Yalomba lilagana naye ma namuleka azie.

Muporofeti Yakalagira Ahabu

³⁵ Olondekana ni lilaga lio Yahova, mulala ku muganda gwa avaporofeti yalaga muporofeti wache weve amuduyi, navuzwa yasura.

³⁶ Kunangwa yamuvolera, “Kigira uvuli kuhulira lilago lia Yahova, king'ang'a kilakwiita lwa ondeka.” Nonoho lwa yatura kuzia, king'ang'a chaza nikimwita.

³⁷ Maku muporofeti mulala mwere yazia ku musaza wundi navoora, “Nduya!” Mundu oyo yakola ndio. Yamuduya vudinyu ligali kandi naamwata logoma.

³⁸ Kunangwa muporofeti yatura nazia kulindilira mwami hainzira, niyevohi kilavi chinguvu mu vweni vwivwe. Yigirung'anyia mwene nazia nasingira kunzira kulindilira. Mwami wa Isiraeli aviti.

³⁹ Lwu mwami yaali navitaa, muporofeti yamulanga navoora, “Mwami wuluyali wange, ndaali ninwanaa mu liihi, nu musikari yaleeta musigu wagumirwa navoora, ‘Linda mundu uyu. Niiva aliruka nokohona, ivi ulatuunga livamwoyo lii lio anoho uhaane mutuungu gwi vidonye zielefu zivaga ziefeza.’

⁴⁰ Navuzwa lwa ndaali nindidikanaa nivindu vindi, mundu zana oyo yiruka nokogota.” Mwami yativura, “Yilio nilio likalagirwa liilio. Ivi mwene wikalagiyi.”

⁴¹ Maku muporofeti zana yaatuliza vwangu kilavi chinguvu cha yaali naavohi muvweni mwimwe, nu mwami wa Isiraeli yamumanya ndi aveeye mulala ku avaporofeti.

⁴² Muporofeti yavolera mwami Ahabu, “Yili nilio likuva lia Yahova; ‘Ivi waali kulakula mundu wa inzi ndalaga yiitwi. Kulwa yaga, galava ndi ulatuunga livamwoyo liilio kigira livamwoyo lilie, vandu vovo kigira avandu veve.’ ”

⁴³ Mwami yirana yengo mu lidaala lia Samaria naahendi mwoyo kandi nakuzi mwoyo ligali.