1 Avami 18 - KITABU KITAKATIFU

Elija na vaporofeti va Baali

¹ Yahova yavolera Elija mu muhiga gwa kavaga gwe kemeyu, “Zia wimanyie ku mwami Ahabu; na inzi ndatuma imbura.”

² Kunangwa Elija yazia kwelolekiza ku Ahabu. Inzara mu Samaria yaali induru ligali.

³ Kunangwa Ahabu yalanga Obadia yaaze, waali munene winyumba yu vwami Obadia yaali musuuviri wa Yahova,

⁴ lwa Jezebeli yitaa vaporofeti va Yahova, Obadia yavugula, imia ndala kuvo, naavavisa mu zimbangaywa mu miganda giviri ja vandu amusini, siavuli muganda kandi navaha chukulia na mazi.

⁵ Ahabu yavolera Obadia, “Genda kuzie kohenza ha vuli kidaho mu vuli lwaalo lwu mugera mu kivala kinu kolole niiva kunyala konyoora vunyasi vuduukira kulihiza zibarasi nizisukiri mbula zilava mwoyo, mbula kuvulikwita ndala ku zinyama zietu.”

⁶ Vavugirizana ni lovega ki sa mulala kuvo azie kohenza, ma nivatura kuzia mu zimbega lugano lugano.

⁷ Lwa Obadia yaali naziiza, nonoho yagana na Elija. Yamumanyiriza kandi naamusigamira namuteeva, “Ni ivi ligali munene wange?”

⁸ Yativura “Yee, inzi ni, Elija. Zia ovoolere munene woovo mwami Ahabu ndi, mbeeye hano.”

⁹ Obadia yativura, “Ngoli ki kigira numbika mu vuhimwa vwu kwitwa nu mwami Ahabu?

¹⁰ Ku Yahova oveeye mwoyo, Nyasaye woovo, nzisuha ndi mwami yavodong'ana mukivala choosi na kwenyaa mu lirova. Ing'inga yosi lwu mwamihi wi kivala yaleeta makuva ndi sioveeye mu kivala chiche, Ahabu yateevaa mwamihi oyo yisuuhi ndi ivi sionyoleki mba.

¹¹ Na kalunu wenya inzi nzie kumuvolera ndi oveeye hano?

¹² Galava ki niiva Roho wa Yahova gulakuvugula gukuhili kuduuka havundu hatamanyikani, nonoho lwa mba nindula? Maku, lwambolera Ahabu ndi oveeye hano ma avuli kukonyoola, alaanzita. Wizulizi ndi ndaasigamira Yahova kutura mu vosooleri vwange.

¹³ Ukiri kuhulira ndi lwa Jezebeli yaali niyiitanga avaporofeti va Yahova, ndaavisa imia indala kuvo mu zimbangaywa, mu miganda giviri ja vaporofeti amusini sa mulala kandi nimbaha chukulia namazi?

¹⁴ Kunangwa unyala kulaga ndi inzi nzie kovoolera mwami Ahabu ndi oveeye hano? Alaanzita!”

¹⁵ Elija yativura, “Ngusuuvirizaa ku Yahova wa mahi oveeye mwoyo, wa inzi ndumikiraa ndi, inzi mwene ndiimanyia ku mwami Ahabu kalunu.”

¹⁶ Kunangwa Obadia yazia kovoolera mwami Ahabu na Ahabu yatura kuzia kwaganira Elija.

¹⁷ Lwa Ahabu yamulola, yavoola, “Ng'ani oveeye hano! Mudambizi munene kuvita vosi mu Isiraeli!”

¹⁸ Elija yativura “Inzi simbeeye mudambizi mba. Ni ivi harara na baba woovo avaveeye vadambizi. Ivi uvula kuhulira malago ga Yahova nukusigamira vifananyi via Baali.

¹⁹ Kalunu laga avandu vosi va Isiraeli vaagane ninzi ha kiguru cha Karimeli. Leeta vaporofeti va Baali 450 kandi vaporofeti 400 vumunyasaye wikikali Ashera avakonywa na Jezebeli mukali woovo.”

²⁰ Kunangwa Ahabu yalanga Vandu va isiraeli vosi na vaporofeti va Baali vaagane ha kiguru cha Karimeli.

²¹ Elija yazia ku vandu zana navoora, “Galavugula lohono ki kunangwa munyi muduuki ku likalaga? Niiva Yahova ni Nyasaye, mumusigamiri; navuzwa niiva Baali aveeye nyasaye, mumusigamiri!” Navuzwa vandu sivativula likuva kali lilala mba.

²² Maku Elija yavoola, “Inzi niyie muporofeti wa Yahova weng'ine watigala mwoyo. Navuzwa muveeye na vaporofeti 450 va Baali.

²³ Leeti zigiriki ziviri; Leti avaporofeti va Baali vavuguli indala, vajiti, vadonyanyie mu vidonye ma vagiviiki ku zingu, na mutafani muliru mba. Inzi ndakora malala mere nigiriki yindi.

²⁴ Maku muleke vaporofeti va Baali vasaale ku nyasaye wavo, na inzi ndasaara ku Yahova, kandi oyo oleeta mativuli go koleta muliru, oyo niyie Nyasaye.” Avandu vahanzuka nu mwoyo munene mu livugilira makuva yago.

²⁵ Maku Elija yavolera vaporofeti va Baali, “Kigira munyi muveeye vanyingi ligali, munyi muvuguli igiriki na mugelombe kutanga. Musaale ku nyasaye winyu, navuzwa mutafani muliru mba.”

²⁶ Vaavugura igiriki ya valeetelwa, nivagelomba, kandi nivasaara ku Baali kutura mugambazuri kuduuka mbasu hagati. Vahanzuka nivavoora, “Kutivuliri Baali!” Kandi nivazizagilira kuvina nivavodong'ana vwali vwa vaali nivumbaki. Navuzwa litivuli kali lilala siliaza mba.

²⁷ Mbasu hagati, Elija yaatanga kuvakolera kehenyahenye; “Saali vudinyu! Aveeye nyasaye! Alootaa mbasu anoho asoosaa, anoho hawundi uziiyi ko logendo. Anoho agonaa na kuduuka mumuvukize!”

²⁸ Kunangwa Avaporofeti zana vasaala vudinyu ligali kandi nivikalaga nimivano, kolondekana ni mwima gwi lisigamira vanyasaye vaavo, kuduuka lwa masahi gidorokaa.

²⁹ Mbasu hagati vazizagilira kuhanzuka no komoloma kuli vandu valalu kuduuka ing'inga yukuhaana kisiuviriru cha mugolova. Navuzwa si vahulira mwoyo gwosi mba; kandi sihaali ho na mativuli, mba.

³⁰ Maku Elija yavolera vandu yavo, “Yisundi himbi ni inzi,” na vosi vavunga kumukumbiriza. Yaatanga kwumbaka vuhia vwali vwa Yahova vwali ni vwasambulwa.

³¹ Elija yavugula amagina likomi na gaviri, lilala ku vuli ihiiri yi inyumba ya vayaayi va Yakobo wa Yahova yaali ni yagulika Isiraeli.

³² Yatumikira magina yaga yumbaka vuhia vwali vwu kusigamira ku Yahova. Yayava mutalo kukumbiriza vwali zana, mutalo munene gwaaligunyala kuvugura himbi ziliitali komi na zine zia mazi.

³³ Maku yavika zingu ku vwali kandi, natemanyia igiriki muvidonye nagiviika ku zingu. Yavoola, “Mwizurizi amazi mu zisiongo zine na mugasunduli ku kihanwa kandi ku zingu” vaakora ndio.

³⁴ Yavoola kandi, “Koli ndio kandi.” Na vaakora ndio. Kandi yavoola, “Koli ndio kandi lwakavaga.” Navo vakora ndio.

³⁵ Amazi giturukaa ni gakumberiza zimbega ziosi ziu vwali kandi nigizula mu mitaro.

³⁶ Ku ing'inga yukuhaana kisiuviriru cha mbasu, muporofeti Elija yisunda himbi ku vwali nasaara navoora, “O, Yahova, Nyasaye wa Aburahamu, Isaka, na Yakobo, lolekiza kalunu ndi ivi oveeye Nyasaye wa Isiraeli, kandi inzi mbeeye mutumikiri woovo kandi mali kokora yaga goosi kolondekana ku lilaga liilio.

³⁷ Ndivulira O, Yahova, ndivulira kunangwa vandu yava vaduuki kumanya ndi ivi Yahova, oveeye Nyasaye, kandi wiranyie mioyo ja vandu yava vaze ku Ivi.”

³⁸ Yahova yaleeta muliru ni gusambaa kisiuviriru, zingu, magina, gwuminya malova kandi gukaminyaa mazi mu mumitalo.

³⁹ Lwa vandu valora yaga, vaagwa hasi mamumama nivahuga nu mwoyo munene nivavoora, “Yahova aveeye Nyasaye; Yahova yeng'ine aveeye Nyasaye!”

⁴⁰ Elija yalaga, “Gumira avaporofeti va Baali; mutaleki mulala kuvo yiruki mba!” Avandu vavagumira vosi na Elija yaavimilira kusulunguta ku mugera gwa Kishoni, navitira yo.

Keheri che kemeyu

⁴¹ Maku Elija yavolera mwami Ahabu, “Kalunu, zia na ulie chukulia. Mbulira lihiligana lie imbura enene.”

⁴² Lwa Ahabu yazia kulia, Elija yanina kondogozi yi kiguru cha Karimeli lwa yinama hasi ku marova, umutwi gwigwe nigoveeye hagati ha maru geege.

⁴³ Yavolera mutumikiri weve, “Zia ohenze lovega lohenza kunyanza.” Mutumikiri yazia niyirana navoora, “Sindoli kindu choosi mba.” Haali saba lwosi, Elija yamuvolera azie kohenza.

⁴⁴ Ing'inga ya saba, mutumikiri oyo yirana navoora, “Mali kolola lilesi likekeeke kuvita kigalo chu mukono gwu mundu ni litulaa munyanza.” Elija yavolera mutumikiri weve, “Zia ku mwami Ahabu na umuvolere yingiri mu ligare lilie liu vulwani na yirane yengo vwangu imbura nigikiri kumwigalira.”

⁴⁵ Mu ing'inga ngekeeke, ligulu liafumwa na malesi mamwamu ti. Imbuza yaatanga kuhuuza, kandi imbura enene yaatanga kukuba. Ahabuu yingira mu ligare lilie liu vulwani kandi natanga kwirana vwangu, ha Jezireeli.

⁴⁶ Zinguru zia Nyasaye ziaza ku Elija; yevoha zinguvu zizie vudinyu mu kekenge, niyekolelera imbiri wa Ahabuu kwingira mu Jezireeli.