1 Avami 2 - KITABU KITAKATIFU

Amakuva ga Daudi gu kumaliriza ku Solomoni

¹ Lwa Daudi yaali ahimbi kukuza, yalanga mwana weve Solomoni naamuha makuva gege gukumaliriza:

² “Ing'inga yange yu kukuza yisundi himbi. Kunangwa ove wizingulu, welolekizi kuva mundu musaza,

³ na okole icha Yahova Nyasaye woovo akulagaa okole. Uhuliri malago geege goosi, ni miima jije, nilikalaga lilie liosi, kuli gang'odwa mu Lilaga lia Musa; kunangwa hoosi ha uzia uduuki kugasizwa mu viosi via okola.

⁴ Niiva ulamuhulira, Yahova alalinda lisuuviriza lilie lia yalomba lwa yambolera, ndi visukululwi viange valamiha. Isiraeli ku lohono lwa vaveeye avasuuvirifu kugumira no kuhulira amalago geege goosi ni mioyo jaavo josi kandi na roho jaavo josi.

⁵ “Kindu kindi keveeye ho, wizulizi kumanya icha Joabu yakola ku inzi ku liita lia avanene vaviri va mahi ga Isiraeli, Abineri muyaayi wa Neri na Amasa muyaayi wa Jezeri. Wizulizi kuli yaviita mu ing'inga yi mirembe mu livaanza kisaalia kigira valeta likuza mu ing'inga yuvulwaani. Yita avandu, vatali nimbala, na inzi kalunu ndulwa ligali ku ga yakola.

⁶ Ivi umanyi cha okola; utaleka akuze likuza lia kazozo mba.

⁷ “Navuzwa umanyie mwoyo gwi zimbavasi (uvulahi) ku vayaayi va Barizilai kutura Gileadi, na uvalindi ligali, kigira vaangolera vulahi lwa ndaali ninzirukaa kutura ku amwavo woovo Abisolomu.

⁸ “Haveeye ho kandi na Shimei muyaayi wa Gera, kutura mu lidaala lia Bahurimu mu kivala cha Benjamini. Yaanaama vululu ligali lidiku lia ndaazia Mahamimu, navuzwa lwa yagana ninzi ha mugera gwa Jorodani, (ndaamwisuuhira) ndamusuuviriza ku chisuuhu ndi mu lieta lia Yahova ndi sindaleka yiitwi mba.

⁹ Navuzwa utamuleka azie vugira kohevwa mageri mba. Ivi umanyi vulahi cha okola, na kuduuka umwite.”

Likuza lia Daudi

¹⁰ Daudi yakuza na yayavwirwa mu Lidaala linene lilie, Jerusalemi.

¹¹ Yaali mwami wa Isiraeli ku mihiga arubaini; yamiha ni mihiga saba mu Heburoni ni mihiga salasini na tatu mu Jerusalemi.

¹² Solomoni yavugula ovogono vwa baba weve kuli mwami, ni zinguru ziu vwamihi vwivwe zianenehizwa.

Liitwa lia Adonija

¹³ Ahene yaho, Adonija wa mama weve yalangwa Hagili, yazia ku Bazisheba waali mama wa Solomoni. Bazisheba yamuteeva, “Ukazi kunduuta mu mirembe naho?” Adonija yamutivulira, “Gaveeye ndio.”

¹⁴ Maku yameda, “Mbeeye ni kindu cha nyenya kokoteeva.” Bazisheba yateeva, “Ni kindiki.”

¹⁵ Adonija yativura, “Ivi umanyi ndi gandukana inzi mbe mwami, ma kandi avandu vosi mu Isiraeli vaganagana ndio. Navuzwa gamanyi nigekoleka lugano; na amwavo wange agwiyi mwami kigira vulaliri vwa Yahova.

¹⁶ Na kalunu, ndeva kindu kilala kutura ku ivi,utasulila mba.” Bazisheba yamuteeva, “Ni ki?”

¹⁷ Yativura, “Mwaza teeva mwami Solomoni aleke mbuguli Abishagi mukaana kutura Shunemu kuli mukali wange Inzi manyi sialakusulira mba.”

¹⁸ “Vulahi ligali” Yativura. “Ndakomolomela ku mwami.”

¹⁹ Kunangwa Bazisheba yazia komoloma ku mwami mu vogono vwa Adonija. Mwami yasingira kucheliza mama weve, kandi namwinamira. Maku yikala kondeve yeeye yu vwami, kandi nalaga iyindi eleetwe mama weve yikare ku mukono mulungi gwigwe.

²⁰ Yavoola, “Mbeeye ni likuva likekeeke lia nyenya ongolere, mwaza utaangaya mba.” Solomoni yamuteeva, “Ni likuva ki, mama? Sindakusulira mba.”

²¹ Bazisheba yativura, “Leka amwavo woovo Adonija avuguli Abishagi kuli mukali weve.”

²² Mwami yateeva, “Kigira ki oteeva inzi mbane Abishagi kuye? Unyala koteeva inzi muhe endeve yu vwami kandi. Kali ndio, aveeye amwavo wange munene, kandi Abiazari musaalisi na Joabu vaveeye ku lovega lwilwe.”

²³ Maku Solomoni yisuha mu lieta lia Yahova navoora; “Nyasaye anduyi nguzi, niiva sindakola Adonija atungi ni livamwoyo lilie mu liteeva yaga!

²⁴ Yahova usingilizi vudinyu kondeve yu vwami vwa baba wange Daudi. Yahova umali kulinda lisuuviriza lilie na uhaani uvwami ku inzi harara ni kisukururwi change. Nzisuha ku Yahova oveeye mwoyo ndi, Adonija alakuza lidiku lia lero.”

²⁵ Kunangwa mwami Solomoni yahaana malago ku Benaya muyaayi wa Jehoyada, watura nazia chova niyiita Adonija.

Lihaminywa lia Abiazari ni likuza lia Joabu

²⁶ Mwami Solomoni yavolera Abiazari musaalisi, “Yirana Anazozi, mu kivala chicho. Uduukani kwitwa, navuzwa sindakwita kalunu mba, kigira waginga Lisandugu lie Lilagana lia Yahova, Uvunyali imbiri wa baba wange Daudi, kandi nusanga mu vudinyu vwivwe vwosi.”

²⁷ Maku Solomoni yaha Abiazari ku litumika kuli musaalisi wa Yahova. Nandio yaduukiza aga Yahova yaali navooye mu Shilo ku musaalisi Eli harara ni visukululwi veve.

²⁸ Joabu yahulira agaali nigekoleki ku Adonija. Yaali niyungi Adonija mukono, navuzwa siyunga Abisolomu mukono mba. Kunangwa yirukira mu lihema liukuvuganira mu lia Yahova. Nagumira zinziga ziu kuvwaali.

²⁹ Lwa makuva gaduukiraa Mwami Solomoni ndi Joabu yirukiyi mu Lihema na ugumiyi ku zinziga ziu ku vwali, Solomoni yatuma mutumwa ku Joabu kumuteeva ikigiri niyirukira ku vwali; Joabu yativura ndi yirukiyi ku Yahova kigira yaali kutia Solomoni. Kunangwa Mwami Solomoni yatuma Benaya ukwita Joabu.

³⁰ Yazia mu Lihema liukuvuganira mu na Yahova navolera Joabu, “Mwami akulagaa utuli ichova.” Joabu yativura, “Awa. Ndakuzira hano.” Benaya yirana ku mwami namuvolera aga Joabu yaali navooye.

³¹ Mwami Solomoni yativura, “Kola cha Joabu mwene avoora. Mwiti na umunyaviri. Ahene yaho inzi anoho kinga avandi vosi ku kisukururwi cha Daudi sikuladurwa ku aga Joabu yakola lwa yita avandu vatali nimbala mba.

³² Yahova alaha Joabu amageri ku liita lia yakola vugira limanya lia baba wange Daudi. Joabu yita avasaza vaviri avaari avalahi ligali, Abineri, munene wi liihi lia Isiraeli kandi Amasa, munene wi liihe lie Ivuyuda.

³³ Amageri kigira liitwa liavo galagwira Joabu kandi ku kisukururwi chiche mihiga ni mihiga. Navuzwa Yahova alahaana uvuguuti kazozo ku kisukururwi cha Daudi, aviikalaa kondeve yu vwami vwivwe.”

³⁴ Kunangwa Binaia yazia mu Lihema liu kuvuganira mu na Yahova niyiita Joabu, kandi yayavirwa hango hehe mu mwigendanyama.

³⁵ Mwami yakola Benaya munene wi liihi mu vogono vwa Joabu; naviika Zadoku musaalisi mu vogono vwa Abiazari.

Likuza lia Simei

³⁶ Maku mwami yatumana Shimei yaaze, kandi namuvolera, “Wiyumbakiri inyumba hano mu Jerusalemi. Omenye muyo na utatula ku mu lidaala linene linu mba.

³⁷ Niiva ulatula na uzie engereka wu mugera gwa Kidironi, ivi ulakuza ligali, na amasahi googo galava ku mutwi gwugwo mwene.”

³⁸ Shimei yativura, “Vulahi ligali Mwami Wuluyali wange. Ndakora cha ovola.” Kunangwa yamenya mu Jerusalemi ku ing'inga indambi.

³⁹ Inyima wi mihiga givaga, vaviri ku avatugwa va Shimei viiruka kuzia ku mwami wa Gazi, Akishi muyaayi wa Maaka. Lwa Shimei yahulira ndi vaveeye mu Gazi,

⁴⁰ yanina ku ibunda yeeye nazia ku mwami Akishi mu Gazi ukwenya avatugwa veve. Yavanyoola naaviranyia yengo weve.

⁴¹ Lwa Solomoni yahulira cha Shimei yaali naakori,

⁴² yatumana yaaze kuye navoora, “Ndakwisuuhiza ku lieta lia Yahova uvuli kutura Jerusalemi. Kandi ndakwiganihiza ndi niiva ulakola ndio, ulakuza ligali. Ivi wavugilira ma novoora ndi ulambulira?

⁴³ Kunangwa, kigira ki uvunanyi lisuuviriza liilio kandi utinguhi lilaga liange?

⁴⁴ Ivi umanyi vulahi ligali vudamanu vwosi vwa wakolera baba wange Daudi. Yahova alakuha mageri kigira gene yago.

⁴⁵ Navuzwa alangasiza kandi alakola uvwami vwa Daudi vuhindira.”

⁴⁶ Maku Mwami yahaana malago ku Benaya kandi yazia ichova niyiita Shimei. Na vwami vwadinyirizwa ligali hasi hu vwamihi vwa Solomoni.