Tito 2 - La'aqtaqa Ñim Lo'onatac 'Enauacna 2013

Da napaxaguenataxanaxac maye talec 'enauac na shiỹaxauapi

¹ Qaq 'am, Tito, iuen da 'auapaxaguenataxanec ca ỹataqta nateeteguet da no'oita napaxaguenataxanaxac.

² Qonapega na ỹa'axaiquipi da ỹataqta ilotegue da llecỹaxac, qataq nllañi da lqopitaxanaqtaic qataq deuennataxaatelec da huo'o ca ỹo'ot. Qataq iuen da ỹauo'o da lpi'iỹaxac Ñim Lo'onatac 'Enauacna, qataq ỹauotec na laỹepi qataq huo'o da lhualaxavic.

³ Nache 'ena'am qonapega na ỹa'axaina'pi da ỹataqta quetelec da lataxac aca quetague' Ñim Lo'onatac 'Enauacna, qataq saishet da na'aqtaqa lo'o', qataq saishet da taxai. Nachaqrata da ỹachaxana ca no'on lataxac anam saxanaxa da ỹe,

⁴ qataq ỹapaxaguenec da ỹauotec ca lhua qataq caua llalqa.

⁵ Nataqa'en ishet da ỹapaxaguenec na laỹepi 'alpi da huo'o ca ỹacoolec qalaq ỹataqta deuennataxaatelec qataq ilo'ogue da lataxac qataq ỹaỹaten da ilo'ogue da lmayaxac qataq ỹalaxaguet ca lhua. Yaqto' saishet da qauem ca na'aqtaguec da la'aqtac Ñim Lo'onatac 'Enauacna.

⁶ Nataqa'en qonapega na nsoxoppi da ỹaỹaten da nllañi da qauem lqopitaxanaqtaic.

⁷ Qataq 'am ỹataqta 'auachaxana namayepi ca no'on 'aro'onataxanaxac. Da 'auapaxaguenataxaatac qalaq saishet da 'auasaguettac.

⁸ Qataq naua 'arapaxaguenataxanaxaco ỹataqta no'oite' 'anqa'en, yaqto' saishet da huo'o ca 'am quetapeguelec. Da 'auo'ot de'era sheetega, nache na'aloxon 'anqa'en nam qomi' ipa'agueeta'ape, nache saishet da huo'o ca qauem la'aqtac da qomi' ỹasaxaleguete.

⁹ 'auqata na 'amqaanataxanaxaicpi maye ñaq nlatacpi da ỹataqta ỹalaxaguet 'enauac na la'aqtacpi ca na'aco'. Qataq npogoxoinapegue' da ỹaỹamaxareeta ca na'aco' qataq saishet da ncotatague' camaye.

¹⁰ Qataq saishet da decache. Nachaqrata da ỹataqta npe'et, yaqto' 'enauac qaila'a da lyac da lapaxaguenataxanaxac Ñim Lo'onatac 'Enauacna maye Qarca'alaxaqui.

¹¹ Cha'aye ỹoqta 'eesa Ñim Lo'onatac 'Enauacna da ỹachaxana na shiỹaxauapi da lqouagaxanaqtaic maye chegaqaigui da nca'alaxa.

¹² Qaq de'era lqouagaxanaqtaic Ñim Lo'onatac 'Enauacna qomi' ỹapaxagueneque da 'enauac qolaqa'ai da qauem qarataxac qataq da qarqopitaxanaqtaic. Nache sachoq da achaalataxac da ntel-la't ca shiỹaxaua, qataq no'on da lataxac, qataq nañanot da quetague' Ñim Lo'onatac 'Enauacna.

¹³ Nataqa'en qomi' ỹapaxagueneque da qolaqtot da qarhuataxanaxac da seuataqta'aguet que'eca na'a'q maye qomi' qaỹachaxanapeguema, da ñe'eguelaq da nactaigui da llo'oxoyec So Qarataxala' Jesucristo maye Qarta'a, qataq Qarca'alaxaqui.

¹⁴ Somaye nañan co'ollaxa da qomi' ileualeguete, cha'aye nshetaique da qomi' nca'alaxateeguesopa na qauemsat, qataq qomi' iqui'itaxa't da ỹauo'oi qomi' lalamaqa'ate, qataq da yaqto' so'otaq ca ỹaỹamaqchiguiñi.

¹⁵ Qaq 'era qome da 'auapaxaguenataxanec 'arolec da 'ara'añaxac da 'aua'añaqchet qataq 'auaỹamaxaañi na 'amqaanataxanaxaicpi. Qataq qaica ca 'am nataỹaña.