1 Avami 15 - KITABU KITAKATIFU

Mwami Abija wi Ivuyuda

¹ Mu muhiga gwa komi na nane gwi liamiiha liu mwami Jeroboamu muyaayi wa Nebati wa Isiraeli, Abija yakolwa mwami wi Ivuyuda,

² yamiha mu Jerusalemi ku mihiga givaga. Mama weve yalangwa Maaka, mukaana wa Abisolomu.

³ Yakola vwoni vulala vwere kuli baba weve, kandi siyaali ligali musuuvirifu ku Yahova Nyasaye weve, kuli guuga weve Daudi yaali mba.

⁴ Navuzwa kigira Daudi, Yahova Nyasaye weve yaaha Abija muyaayi kwamiiha inyima weve mu Jerusalemi kwumbaka kandi kolomba Jerusalemi kuva lidaala liezingulu.

⁵ Yahova yakola yaga Kigira Daudi yaali namali kokora gaali amalungi imbiri wi zimoni zizie Yahova na siyavunaga kali kugumira lilala ku malago ga Yahova madiku goosi gi livamwoyo liliemba - nitali mu likuva lia Uria umuhiti.

⁶ Uvulwani vwatanga hagati ha Rehoboamu na Jeroboamu, vwazizagilira kuduuka mu livamwoyo liosi lia Abija.

⁷ Vindu vindi viosi via Abija yakola viang'odwa mu vitabu via makuva ga kale via vami vi Ivuyuda. Uvulwani vwali ho hagati ha Abija na Jeroboamu.

⁸ Abija yakuza ma nayavirwa mu lidaala linene lia Daudi, na muyaayi weve Asa yavugula vogono vwivwe kuli mwami.

Mwami Asa wi Ivuyuda

⁹ Mu muhiga gwa sirini gwi liamiiha liu mwami Jeroboamu wa Isiraeli, Asa yakolwa mwami wi Ivuyuda;

¹⁰ na yamiha ku mihiga arubaini na moja mu Jerusalemi. Guuku weve yaali Maaka, mukaana wa Abisolomu.

¹¹ Asa yakola gayaanziza Yahova, kuli guuga weve Daudi yakola.

¹² Yakunga vasaza vandi vakora voheyi na vasaza vandi vavikwa halovega voosi kutura mu kivala chi Ivuyuda vatumikanga havundu hukusigamira misambwa ha avandu vatasuuviraa mu Nyasaye wagiligali vasaalira. Yaatuliza ho kandi vifananyi viosi via yavo vaali imbiri weve valomba.

¹³ Yaatuliza guuku weve Maaka kutura mu vogono vwivwe kuli mwami wikikali - kigira yaali naalombi kifananyi cha manyego chu munyasaye wikikali wu lwivulu Ashera. Asa yaatemanyia kifananyi zana kandi nakisambira mu livona lia Kidironi.

¹⁴ Kali niiva Asa siyononyia havundu hukusigamira misambwa hoosi, navuzwa yaazizagilira kuva musuuvirifu ku Yahova mu livamwoyo lilie liosi.

¹⁵ Yavika viju viosi mu Litembeli, via baba weve yaali nalombi mu kandi naavitakasa kigira vutumiki vwa Nyasaye, harara niviju vie izahabu ni feza via oyo mwene yaavikwa halovega kigira vutumiki vwa Nyasaye.

¹⁶ Mwami Asa wi Ivuyuda kandi mwami Baasha wa Isiraeli vaali mu vulwani kazozo, mulala nuwache ku lohono lwa vaali mu vwamihi.

¹⁷ Baasha yingilira Ivuyuda kandi natanga kwumbaka imbinga ha Rama aduuki kwigalira zinzira ziosi ziukwingira nukutura mu Ivuyuda.

¹⁸ Kunangwa mwami Asa yavugula ifeza ni izahabu yoosi yaali yalekwa mu Litembeli nu munyumba yu vwami, ma natuma valala ku vanene veve ku vihila Damasiko, mwami Benihadadi wa Siria muyaayi wa Taburimoni, na mwisukulu wa Hezioni, na makuva yaga:

¹⁹ “Leka kove valina kulilagana, kuli vababa viitu vaali. Ifeza ni zahabu yiyi viveeye vihaanwa vivio. Kalunu vunanyia vulina vwililagana liilio nu mwami Baasha wa Isiraeli kunangwa aduuki kutuliza mahi geege gatuli mu kivala change.”

²⁰ Mwami Benihadadi yavugilira ku zing'anagani ziu Mwami Asa yaali naleti, kandi natuma vanene veve vi liihe harara na mahe gaavo kwingilira madaala manene ga Isiraeli. Vagumira Ijoni, Dani, Abeli Bezi Maaka, kivala keveeye himbi ku inyanza ya Galilaya; kandi kivala choosi cha Nafutali.

²¹ Lwu mwami Baasha yahulira chaali nikekoleki, yalekera kwumbaka imbinga ya Rama kandi nazia komenya Tiriza.

²² Maku mwami Asa yatuma lilago mu kivala choosi chi Ivuyuda niyenyaa avandu vosi, vugira koleka mundu kali mulala, kuzia kokonyana kuginga amagina ya Rama, kandi zimbaho zio mwami Baasha yaali natumikira kuliumbakira lidaala yilio imbinga. Mwami Asa yatumikira vindu yivi kwumbaka imbinga ya Mizipa na Geba, lidaala linene mu kivala cha Benjamini.

²³ Vindu vindi viosi vio mwami Asa yakola, vikolwa vivie viuvuluviliri, na madaala ga yumbakira zimbinga viang'odwa mu kitabu cha makuva ga kale ga vami vi Ivuyuda. Navuzwa mu vusakulu vwivwe, vulwaye vwamuleminya virenge.

²⁴ Mwami Asa yakuza ma nayavirwa mu vilindwa viu vwami mu lidaala linene lia Daudi, na muyaayi weve Jehoshafati yavugula vogono vwivwe kuli mwami.

Mwami Nadabu wa Isiraeli

²⁵ Mu muhiga gwa kaviri gwu vwamihi vwu mwami Asa wi Ivuyuda, muyaayi wu mwami Jeroboamu, Nadabu yakolwa mwami wa Isiraeli, na yamiha ku mihiga giviri

²⁶ Nadabu yakola Vwoni, ku Yahova kandi yakola vandu va Isiraeli kugwa mu vwoni. Kuli baba weve yakola

²⁷ Baasha muyaayi wi Ahija we hiiri ya Isaka, yaazira Nadabu hasi ma naamwita lwa Nadabu ni liihi lilie vaali nivakumbiriza lidaala linene lia Gibezoni mu Filisitia.

²⁸ Yaga gekoleka mu ing'inga yu muhiga gwa kavaga gwu vwamihi vwu mwami Asa wi Ivuyuda. Nandio Baasha yavugula vogono vwa Nadabu kuli mwami wa Isiraeli.

²⁹ Nonoho, yaatanga kwita vandu vinyumba vosi va Jeroboamu. Lilondekana na ga Yahova yaali navooye kuvitira mu mutumikiri weve, muporofeti Ahija kutura Shilo, vandu vinyumba va Jeroboamu vosi viitwa; sihaali ho nu mulala watigala mba.

³⁰ Yaga gekoleka kigira Jeroboamu yavuukiza vutima vwa Yahova, Nyasaye wa Isiraeli, kigira vwoni vwa yakola kandi yaakolo Isiraeli kokora.

³¹ Vindu vindi viosi via Nadabu viang'odwa mu kitabu cha makuva ga kale ga vami va Isiraeli.

³² Mwami Asa wi Ivuyuda nu mwami Baasha wa Isiraeli vaali mu valwaana kazozo, ga vaali mu vwamihi.

Mwami Baasha wa Isiraeli

³³ Mu muhiga gwa kavaga gwu vwamihi vwu mwami Asa wi Ivuyuda, Baasha muyaayi wa Ahija yagwa mwami wa Isiraeli, kandi yamiha ku mihiga sirini na ine mu Tiriza.

³⁴ Mwami Jeroboamu yakola vwoni ku Yahova, yakola vwoni ku Yahova kandi naakora Isiraeli kokora vwoni.