1 Avami 11 - KITABU KITAKATIFU

Solomoni yibaala ku Yahova

¹ Solomoni yayanza vakali vageni vanyingi. Komeeda ku mukaana wu mwami wa Egebeti, yaleeta vakali Vahiti kandi vakali kutura Moabu, Amoni, Edomu na Sidoni.

² Yavaleeta kali Yahova ni yaali niyalaga Avisiraeli vataleetana na vandu yava, kigira valakola Isiraeli kusigamira avanyasaye vandi.

³ Solomoni yaleeta vakali zimia saba, ma kandi yaali na vakali vaviika zimia zivaga. Vakali yava vagira Solomoni yibaala ku Yahova;

⁴ kandi kuduuka ku ing'inga ya yaali niyakaduuka musakulu, vagira nasigamiraavanyasaye vageni. Siyaali musuuvirifu ku Yahova Nyasaye weevemba, kuli baba weve Daudi mba.

⁵ Yasigamira Ashitarozi, nyasaye wikikali wa Sidoni, kandi Moleki, nyasaye wukuvihiliriza wa Amoni.

⁶ Yakola vwoni ku Yahova kandi siyaali wiligali kuye kuli baba weve Daudi mba.

⁷ Ku kiguru, Ivugwi wa Jerusalemi, yumbaka havundu hukusigamira Kemoshi, umunyasaye, wukuvihiliriza wa Moabu, kandi havundu hukusigamira Moleki, umunyasaye wukuvihiliriza wa Amoni.

⁸ Yumbakira vakali veve kandi havundu hukusigamira vanyasaye vageni kandi kusambira kimuli nu kuhaana visiuviliru ku vanyasaye vaavo.

⁹ Yahova yavihilira Solomoni ligali kigira mwoyo gwigwe gwaali nigugirung'ani kuzia ihale kutura ku Yahova, Nyasaye wa Isiraeli, waali waloleki kuye haali kaviri.

¹⁰ Kali Yahova ni yaali niyagaya Solomoni avuli kolonda vanyasaye vandi, siyagumira lilaga lia Yahova mba.

¹¹ Kunangwa Yahova yavolera Solomoni, “Kigira yili nilio liiva liilio kandi uvuli kugumira lilagana liange na malago gange, ga ndakulaga, ligali ndasa lanyia vwami vuvwo kutura ku ivi kandi mbuhaane ku mulala ku vatumikiri vovo.

¹² Kali ndio, kigira Daudi baba woovo, sindakola ndio mu ing'inga yi livamwoyo liilio mba. Ndavusalanyia kutura ku mukono gwu muyaayi woovo.

¹³ Nitali sindavusalanyia vwosi kutura kuyemba, navuzwa ndamuha hiiri ndala vuzwa kigira Daudi mutumikiri wange; kandi kigira lidaala linene Jerusalemi, lia mali kotovola live liange.”

Avasigu va Solomoni

¹⁴ Kunangwa Yahova yakola Hadadi, wi nyumba yu vwami vwa Edomu kugirung'ana kulwaana Solomoni.

¹⁵ Maziambiri lwa Daudi yaali naguuti Edomu, Joabu, munene wa mahi, yazia kunyavira. Joabu yita vasaza vosi mu Edomu.

¹⁶ Joabu na vandu va isiraeli vosi vamenya yo ku mieli sita, kuduuka lwa yaali niyakadiviza vasaza vosi mu Edomu.

¹⁷ Navuzwa Hadadi waali nakiri mwana muyaayi, yirukira Egebeti harara na vimiliri valala va Edomu, vaali nivatumikira baba weve.

¹⁸ Vaatura Midiani ni vazia Parani wa vasaza vandi viiyunga navo. Maku vaatura kuzia ku mwami wa Egebeti waha Hadadi inyumba, numulimi kandi naamuha viukulia.

¹⁹ Mwami wa Egebeti yayanzizwa na Hadadi ligali, ma naamusererizira amwavo mukali weve,

²⁰ Amwavo Tahapenesi yivulira Hadadi mwana muyaayi walangwa Genubazu, wa Tahapenesi yavirukizira munyumba yu vwami. Mwene yimwo, Genubazu yamenya harara na vana vu Mwami wa Egebeti.

²¹ Lwa makuva gaduukiraa Hadadi mu kivala cha Egebeti ndi Daudi harara na, Joabu, munene wa mahi vamali kukuza, Hadadi yavolera mwami wa Egebeti, “Leka nzirane mu kivala change.”

²² Mwami wa Egebeti yamuteeva, “Ni ki cha udaki ku kuduuka wenya wirane mu kivala chicho?” Hadadi yativura, “Kindu mba, navuzwa nuyanza leka nzie!”

²³ Nyasaye yakola Rezoni, muyaayi wa Eliada, kugirung'ana kulwaana Solomoni. Rezoni yaali niyiruki kutura ku mwimiliri weve mwami Hadadezeri wa Zoba;

²⁴ kandi yaali naagwiyi mwimiliri wu muganda gwa vavunagi va malago. Yaga gekoleka inyima wa Daudi yaali naguuti Hadadezeri kandi yaali niyiiti valina veve - avandu va Siria vamulwaanira. Rezoni na vasaza veve vazia nivamenya mu Damasiko wa avasaza veve vamukola Mwami wa Siria.

²⁵ Yaali musigu wa Isiraeli mu ing'inga yi livamwoyo lia Solomoni.

Lisuuviriza lia Nyasaye ku Jeroboamu

²⁶ Mundu wundi wagirung'ana Mwami Solomoni yaali mulala ku vimiliri veve, yaali Jeroboamu muyaayi wa Nebati, kutura mu lidaala lia Zeredahi mu kivala cha Efuraimu. Mama weve yaali mukunzakali walangwa Zerua.

²⁷ Yilu nilwo lugano lwi liebaala. Solomoni yaali niyumbaka imbinga kuolovega lwi ivugwi wa Jerusalemi kandi yaali nalomba hasasuguka mu madigi gi lidaala linene lia Jerusalemi.

²⁸ Jeroboamu yaali musoleri wi zinguru winyalizaa; kandi lwa Solomoni yalora kuli yayinziranga nuvugulu vwosi, yaamuvika alindi miyinzi jukunigwa josi mu kivala chi zihiiri zia Manase na Efuraimu.

²⁹ Lidiku lilala, lwa Jeroboamu yaali naatulanga Jerusalemi, muporofeti Ahija, kutura mu lidaala lia Shilo, yagana naye kunzira mu milimi, niyiviiki iganza imbia.

³⁰ Ahija yaatuliza iganza imbia ya yaali niyiviiki, nagitandula mu vidonye 12,

³¹ ma navolera Jeroboamu, “vugula vidonye likomi, kigira Yahova, Nyasaye wa Isiraeli, akovoleraa, ‘Nziza kutuliza vwami ku Solomoni na ndakuha zihiiri likomi.

³² Solomoni alatigala ni hiiri ndala kigira mutumikiri wange Daudi kandi kigira jerusalemi, lidaala lia mali kotovola kuva liange kutura mu kivala choosi cha Isiraeli.

³³ Nziza kokora ndio kigira Solomoni umali kusuura, kandi umali kusigamira avanyasaye vageni. Ashitarozi, umunyasaye wikikali wa Sidoni; Kemoshi, munyasaye wa Moabu; kandi Moleki, umunyasaye wa Amoni. Solomoni uvuli kumbulira; okoli vudamanu kandi uvuli kugumira malago gange kuli baba weve Daudi yakola.

³⁴ Navuzwa sindatuliza vwami vwosi kutura ku Solomoni, kandi ndamuviika mu vwamihi ing'inga yoosi lwaveeye mwoyo. Ndakora ndio kigira mutumikiri wange Daudi, wandatovola kandi wagumira malago gange.

³⁵ Ndatuliza vwami ku muyaayi wa Solomoni, ndahaana kuivi zihiiri likoni

³⁶ navuzwa ndaleka muyaayi wa Solomoni, na alindi. Ihiiri ndala, kunangwa ndava kazozo ni kisukururwi chu mutumikiri wange Daudi niyamiha mu Jerusalemi, lidaala lia inzi mali kotovola kuli havundu ha sigamirwa.

³⁷ Jeroboamu, ndakokola mwami wa Isiraeli, kandi ulamiha kivala choosi cha wenya.

³⁸ Niiva ulambulira inzi ligali, omenye kolondekana na malago gange, kandi onyoore livugilirwa liange ku likora ga ngulaga, kuli mutumikiri wange Daudi yakola, ndava niivi kazozo. Ndakokola mwami wa Isiraeli kandi ndore ndi visukululwi vivio vilamiiha inyima woovo, kuli mali kokolera Daudi.

³⁹ Kigira vwoni vwa Solomoni, ndahaana mageri ku visukululwi va Daudi, navuzwa sigaveeye ku zing'inga ziosi mba.’ ”

⁴⁰ Kunangwa Solomoni yaageriza kwiita Jeroboamu, navuzwa Jeroboamu yirukira nazia mu kivala chu Mwami Shishaka wa Egebeti kandi namenya yo kuduuka lwa Solomoni yakuza.

Likuza lia Solomoni

⁴¹ Vindu vindi viosi via Solomoni yakola, miyinzi jije, novogeri vwivwe viang'odwa viosi mu kitabu cha makuva gakale gi vikolwa vie livamwoyo lia Solomoni.

⁴² Yaali mwami mu Jerusalemi ku Isiraeli vosi ku mihiga 40.

⁴³ Yakuza kandi nayavirwa mu Lidaala linene lia Daudi, kandi muyaayi weve Rehoboamu yavugula vogono vwivwe kuli mwami.