1 Avami 10 - KITABU KITAKATIFU

Mwami wikikali wa Sheba Yageniha Solomoni

¹ Mwami wi kikali wa Sheba yahulira lusuma lwa Solomoni kandi yazia Jerusalemi kumugeriza na mateeva madinyu.

² Yazia harara nu muganda munene gwa vatumikiri, kandi ni zing'amia nizigingi mudalasini mwayu, izahabu inyingi ligali kandi magina guvuguli vonene. Lwa Solomoni yagana, nu mukali oyo yamuteeva mateeva goosi ga yaali anyala kuganaganyia.

³ Solomoni yagativula goosi. Sihaali ho ni kindu chaali kidinyu ligali kuvita ku Solomoni kwivaalamba.

⁴ Mwami wikikali wa Sheba yahulira vogeri vwa Solomoni, kandi nalora inyumba yu vwami ya yaali niyumbaka.

⁵ Yalora viukulia vialetwa ku mesa yeeye, zinyumba ziokomenya zia vatumikiri veve, lilohiza lia vayinziri vu munyumba yu vwami, kandi zinguvu ziafanana zia viviika, vatumikiri vamutumikira ing'inga ya masavo, kandi nisiuviliru via yahaana mu Litembeli. Gamukola ahugi nokogenya ligali.

⁶ Yavolera mwami Solomoni, “Ga ndahulira kuivi nimbeeye mu kivala change kandi vogeri vuvwo, gaveeye giligali!

⁷ Navuzwa sindaali nyara kusuuvira kuduuka lwa nzizi nokwelolera goosi inzi mwene mba. Navuzwa kali sindahulira kali inusu yago mba; vogeri vuvwo kandi nuvutugi vuvwo voveeye vunene ligali kuvita ga ndavoolerwa!

⁸ Maku ingavi ki ya vakali vovo vaveeye nayo. Kandi vatumikiri vovo vaveeye nayo vaveezaa nayo imbiri woovo kazozo, kuhulira livoora liovogeri liilio!

⁹ Yahova Nyasaye woovo yizominywi! Amali kumanyia kuli ayanziziywi kokokola ove mwami wa Isiraeli, kigira vuyanzi vwivwe ku vandu va Isiraeli voveeye vwukuhindira mihiga ni mihiga. Umali kokora ivi kuva Mwami kunangwa uduuki kulinda Lilaga nu vulungi.”

¹⁰ Yaaha mwami Solomoni vihaanwa via yaali naleti, kuvita zikilo 4,000 zie zahabu kandi mudalasini munyingi ligali kandi na magina guvuguli. Mudalasini gwu mukali uyu yaaha Solomoni gwali umunene kuvita gwa yanyoora ing'inga yindi yoosi.

¹¹ Zimeri zinyingi zia Huramu ziali nizileeti izahabu kutura mu kivala cha Ofura, zialeeta kandi misaala minyingi ni zimbaho zindahi na magina guvuguli kutura yo.

¹² Mwami Solomoni yatumikira misaala zana yijo kolomba zitiru zie Litembeli lia Yahova kandi zie inyumba yu vwami; kandi kolomba uvukana kandi na madienyi ga vimbi vatumikira. Kunangwa misaala minyingi kuli yijo jaali jikikiri koleetwa mu kivala cha Isiraeli anoho kololwa ku kandi mba.

¹³ Mwami Solomoni yaaha mwami wi kikali wa Sheba vindu viosi sa kilala via yateeva ahevwe, komeeda ku vihaanwa vindi via yaali naamuheeye kuturana ku vuhaani vwivwe vwu vwami. Maku oyo harara na vatumikiri veve viirana mu kivala cha Sheba

Uvutugi vwu mwami Solomoni

¹⁴ Vuli muhiga, mwami Solomoni yanyoora himbi zikilo 23,000 zie zahabu

¹⁵ komeeda ku vusuuru kutura ku vakiranyi kandi vukala kutura ku viasara kandi vusuuru vwatungwa na vami vosi va Arebia kandi vamiihi vi vivala via Isiraeli.

¹⁶ Solomoni yalomba zikuuti zinene zimia ziviri na yavaka zikilo saba zie zahabu ku vuli ikuuti.

¹⁷ Yalomba kandi zikuuti zingekeekezimia zivaga navaka sa ndala ni zikilo ziviri zie zahabu. Yavika zikuuti yizi ziosi munyumba yu Mulitu gwa Lebanoni.

¹⁸ Yalomba kandi endeve yu vwami. Lovega lulala lwayo lwafuumwa na miinu geenzogu no lovega lundi lwafunimwa izahabu indahi.

¹⁹ Endeve yu vwami zana yaali niviika sita na igulu wu mugongo gwayo yaali inzigingu. Amakono gaali ku zimbega ziombi ziu vwikaliru, ni kifananyi chi isimba nikisingiyi kunyasi kwa vuli mukono gwendeve.

²⁰ Zisimba 12 ziasingira kuviika sita, indala yasingira kunyasi kwa vuli lovega Endeve yu vwami kuli yiyi siyali niya lombwa ku mu vwami vundi vwosi mba.

²¹ Vikombe viukunwera mu viosi via Solomoni vialombwa ni zahabu kandi viju viosi Munyumba yo Mulitu gwa Lebanoni, vialombwa ku izahabu indahi enzere. Sichali ho chalombwa kutura ku ifeza mba, kigira ifeza siyaloleka kuva kindu chuvukala mu madiku ga Solomoni mba.

²² Solomoni yaali ni zimeri kunyanza Nene harara nizimeli zia Huramu. Vuli mihiga jivaga zimeri zizie ziranaa nizileeta izahabu, ifeza, amiinu gizinzogu, zingugi nivikondo.

²³ Mwami Solomoni yaali mutugi kandi mugeri ligali kuvita Mwami wundi woosi mu lirova,

²⁴ kandi vandu vosi vi lirova venya kuuza kuhuliriza vogeri vwivwe vwa Nyasaye yaali niyamuha.

²⁵ Vulii mundu waza, yamuletera vihaanwa, kuli; viju vie zahabu ni feza, ziganza, viugi, mudalasini, zibarasi, kandi zisukiri. Yaga gazizagilira vuli muhiga.

²⁶ Solomoni yaali na magare gu vulwani 1,400 kandi zibarasi ziuvulwani 12,000. Yavika zindala kuzio mu Jerusalemi na ziatigala ziosi yaazihila mu madaala manene gandi.

²⁷ Ing'inga yu vwamihi vwivwe, ifeza yaali vuzwa kuli ligina, mu Jerusalemi ni midaragwa jaali minyingi ligali kuli mikuyu ja kazozo mu vireremo vie vigulu vie Ivuyuda.

²⁸ Zibarasi ziu Mwami Solomoni zialetwa kutura Egebeti kandi kutura Kilikia.

²⁹ Valeta magare gwuvulwaani kutura Egebeti ku vuguli vwi vidonye viefeza 600 vuli lilala na ibarasi kuvuguli vwi vidonye 150 viefeza Vaziguliza kandi ku vami va hiti, na Siria ku vuguli vulala vwere.