1 Avami 17 - KITABU KITAKATIFU

Elija yigalira Imbura

¹ Muporofeti walangwa Elija, kutura Tishibe mu kivala cha Gileadi, yavolera mwami Ahabu, “Mu lietia lia Yahova, Nyasaye oveeye mwoyo wa Isiraeli, wa inzi ndumikiraa, ngovolera ndi sihalavaho ni lime anoho imbura ku mihiga giviri anoho jivaga kuduuka lwambolera.”

² Maku Yahova yavolera Elija,

³ “Tula havundu hano na uzie mu lovega lwivugwi na wivise ahimbi na kagera ka Kerizi, ivugwi wu mugera gwa Jorodani.

⁴ Kagera yako kalakuha mazi gu kunwa, na inzi mali kulaga amajikolo gakoleetere chukulia hene yaho.”

⁵ Elija yahulira lilaga lia Yahova, nazia namenya ahimbi na kagera ka Kerizi.

⁶ Yaanwa mazi kutura mu kagera zana, na majikoro gamuleetera migadi ninyama vuli mugamba kandi vuli mugolova.

⁷ Inyima wing'inga ngekeeke, kagera zana kuuma kigira imbura siyaakubamba.

Elija nu mukunzakali wa Zerefazi

⁸ Maku Yahova yavolera Elija,

⁹ “Kalunu tula uzie mu lidaala lia Zerefazi, himbi Sidoni na omenye yo. Mali kulaga mukunzakali omenyi yo akulihizi.”

¹⁰ Kunangwa Elija yazia kuduuka Zerefazi, lwa yaali niyakadukaa ha kirivwa chi lidaala, yalora mukunzakali naatenyanga zingu. Elija yamuvolera, “Mwaza ndetera ku mazi nwi.”

¹¹ Lwu mukali uyu yaali nazizaa kumuletera, mazi yamulanga navoora, “Kandi nuyanza ondetere mugadi.”

¹² Yativura, “Ku Yahova Nyasaye woovo nzisuha ndi simbeeye ku nu mugadi mba. Ichambeeye nacho choosi keveeye vuzwa nutusie tuduuka ku luhi lulala munyingu nu tuguta tokekeeke vuzwa. Nzizi hano kotenya zingu zia mbira yengo, nombere muyaayi wange harara ninzi mwene kekekeeke chambeeye nacho. Yicho kilava chukulia chiitu chukumaliriza, ma kukuzi.”

¹³ Elija yamuvolera, “Utahenda mwoyo mba. Zia olombe chukulia yicho. Navuzwa kutanga ndugila utuchima tudi kutura ku cha oveeye nacho na ondeetere, kandi vutigaye vwosi ku ivi nu muyaayi woovo.

¹⁴ Yaga nigo ga Yahova, Nyasaye wa Isiraeli, avoora: ‘Uvusie sivulafwa mu inyingu anoho maguta mu njuba mba. Kuduuka lidiku lia inzi, Yahova, nduma imbura ku lirova.’ ”

¹⁵ Mukunzakali oyo yazia naakora kuli Elija yaali namuvooleye, kandi yavo vosi vaali nichukulia chavaduuka ku madiku manyingi.

¹⁶ Kuli Yahova yaali naasuuvirizi kuvitira mu muporofeti Elija, vusie sivwafwa mu inyingu anoho maguta kufwa mu ijuba mba.

¹⁷ Inyima wi vindu yivi, muyaayi wumukunzakali yalwala; vulwaye vwamukira ligali kuduuka nakuza.

¹⁸ Mukunzakali uyu yavolera Elija, “Mundu wa Nyasaye, kigira ki nokora yaga ku inzi? Waza hano kwizuliza Nyasaye vwoni vwange no koleta likuza liu muyaayi wange?”

¹⁹ Elija yavoola, “Ndetera muyaayi oyo hano.” Yavugula muyaayi oyo kutura mu makono ga mama weve, kumuhila mu gorofa igulu mu keng'oze cha yamenya mu, ma namwaliriza ku kidali.

²⁰ Maku yasaala vudinyu, “O, Yahova Nyasaye wange, kigira ki okoli kindu chokoveleia kuli yiki ku mukunzakali uyu? Yaveyange mukali mulahi ligali kondenda, kalunu witi muyaayi weve!”

²¹ Maku Elija yagona mamumama ku mwana zana haali kavaga nasaara navoora, “Oh Yahova Nyasaye wange, yiranyira muyaayi uyu livamwoyo!”

²² Yahova yativulira Elija lisaala lilie, muyaayi yanyoora livamwoyo lilie kandi nasimuguka.

²³ Elija yiranyia muyaayi mu keng'oze cha hasi ku mama weve namuvolera, “Henza, muyaayi woovo aveeye mwoyo!”

²⁴ Mukunzakali oyo yativura, “Kalunu ndakamanya ndi ivi oveeye mundu wa Nyasaye, kandi Yahova amolomaa ligali kuvitira mu ivi!”