1 Avami 13 - KITABU KITAKATIFU

Muporofeti kutura Ivuyuda Yakalagira uvwali

¹ Ku lilaga lia Yahova, muporofeti kutura Ivuyuda yazia Bezeli, ma naduuka yo ing'inga ya Jeroboamu yaali nasingiyi ha vwali kuhaana kihanwa.

² Kolondekana ni lilaga lia Yahova, muporofeti zana oyo, yahanzuka kukalagira vwali navoora, “O, vwali! Vwali! Yaga nigo ga Yahova avoora, ‘Muyaayi alivulwa munyumba ya Daudi lieta lilie lilava Josia. Aliitira ku ivi vasaalisi vatumika ku vwali vwa vandu vasigamira misambwa kuli visiuviliru, kandi alasambira vigumba via vandu ku ivi.’ ”

³ Kandi muporofeti oyo yaazizagilira kovora, “Uvwali yivu vuladikana, kandi ligoke liveeye kuvwo liluhulanywa. Ahene yaho, kuvitira ku inzi ulamanya ndi Yahova avoora.”

⁴ Lwu mwami Jeroboamu yahulira gu muporofeti yavoola, yanyira mukono gwigwe kutura ku vwali navoora, “Gumiri mundu oyo!” Nonoho mukono gwa yanyira kosona muporofeti gwahaanda yo, kunangwa siyaali anyala kugulinga anoho kugwilanyia mba.

⁵ Uvwali navwo vwadikana, niligoke nalio niliuhulanywa hasi kuli muporofeti yaali navooye mu lieta lia Yahova.

⁶ Mwami Jeroboamu yavolera muporofeti, “Mwaza salira ku Yahova Nyasaye woovo, na umuteeve ahonyie mukono gwange!” Muporofeti zana yasaala ku Yahova, nu mukono gwu mwami gwahonywa.

⁷ Maku mwami yavolera muporofeti oyo, “Hamba yengo niinzi na uduuki kulia kindu; na inzi ndakuha kihanwa.”

⁸ Navuzwa muporofeti zana yamutivulira, “Kali niiva wakambeeye inusu yu vutugi, sindakaziyi nivi anoho kulia anoho kunwa kindu choosi nivi mba.

⁹ Yahova umali kulaga inzi ndi mburi kunwa anoho kulia kindu, kandi mburi kwiranira kunzira ndala nzere ya nziziiyi ku.”

¹⁰ Kunangwa siyiranira kunzira ya yaazira ku mba, navuzwa yavugula inzira yindi.

Muporofeti musakulu wa Bezeli

¹¹ Ing'inga yeyo yaali ho muporofeti musakulu wamenyanga mu Bezeli. Vayaayi veve vaza kuye nivamuvoolera gu muporofeti kutura Ivuyuda yaali naakori mu Bezeli lidiku yilio kandi ga yaali navoleeye mwami Jeroboamu.

¹² Muporofeti musakulu yavateva, “Aziliyi kuinzira ki?” Vamumanyia inzira zana.

¹³ Yavavolera vamulombere vwikaliru ku barasi yeeye. Vakora ndio, naye yanina ku ibarasi natura vwangu,

¹⁴ nasulunguta kuinzira yeyo kolondelera muporofeti kutura Ivuyuda. Yamunyola niyikaye hasi isi wu musaala munene. Yamuteeva, “Ivi niyie muporofeti kutura Ivuyuda?” Yativura, “Yee, ni inzi.”

¹⁵ Muporofeti musakulu yamuvolera, “Hamba yengo na ulie chukulia ninzi.”

¹⁶ Navuzwa muporofeti kutura Ivuyuda yativura, “Sinyala kuzia yengo nivi naho mbugiliri ligenihiza liilio mba. Kandi sindalia anoho kunwa kindu,

¹⁷ kigira mwami undagi mburi kulia anoho kunwa kindu, kandi mburi kwiranira kunzira ndala nzere ya nziziiyi ku mba.”

¹⁸ Maku muporofeti musakulu kutura Bezeli yamuvolera, “Inzi, mbeeye muporofeti kuli ivi, na ku lilaga lia Yahova, engelosi amboleeye nguvuguli nguhile yengo wange kandi ngogenihizi niviukulia kandi unwi amazi.” Navuzwa muporofeti musakulu oyo yaali namugandaa.

¹⁹ Kunangwa muporofeti kutura Ivuyuda yazia yengo numuporofeti musakulu kandi nalia chukulia harara naye.

²⁰ Lwa vaali nivikaye ha mesa ku chukulia, likuva lia Yahova liaza ku muporofeti musakulu.

²¹ Yahanzukira muporofeti kutura Ivuyuda navoora, “Yahova avoora ndi ivi uvuli kumuhulira na siokoli sia akulagi mba.

²² Mu vogono yivwo ivi wirani kulia viukulia ha vundu ha kugayi uvuli kulia ho. Kigira yaga, ivi uliitwa, nu umuviri gugwo sigulateevwa mu kilindwa cha vinyumba yooyo mba.”

²³ Inyima wa vaali nivakamara kulia, muporofeti musakulu yalombera muporofeti wi vuyuda vwikaliru ku Ibunda yeeye

²⁴ muporofeti kutura Ivuyuda yazia. Lwa yaali kuinzira, yagana ni Isimba ni nimwiita. Muviri gwigwe gwalambira kunzira na Ibunda ni Isimba viasingira halovega hagwo.

²⁵ Vandu valala vavitira ho na nivalora muviri kunzira, nisimba nisingiyi himbi nagwo. Vazizagilira kuduuka mu Bezeli ma nivavoora inguuva ya vaali nivaloli.

²⁶ Lwu muporofeti musakulu yahulira amakuva yaga, yavoola, “Oyo niyie muporofeti wavula kuhulira lilaga lia Yahova! Yahova yatuma isimba kumwingilira kandi kumwita, kuli Yahova yaali navooye alava.”

²⁷ Yavolera vayaayi veve, “Nombeli vwikaliru ku ibunda.” Vakora ndio,

²⁸ kandi yanina nazia, nanyoora muporofeti zana ulambiyi kunzira, ibunda ni isimba nivikisingiyi halovega himbi naye. Isimba siyaali anoho kwingilira kutulira ibunda mba.

²⁹ Muporofeti musakulu yadoola muviri, naguviika ku ibunda, kandi naagwiranyia mu Bezeli, agusiomere kandi kuguta.

³⁰ Yaaguyavira mu Kilindwa chiche mwene cha vinyumba yeye, na vayaayi veve vagusiomera. Ligali, nivavoora “O, amwavo wange, amwavo wange!”

³¹ Inyima wa vaali nivakamuyavira, muporofeti musakulu yavolera avayaayi veve, “Lwa ndikuza, mulanzaviri mu kilindwa yiki, na mulaviiki muviri gwange ahimbi nugwigwe.

³² Amakuva ga Yamoloma ku lilaga lia Yahova ku vwali ha Bezeli, kandi havundu hoosi hukusigamira mu madaala ga Samaria, galekoleka kuva giligali.”

Uvwoni vonene vwa Jeroboamu

³³ Mwami Jeroboamu wa Isiraeli siyagirung'ana kutura kuzinzira zizie zindamanu, navuzwa yaazizagilira kovoolera avasaalisi kutura mu ihiiri yoosi kutumika ha vwali vwa yaali niyumbaka kali nivavula kutura ku vandu va Levi. Yavika amakono ku manda woosi wenya kutumika kuli musaalisi.

³⁴ Uvwoni yivu ku lovega lwilwe, vwaleeta liononywa ni lidivizwa lie liamiiha lilie ligali.