1 Avami 19 - KITABU KITAKATIFU

Elija yirukiraa ku kiguru cha Sinai

¹ Mwami Ahabu yavolera mukali weve Jezebeli vindu viosi via Elija yaali naakori kandi kuli yaali niyiiti avaporofeti va Baali vosi nikivavi.

² Jezebeli yatuma makuva ku Elija navoora, “Avanyasaye vanzite niiva mugamba kuduuka ku ing'inga yiyi sindakola ku ivi kindu kilala chere cho okoli ku avaporofeti mba.”

³ Elija yatia ligali, ma niyiruka kigira livamwoyo lilie; yavugula mutumikiri weve kandi nazia Beerisheba mu Ivuyuda. Yaleka mutumikiri weve wene yeyo,

⁴ Elija yagenda logendo lwi lilala liosi kuduuka mwigendanyama. Yazia niyikara hasi mu chiriri chumusaala kandi yegomba akuzi. Yasaala navoora, “Gaduuki, O, Yahova. Vugula livamwoyo liange. Vwakaveeye vulahi inzi nguzi.”

⁵ Yagona hasi isi wumusala na zindolo ziamulila. Nonoho engelosi yamudira navoora, “Vuka ulie.”

⁶ Yahenza nalora mulango gwu mugadi, kandi ijuba ya mazi ahimbi numutwi gwigwe. Yaalia kandi naanwa ma naagona hasi kandi.

⁷ Engelosi wu mwami yirana naamuvukiza lwa kaviri navoora, “Vuka ulie kigira logendo lulava lonene ligali ku ivi.”

⁸ Elija yavuka, nalia ma naanwa mazi kandi chukulia yicho chamuha zinguru kogenda ku madiku 40 kuduuka Sinai, kiguru kitakatifu.

⁹ Wene yeyo, yazia mu luhangaywa naagona mu vudiku vwosi. Nonoho Yahova yamoloma kuye navoora, “Elija, okalaa ki hano?”

¹⁰ Elija yativura navoora, “Yahova Nyasaye Wuvunyali; Inzi ngutumikiraa ivi weng'ine kazozo nuvugulu vwosi. Navuzwa vandu va Isiraeli vamala kuvunayia lilagana liavo niivi, kozooma hasi vwali vuvwo vwosi, nukwita vaporofeti vovo vosi. Inzi niyie utigaye zieng'ine; na vageriza kunzita!”

¹¹ Yahova yamuvolera, “Zia ichova na usingiri imbiri wange ku kiguru.” Maku Yahova yaavitira hazana yaho natuma kihuzuzi kenene chi zinguru chatandulanyia vigulu kandi nichatanyia zinyanda. Navuzwa Yahova siyaali mu kihuzuzi zana mba. Kihuzuzi chalekela kuhuuza, kandi lirova liadegera; navuzwa Yahova siyaali mu lidegera lie lirova mba.

¹² Inyima wi lidegera lie lirova, haali ho nu muliru; navuzwa Yahova siyaali mu muliru mba. Kandi inyima wu muliru, haali ho nu mwoyo gwa monya galaha.

¹³ Lwa Elija yahulira mwoyo yigwo, yafuma mumoni mwimwe ninguvu yeeye yukwiyuhira; nazia ichova kandi nasingira ha vwingiliru vwuluhangaywa. Mwoyo gwamuvoolera, “Elija, okolaa ki hano?”

¹⁴ Elija yativura navoora, “Yahova Nyasaye uvunyali, inzi ngutumikiraa ivi weng'ine kazozo nuvugulu vwosi. Navuzwa avandu va Isiraeli vamala kuvunayia lilagana liavo niivi, vaazooma hasi vwali vuvwo vwosi, nukwita avaporofeti vovo vosi. Inzi niyie utigaye zieng'ine na vageriza kunzita.”

¹⁵ Yahova yavoola, “Yirana mwigendanyama ahimbi Damasiko, ma wingiri mu lidaala linene, na uvake Hazaeli maguta ave mwami wa Siria;

¹⁶ uvake Jehu muyaayi wa Nimushi maguta ave mwami wa Isiraeli, kandi uvake Elisha muyaayi wa Shafati kutura mu lidaala lia Abeli-mehola maguta avuguli vogono vuvwo kuli muporofeti.

¹⁷ Mundu vosi ohononoka avuli kwitwa na Hazeli aliitwa na Jehu, kandi mundu woosi ohononoka ku Jehu, aliitwa na Elisha.

¹⁸ Nitali ndaleka vandu zielefu saba mu Isiraeli, yavo vosi vaveeye vasuuvirifu ku inzi kandi sivayinamira Baali anoho kuvuusa kifananyi chiichemba.”

Lilangwa lia Elisha

¹⁹ Kunangwa Elija yazia nanyoora Elisha muyaayi wa Shafati naalima ni miganda je zing'ombeli likomi na jiviri miganda likomi namulala jiali imbiri weve, naye yalima nu muganda gwu kumaliriza. Elija yaatuliza inguvu yeeye yukwiyuhira naagisigisa ku Elisha.

²⁰ Maku Elisha yaleka zing'ombe zizie, nalonderera Elija zimbiru navoora, “Mwaza leka nzie kusiivula baba na mama wange, mangolonde.” Elija yativura, “Vulahi. Yirana singugayaa mba!”

²¹ Hene yaho, Elisha yirana ku zing'ombe ziukulima zizie, naziita kandi nadeka inyama yazio; yatumikira iniira kuli zingu. Yahaana inyama ku vandu nivagilia Maku yazia nalonda Elija kuli mukonyeleri weve.