Salmos 99 - La'aqtaqa Ñim Lo'onatac 'Enauacna 2013

Ñim Nataxala' nacheñi ñi nataỹaña 'enauacna

¹ Ñim Nataxala' nacheñi ñi Nta'a, añi nso'onaxaqui Ñimaye netanguilo soua ne'enaqtaqa le'enaxa't querubines, qaq na ỹotta'a't shiỹaxauapi ỹataqta iviloxol, qataq ana 'alhua ỹataqta cholaxan qome.

² Da la'amaqchec Ñim Nataxala' ỹataqta imattalec ye Sión, qataq nataỹaña 'enauac na nhuo' le'ecpi.

³ Ỹataqta qaỹo'oxoren qome da lta'araic qataq chaqaic le'enaxat Ñimaye. ¡Ñimaye ỹataqta qui'itta!

⁴ 'Am Nta'a 'añaxaic maye 'auauotec da nalochiguiñi lataxac, 'am, 'alapaxañi co'ollaxa da 'eeta'a't lataxac, qataq so Jacob 'auo'otec da nalochiguiñi qataq ỹaỹamaqchiguiñi lataxac.

⁵ ¡Qavio'oxoyiñi qome Ñim Nataxala' maye Qanatamnaxala', qataq qaua'ayiỹoto naua qarllectelli'! ¡Ñimaye ỹataqta qui'itta!

⁶ So Moisés qataq Aarón nache ỹalectaiguilo co'ollaxa so ntaxaỹaxanaxanecpi, qataq so Samuel ỹalectaigui co'ollaxa som ỹo'oxoreetac da le'enaxat Ñimaye. Qaq naxa somayepi da iỹaxanot Ñim Nataxala', nache Ñimaye ỹasateguet da lỹaxanaxac.

⁷ Ñimaye huetaigui co'ollaxa so lo'oc da detaqtague' somayepi, nache somayepi ipacchigui co'ollaxa nam lamaxasoxonaxacpi Ñimaye, qataq na lqataxacpi maye ỹanem somayepi.

⁸ 'Am Nataxala' maye Qanatamnaxala', 'am, 'auasateguet co'ollaxa da lỹaxanaxac somayepi. Qaq somayepi nache 'Am Natamnaxala' maye 'auchoxoren somayepi, na'aictaxa co'ollaxa da 'auo'ot da nhuaxanaguec souaxat na lasouaxashetpi.

⁹ Qavio'oxoyiñi qome Ñim Nataxala' maye Qanatamnaxala', qataq qaua'ayiỹoto naua qarllectelli' qom qoviita'a añi qui'itta nqasoxonaxa, cha'aye ỹataqta qui'itta Ñim Nataxala' maye Qanatamnaxala'.