Salmos 98 - La'aqtaqa Ñim Lo'onatac 'Enauacna 2013

Da ño'oxonnataguec da nalochiguiñi lo'onataxanaxac Ñim Nataxala'

¹ Qauo'oñi qome ca dalaxaic no'onec da qauo'onaxañiito'ot Ñim Nataxala', cha'aye Ñimaye ỹo'ot na huo'o da na'aalaxa, cha'aye na aloiguishec qataq qui'itta lhuaq ivira'a da doxonaxan.

² Ñim Nataxala' ỹa'axatec co'ollaxa da lca'alaqtaxanaxac, qataq ỹachaxaata da nalochiguiñi lo'onataxanaxac, ỹauaachigui naqa'en na ỹotta'a't shiỹaxauapi,

³ cha'aye sa icoua'ai da lauotaxanaqtaic, qataq da 'eesa la'aqtac maye ỹanem co'ollaxa na Israel le'ecpi. Nache 'enauac na hueta'alo naua loga'te ana 'alhua ỹauaachigui co'ollaxa da lca'alaqtaxanaxac Ñim Qanatamnaxala'.

⁴ Ỹataqta qauamaichiguiñi da qauo'onaxañiito'ot Ñim Lo'onatac 'Enauacna, 'enauac qami' maye qoñiitalec ana 'alhua, ỹataqta qanasheñetcheguem da qantonaxaqui, qataq qauo'oñi na no'onecpi.

⁵ Qauo'oñi na no'onecpi da qauo'onaxañiito'ot Ñim Nataxala', qauo'onaxañiita'ai' da l-lamaxa ana nvique arpa qauauoita'a da ỹotta'a't lavilỹaxac da no'onaxanaxac.

⁶ Ỹataqta qauamaichiguiñi da qauo'onaxañiito'ot Ñim Nataxala' maye Nta'a, qauo'onaxañiita'ai' da l-lamaxa ana nasheerepi.

⁷ Ỹataqta dauaxan qome aso auaxai qataq 'enauac na huetangui asomaye, ana 'alhua qataq 'enauac na netalecpi anamaye.

⁸ Qataq iuaxana't qome naua lhua'q na talapi, qataq ntonapigui' qome ana qasoxonaxapi,

⁹ qataq do'onaxaato'ot Ñim Nataxala', cha'aye mashe anac da nmit ana 'alhua, irolec qome da nalochiguiñi lataxac qataq ỹaỹamaqchiguiñi lataxac da nmit na nhuo' le'ecpi.