1 Avami 1 - KITABU KITAKATIFU

Mwami Daudi mu vukungu vwivwe

¹ Mwami Daudi yaali musakulu ligali, kali niiva avatumikiri veve vamufuma ni milingedi, siyaali anyala konyoora uluuya mba.

² Kunangwa vatumikiri veve vamuvolera, “Munene wiitu wu lunyali, leka kukwenyere mukaana mugima amenye niivi kukutumikira nukukulinda. Alagona himbi ku ivi kandi akohe uluuya.”

³ Maku venyeleriza mu Isiraeli mwosi mukaana mugima wi ligondo lilahi, ma nivanyoora mukaana Abishagi mu lidaala lia Shunemu, nivamuleeta ku mwami.

⁴ Mukaana uyu yaali wi ligondo lilahi ligali; yalinda mwami kandi naamutumikira navuzwa mwami siyaali ku harara naye kuli musaza numukali mba.

Adonija yenya endeve yu vwami

⁵ Kalunu Adonija, wa mama weve yalangwa Hagizu, yiikuminya navoora, “Inzi ndava mwami.” Kunangwa yelombera amagare gu vulwani nizibarasi niyetegeka, na avasaza amusini kunyagula imbiri weve.

⁶ Navuzwa baba weve yaali nakikiri kumukubaku mate no kumuteeva, “Ukoli ndi kigira ki?” Adonija mwene yaali wiligondo lilahi ligali, na niyie walonda Abisolomu mu livulwa.

⁷ Vavugirizana na Joabu wa mama weve yaali Zeruya kandi na Abiazari musaalisi navo vavugilira kumwunga mukono mu lienya lilie kuva mwami.

⁸ Navuzwa musaalisi Zadoku, Benaya muyaayi wa Jehoyada, muporofeti Nazani, Shimei, Rei, harara na avasikari vukulinda Daudi sivali ku lovega lwa Adonija mba.

⁹ Lidiku lilala Adonija yahaana kisiuviriru cha magondi, zigiriki, kandi vimoli viakomelizwa ha Lwanda Enzoka, ahimbi ni kidaho cha Enirogeli. Yagenihiza vayaayi vandi vu Mwami Daudi, kandi na vimiliri vu mwami avaatura mu kivala chi Ivuyuda; kuuza mu lisavo lie visiuviliru yili,

¹⁰ navuzwa siyagenihiza amwavo weve Solomoni, Nazani umuporofeti, Benaya anoho avasikari valindi va Daudi mba.

Solomoni yakolwa mwami

¹¹ Maku Nazani yazia ku Bazisheba, mama wa Solomoni, namuteeva, “Ukikiri kuhulira ndi Adonija, muyaayi wa Hagizu, umali kwekola Mwami? Mwami Daudi siamanyi kindu choosi ku makuva yagamba!

¹² Kunangwa kalunu, mwaza ngohezanga iganagani uduuki kuhonya livamwoyo liilio kandi liu muyaayi woovo Solomoni.

¹³ Zia vwangu ku mwami Daudi na umuteeve, ‘Mwami wu luyali wange, siwasuuviriza inzi, oveeye mutumikiri ndi wowo muyaayi wange Solomoni alava mwami inyima woovo? Gaveeye ndi, Adonija yamiha?’ ”

¹⁴ Nazani yameda kovora, “Maku, lwa uvanokemoloma nu mwami Daudi naanzize mu nukudinyiriza amakuva googo.”

¹⁵ Kunangwa Bazisheba yazia kolola mwami mu keng'oze mwimwe. Daudi yaali musakulu ligali, na Abishagi, mukaana kutura Shunemu, yaali naamudendaa.

¹⁶ Bazisheba yinama hasi nasigamira mwami. Mwami yamuteeva, “Wenyaa ki?”

¹⁷ Yativura, “Mwami wu luyali wange, ivi mwene wasuuviriza inzi ku chisuuhu, mu lieta lia Yahova Nyasaye woovo ndi muyaayi wange Solomoni alamiiha inyima woovo.

¹⁸ Navuzwa Adonija umali kugwa umwami, na ivi siumanyi kindu choosi ku makuva yaga mba.

¹⁹ Adonija amali kuhaana kisiuviriru cha magondi manyingi, nizigiriki zinyingi kandi vimoli vinetu, naagenihizi avayaayi vovo, nu musaalisi Abiazari, na Joabu munene wi liihi, mu lilia lilie, navuzwa siagenihizi ku muyaayi woovo solomoni mba.

²⁰ Mwami wange, avandu vosi va Isiraeli vahenza ku ivi uvavoolere nivwaha uvugura ovogono vuvwo kuli mwami.

²¹ Niiva ulavula kokora ndio, nonoho lwukuza, muyaayi wange Solomoni harara ninzi kulavalizwa kuli vazami.”

²² Bazisheba yaali nakemoloma, lwa Nazani yaduuka muinyumba yu vwami.

²³ Mwami Daudi yavolerwa ndi muporofeti aveeye yo, kandi Nazani yazia mu keng'oze chu mwami yaali mu, naagwa hasi mamumama imbiri wu mwami.

²⁴ Maku yavoola, “Mwami munene wange, ivi umali kulandiza ndi Adonija alavugula vogono vuvwo kuli mwami, ma kandi alikala ku endeve yooyo yu vwami?

²⁵ Lidiku liene linu, uziiyi kuhaana kisiuviriru chi zigiriki zinyingi, nivimoli vinetu kandi amagondi manyingi. Yaali kogenihiza avayaayi vu mwami vosi Joabu munene wi liihi na Abiazari musaalisi. Kulwa kalunu valiza nivanwa harara naye nivavoora, ‘Ahindiri mwami Adonija!’

²⁶ Navuzwa siagenihizi inzi, kinga Zadoku musaalisi, anoho Benaya muyaayi wa Jehoyada kandi muyaayi woovo solomoni mba.

²⁷ Mwami ukavugiliyi vindu yivi viosi viekoleke, kandi nuuvula kovoolera avanene vovo nivwaha uvugura vwiyangu vuvwo kuli mwami naho?”

²⁸ Hene yaho mwami Daudi yavoola, “Langa Bazisheba yirane.” Naye yaza nasingira imbiri weve.

²⁹ Maku yamuvolera, “Ngusuuvirizaa ligali ku Yahova oveeye mwoyo, wambonyia kutura muvudinyu vwange vwosi,

³⁰ ndi lidiku liakalunu ndatwekiza lisuuviriza lia ndakwisuuhira mu lieta lia Yahova, Nyasaye wa Isiraeli ndi, muyaayi woovo Solomoni alavugula ovogono vwange kuli mwami.”

³¹ Bazisheba yinama hasi navoora, “Mwami wange ahindiri!”

³² Maku mwami Daudi yatumana Zadoku, Nazani na Benaya vaze kuye. Lwa vingira,

³³ yavolera, “Muzie harara na vimiliri vi Kiyaalo vange harara nu muyaayi wange solomoni naniini kuisukiri yange yene; na mumuhereke asulunguti kuduuka ha Kidaho cha Gihoni,

³⁴ aha gaduukanaa Zadoku na Nazani vamuvakiri maguta kuli mwami wa Isiraeli. Ahene yaho, mulakuba kisiriva na muhanzuki, ‘Ahindiri mwami Solomoni!’

³⁵ Maku mulamulonda kumwilanyia hano, lwa yaza kwikala kondeve yange yu vwami. Alavugula vwiyangu vwange kuli mwami. Uyu niyie wa inzi mali kotovola kuva mwamihi wa Isiraeli ni Ivuyuda.”

³⁶ Binaya yativura, “Galakolwa ndio, kandi Yahova Nyasaye woovo adinyirizi amakuva yaga.

³⁷ Kuli Yahova yaveyange nu Mwami wuluyali wange, ave kandi na Solomoni na akole uvwami vwivwe vove vwi lizizagilira imbiri kandi vwi limeedeka.”

³⁸ Kunangwa Zadoku musaalisi, Nazani muporofeti, Benaya muyaayi wa Jehoyada, kandi avasikari vukulinda uvwami vaanyinyia Solomoni kuisukiri ya Daudi kandi nivamuhereka kuduuka ha kidaho cha Gihoni.

³⁹ Zadoku yavugula lwiga lwa maguta ga Muzeituni ga yaali naleti kutura mu Lihema liukuvuganira mu na Yahova kandi navaka Solomoni. Vaakuba visiliva, kandi vandu vosi vahanzuka, “Ahindiri mwami Solomoni!”

⁴⁰ Maku vosi vamulonda nakumwilanyia, nivakuba isango nivahanzuka kigira uvusangari; nivakuba liyoga linene kali lirova ni lidegera.

⁴¹ Lwa Adonija na valina veve vaali nivamaraa lilia, vahulira liyoga yilio. Lwa Joabu yahulira kisiriva yateeva, “Liyoga yilio liosi liveeye na kivuni ki mu lidaala linene?”

⁴² Nakikiri kumala limoloma, Jonazani, muyaayi wu musaalisi Abiazari yaduuka. “Yingira!” Adonija yavoola, “Oveeye mundu mulahi; kuduuka ove oleeta makuva malahi.”

⁴³ Jonazani si yativulira, Adonija, mba. “Mwami wange Daudi akoli Solomoni kuva mwami.

⁴⁴ Yaali kutuma Zadoku, Nazani, Benaya kandi vasikari valindi vu vwami kumuhereka. Vamukoli yikare kuisukiri yu mwami mwene,

⁴⁵ kandi Zadoku na Nazani nivamuvaka maguta kuli mwami ha kidaho cha Gihoni. Maku vamanyi ni vazia mu lidaala linene, nivakubaa isango vudinyu nuvusangali, ma kandi kalunu avandu navo vakuba uluku. Yilio nilio liyoga lia mumali kuhulira.

⁴⁶ Solomoni aveeye mwami kalunu.

⁴⁷ Kuvita goosi, vimiliri vi kiyaalo vaziyi kwingira mu kwizominya mwami Daudi, nivavoora, ‘Nyasaye woovo anenehizi lieta lia Solomoni live linene kuvita liilio kandi uvwami vwivwe vove vonene kuvuvita vuvwo!’

⁴⁸ Maku mwami Daudi niyinama hasi ku kidali chiche nasaara, navoora ‘Gendi kwizominyi Yahova, Nyasaye wa Isiraeli, umali kokora mulala kuvo kulwivulu lwange kuvugura ovogono vwange kuli mwami; kandi okoli inzi mbe mwoyo kolola inguuva yiyi!’ ”

⁴⁹ Maku avageni va Adonija vaali nuvuti ligali, kandi vosi vasingira nivatura, sa mulala nazia kunzira yeeye mwene.

⁵⁰ Adonija, mu vuti vonene kigira Solomoni, yazia mu Lihema liukuvuganira mu na Yahova, nagumira vudinyu ku zinziga ziu ku vwali.

⁵¹ Mwami Solomoni yavolerwa ndi Adonija umutiiyi kandi agumiyi ku zinziga ziukuvwaali kandi ovooye, “Kutanga, nyenya mwami Solomoni anzisuuhiri ndi sialanzita mba.”

⁵² Solomoni yativura, “Niiva alava musuuvirifu, kali liisu lilala ku mutwi gwigwe sililadiirwa ku mba. Navuzwa navula kuva musuuvirifu, ligali alakuza.”

⁵³ Mwami Solomoni yamanya naatumana Adonija aleetwe kutura ku vwali. Adonija yazia ku mwami nasigama imbiri wu mwami, na mwami Solomoni yamuvolera, “Unyala kuzia yengo woovo.”