1 Avami 14 - KITABU KITAKATIFU

Likuza liu muyaayi wa Jeroboamu

¹ Ing'inga yeyo Abija muyaayi wu mwami Jeroboamu yalwala.

² Jeroboamu yavolera mukali weve, “Mwaza, yigirung'anyie wekole munduwundi kunangwa mundu uvuli kumanyikana ndi oveeye mukali wange, na uzie Shilo, wu muporofeti Ahija amenyaa, kigira niyie wavoola ndi inzi ndava mwami wa Isiraeli.

³ Muhiliri milaango likomi ji migadi, zikeki, kandi ijuba yu vwuki. Muteeve ikizizaa kwekoleka ku muyaayi wiitu naye alakovolera.”

⁴ Kunangwa mukali wa Jeroboamu yazia yengo wa Ahija mu Shilo. Uvusaakulu vwali nivwakola Ahija mboku.

⁵ Yahova yaali navoleeye Ahija ndi mukali wa Jeroboamu yaza kumuteeva makuva gumuyaayi weve waali naveeye mulwaye. Yahova yavolera Ahija cha avoora. Lwu mukali wa Jeroboamu yaduuka, yekola kuva mundu wundi.

⁶ Navuzwa lwa Ahija yahulira liza lilie mu kiliango, yavoola, “Yingira. Inzi manyi ndi ivi oveeye mukali wa Jeroboamu. Kigira ki wekolaa kuva mundu wundi? Mbeeye na makuva madamanu ku ivi.

⁷ Zia ovoolere Jeroboamu ndi yaga nigo ga Yahova, Nyasaye wa Isiraeli amuvoleraa: ‘Ndaakotovola kutura hagati ha vandu ma ningokola mwamihi wa vandu vange Isiraeli.

⁸ Ndaatuliza vwami kutura ku visukululwi via Daudi, na nimbuhaana ku ivi. Navuzwa ivi si waali kuli mutumikiri wange Daudi mba, waali musuuvirifu ku inzi ligali, naahulira malago gange, kandi naakora agandavugilira geng'ine.

⁹ Umali kokora vwoni vonene ligali kuvita kegero, kandi kuvita yavo vamiiha imbiri woovo. Umali kunyambakana kandi uvuukizi vutima vwange ku lilomba misambwa kandi vifananyi vie vivia viduuki kusigamirwa.

¹⁰ Kigira yaga, ndaleta kivi ku vwamihi vwi inyumba yooyo kandi ndiita visukululwi vikisaza vovo vosi, vana na vahindira vugira kweliza. Ndatuliza ho vandu vinyumba yooyo; valeeywa vatuli ho kuli isingu.

¹¹ Mundu woosi, winyumba yooyo ukuzira mu lidaala linene, alaliivwa nizimbwa, kandi mundu woosi ukuzira mu kiguti, alalivwa ni zisoti. Inzi Yahova mali komoloma.’ ”

¹² Ahija yaazizagilira kovoolera mukali wa Jeroboamu, “Kalunu yirana yengo. Nonoho lwu uduuka mu lidaala, muyaayi woovo alakuza.

¹³ Avandu vosi va Isiraeli valamusiomera nukumuyavira. Alava niyie yeng'ine wi nyumba ya Jeroboamu waza ayavilwi vulahi, kigira oyo niyie yeng'ine wa Yahova Nyasaye wa Isiraeli, ayanziziywi naye.

¹⁴ Yahova azizaa kuviika mwami ku Isiraeli waza aviiki keheri ku vwamihi vwi nyumba ya Jeroboamu.

¹⁵ Yahova alahaana mageri ku Kivala cha Isiraeli, kandi kiladegera kuli kidundu kedegeraa mu mugera gwa mazi. Aliiha vandu va Isiraeli vatuli mu kivala kilahi yiki cha yahaana ku vaguuga vaavo, kandi alavasalanyia ihale engereka wu mugera gwa Efurate, kigira vamali kuvukiza vutima vwivwe, ku lisigamira munyasaye wikikali Ashera.

¹⁶ Yahova alaleka Isiraeli kigira Jeroboamu yakola vundamanu naahira vandu va Isiraeli mu vwoni.”

¹⁷ Mukali wa Jeroboamu yirana mu lidaala lia Tiriza. Nonoho lwa yingira hango hehe, mwana oyo yakuza.

¹⁸ Avandu va Isiraeli vamusiomera kandi nivamuta, kuli Yahova yaali navooye kuvitira mu muporofeti weve Ahija.

Likuza lia Jeroboamu

¹⁹ Ivindu vindi viosi viu mwami Jeroboamu yakola, mahi ga yalwana, kandi kuli yamiha, viosi viang'odwa mu vitabu via makuva ga kale ga vami va Isiraeli.

²⁰ Jeroboamu yamiha ku mihiga 22 kuli mwami. Yakuza kandi nayavirwa, muyaayi weve Nadabu yavugula vogono vwivwe kuli mwami.

Mwami Rehoboamu wi Ivuyuda

²¹ Muyaayi wa Solomoni Rehoboamu yaali ni mihiga 41 lwa yagwa mwami wi Ivuyuda, kandi yamiha ku mihiga 17 mu Jerusalemi, lidaala linene lia Yahova yaali niyaatovora kutura mu kivala choosi cha Isiraeli kuli havundu ha yenyeka asigamirwi. Mama wa Rehoboamu yaali Naama kutura mu kivala cha Amoni.

²² Avandu vi Ivuyuda vaakora vwoni vunyingi ligali kandi nivavuukiza vutima vwa Yahova kuvita avaguuga vosi vaali nivakora.

²³ Vumbaka havundu hukusigamira vanyasaye vuvugadi, kandi nivumbaka minaara ja magina kandi nivifananyi viu munyasaye wikikali Ashera, wavasigamira ku vigulu kandi mu viliiri vie misaala.

²⁴ Kwononyira ligali, kali vaali ho masaaza vaakora voheyi na vasaza vandi vaviikwa halovega vatumika havundu hukusigamira misambwa. Avandu vi Ivuyuda vaakora vindu viosi viezisoni viakolwa na avandu vosi va Yahova yaali niyakunga kutura mu kivala lwa vandu va vaisiraeli visunda vingira mu kivala chavo.

²⁵ Mu muhiga gwa katano gwu vwamihi vwa Rehoboamu, mwami Shishaka wa Egebeti yingilira jerusalemi.

²⁶ Yavugula viju viuvuguli viosi kutura mu Litembeli, kandi munyumba yu vwami, komeeda ku zikuuti zie zahabu zia Solomoni yaali niyalomba.

²⁷ Kwilanyia ho viju vindi, mwami Rehoboamu yalomba zikuuti zie migasa kandi naviika mu vulindi vulahi vwa vanene valindanga virivwa vie nyumba yu vwami.

²⁸ Vuli ing'inga lwu mwami yazia mu Litembeli, avasikari vaginga zikuuti yizio ma kandi vaziiranyia mu keng'oze chukuzilindira mu.

²⁹ Vindu vindi viosi viu mwami Rehoboamu yakola viang'odwa mu vitabu via makuva ga kale ga vami vi Ivuyuda.

³⁰ Mu ing'inga yiyi yoosi, Rehoboamu na Jeroboamu vaali mu vulwani kazozo.

³¹ Rehoboamu yakuza kandi nayavirwa mu vilindwa vio mu Lidaala linene lia Daudi; kandi muyaayi weve Abija yavugula vogono vwivwe kuli mwami.