Sofonías 3 - La'aqtaqa Ñim Lo'onatac 'Enauacna 2013

Na lasouaxashetpi ye Jerusalén

¹ ¡Choxoraxaso' 'am Jerusalén, huaqta'a't nỹecpi maye saỹalaq, ỹataqta 'am nshepaxan qataq huetaiya' 'anqa'en na 'araỹepi!

² Saishet da na'axaỹaxanalo co'ollaxa naua la'aqtaqa Ñim Nataxala', qataq saỹasateguet da qaỹapaxaguen; qataq saỹa'amaqten Ñimaye; qataq saishet da ỹe'eguenot Ñim Natamnaxala'.

³ Nam lataxala'pi qalaq 'eeta'am na llonpi da desoqtai'; qaq nam nmit ca nasouaxashet, qalaq 'eeta'am na qa'alaqpi maye huetauga na no'onaxa, maye saishet da no'onaxatañi ca 'oonolec lpi'inec da iviraxata'aguet ca lỹa na'a'q.

⁴ Qaq na la'aqtaxanaxanecpi ỹataqta qaica ca iren, qataq tenataxanaxaicpi, qaq na ltaxaỹaxanaxanecpi qalaq ỹataqta sairen ye atamnaqa', qataq saỹaỹamaxatapec nam lqataxacpi Ñim Nataxala'.

⁵ Qalaxaye Ñim Nataxala' hueta'a ne'ena huaqta'a't nỹecpi; Ñimaye ỹo'ot da no'on, qaq saishet da ỹo'ot ca qauem. Qataq nacheye ye nte'eta naua na'axa'te da ỹachaxan nam huotaique da ỹo'ot, Qalaxaye cam qauemaic qalaq ỹataqta saishet da ỹauatton cam na'agaxa.

⁶ Ñim Nataxala', 'eeta': «Aỹem selaxachigui co'ollaxa na ỹotta'a't shiỹaxauapi, qataq selaxachigui ana lalloxolatepi maye nalec na lpaqtaxanaxatpi, qataq so'otec da toteguelo naua nqa'aico, nache qaica ca shiỹaxaua da quetagueto naamaye. ¡Nache nam lalamaxat huaqta'a't nỹecpi ỹataqta toolec qaica da choche 'oonolec ca no'onañi!

⁷ Nache da iuennataxac, 'eeta': ‹Da sheetec de'era nache ye Jerusalén Aỹem ñi'iỹa qome, nache ỹaconeguet qome da sapaxaguen; yaqto' saishet da dolagui na lma'pi, cha'aye souaxat da Aỹem sauo'o da nhuaxanaguec.› Qalaxaye namayepi ỹataqta iỹala'a co'ollaxa da ỹo'ot na ỹotta'a't qauemsat.

⁸ Qaq ỹoqo'oye qauachiỹa'aguet qome que'eca na'a'q maye huaigui da qami' sataỹa'agueta. Aỹem Nataxala' 'era da ỹa'aqtac. Cha'aye mashe iuennataxa da llaỹona't na ỹotta'a't shiỹaxauapi, qataq na nta'alpi, da yaqto' talec ñaqa'en da ỹayeloxo, qataq dam ỹataqta 'eroigui ỹalemataic. ¡Qaq ỹataqta 'enauac qome ana 'alhua da nlachiguiñi souaxat cam le'eraxa da ỹayeloxo!»

⁹ «Qaq qom ivita que'eca na'a'q, nache sequi'itaxa't naua la'aqtaqa nam nhuo' le'ecpi, yaqto' 'enauac namayepi da Aỹem ỹo'oxoren qome, qataq 'oonolec ca lhuennataxac da Aỹem do'onataxanot.

¹⁰ Nache chegoqtapeguetague qome da le'ego ye tala Etiopía, nam nlagaxattac co'ollaxa ỹalamaxat nhuo' le'ecpi, da Aỹem nachoxonnot qataq da ndo'ota ana lachetaqtaxanaqtepi.

¹¹ Qaq que'eca na'a'q nache qaica qome ca 'am ỹa'aloqchettac, nam 'auo'otpi maye ỹo'ot co'ollaxa da Aỹem 'auataỹa'aguet, cha'aye 'am ñeqateeguesop qome na na'amqaanaxaicpi qataq na ño'oxonnaxaicpi, nache saishet da qaltaq ỹachaxaatac dam ño'oxonnaxac da hueta'a añim qui'itta ñeqasoxonaxa.

¹² Nache ño'onaxatañi qome na shiỹaxauapi maye choxoraq qataq huesota da lataxac, maye Aỹem ỹacheto'ot qome da naquitaxac.

¹³ Na no'onañipi maye lca'alaxaicpi nam nhuo' Israel le'ecpi, saishet qome da ỹo'ot na saỹaỹamaxañi lataxacpi, qataq saishet qome da ỹa'axattac nam saq 'enpi, qataq saishet da huetaigui na alap ca natenataxanaxac. Cha'aye namayepi qailotague' qome, nache da nmatec qalaq qaica ca ñe'etaique.»

Da no'onec souaxat da namaicỹaxac

¹⁴ ¡Qauo'onaxañi qami' huaqta'a't nỹecpi maye qoviita'a na Sión! ¡Qanlamaxareñi souaxat da qantonaxaqui, qami' Israel le'ecpi! ¡'Antonapigui', 'Am Jerusalén, ỹataqta imauec da 'arquiyaqteỹaxac da 'antonapigui'!

¹⁵ Cha'aye Ñim Nataxala' mashe ỹa'axaneguet da 'am nmittac, qataq mashe ỹo'orauec so 'ampa'aguenaxauapi. Ñim Nataxala', maye Nta'a na Israel, Ñimaye qami' netanguilo: qaq ỹoqo'oye saishet qome da 'añe'etaique ca camachaqca qauem.

¹⁶ Que'eca na'a'q qoỹenapega qome na Jerusalén qoỹeeta': «¡Saishet qome da 'añe'etac, 'am Sión, qataq saishet qome, da 'aua'aqta'a da qaica ca la'añaxa'c naua 'arhuaxaye!»

¹⁷ Cha'aye Ñim Nataxala' maye 'Anatamnaxala' qami' netanguilo; ¡Ñimaye ỹataqta 'añaxaic, nache 'am nca'alaxatec qome! Ñim Nataxala' ỹataqta machiguiñi qome souaxat da qoneta. Qaq do'ogoxona qome da lsoxoyec da naralaxat da 'anachaalataxac; Qaq souaxat da ntonaxac, nache do'onaxaatac

¹⁸ 'eeta'am ye na'a'q da huo'o ye naponaxac. Qaq Ñim Nataxala', 'eeta', da la'aqtac: «Aỹem 'am sesoueeguesop qome nam qauem maye 'am sairen, qataq dam 'ara'agaxa maye 'eco' 'am ipataqtañi.

¹⁹ Qaq que'eca na'a'q nache, Aỹem sepa'aiguet da sataỹa'aguet nam 'am saq ñaxaasheguem. Setauan qome aca qagueta maye huaỹotta qataq llaỹona't anam isomtac; nache nmeneguet ñaqa'en, da huo'o naq 'enec qataq llo'oxoyec, da huetalec ana 'alhua maye saiyacnapec co'ollaxa.

²⁰ Qaq que'eca na'a'q, qami' ñaueguereuo qome, nache qami' sataxana't; nache ñaralaxat cam qami' taleguete qana'achecỹaxaqui, qataq qami' sanema da qayo'oxoyiqui, qataq da qara'amaqchiqui, da qaualliquiitaigui nam shiỹaxauapi ana 'alhua. Qaq 'era da ỹa'aqtac Aỹem Nataxala'.»