Salmos 97 - La'aqtaqa Ñim Lo'onatac 'Enauacna 2013

Ñim Nataxala' nacheñi ñi Nta'a

¹ Ñim Nataxala' nacheñi ñi Nta'a, ỹoqo'oye 'antonapigui' qome 'am 'alhua, qataq qami' qalota ỹaqauga 'alhuapiole qantoñiitapigui' qome.

² Na napalñi lo'oc coleesop Ñimaye, qataq da nalochiguiñi qataq da no'on lataxac, nachera da na'attalec da lo'onataxanaxac Ñimaye.

³ Na norec qalaq hua'auta'ague da taỹa'ague Ñimaye, nache ỹavigaxat na mpa'aguenaxauapi maye coleesop Ñimaye.

⁴ Na lqashelgaxa Ñimaye qalaq icoỹarelec ana 'alhua, nache ana 'alhua co'ollaq ila'a nache cholaxan.

⁵ Qaq ana qasoxonaxapi 'eeta'am ana dapic lapa da quiguiñi, co'ollaq nachaatec Ñim Nataxala', maye lalamaqte 'enauac ana 'alhua.

⁶ Na piguem ỹa'axatec da lo'onataxanaxac maye nalochiguiñi da lataxac, nache 'enauac na nhuo' le'ecpi ỹauaachigui da llo'oxoyec Ñimaye.

⁷ Nache 'enauac na atamnaxala'pi natamnot Ñimaye. Qaq huaña nache huo'o da la'aloxo 'enauac nam natameetacot na ne'enaqtac atamnaxala'pi nam ỹo'oxoreetac na atamnaxala'pi maye qaica ca naigui.

⁸ 'Am Nataxala', co'ollaq hua'axaỹa de'era ye Sión nache machiguiñi, qataq ye huaqta'a't nỹecpi ye Judá ntootapigui' souaxat naua ỹaỹamaqchiyiñi 'aro'onataxanaxaco.

⁹ Cha'aye 'Am Nataxala', maye 'Anataỹaña 'enauacna, 'am, 'anataỹaña 'enauac ana 'alhua, qataq 'anataỹaña 'enauac na laỹepi atamnaxala'pi.

¹⁰ Ñim Nataxala', ỹauotec nam saisheteguet na qauem, qataq mpaxattalec nam ỹataqta ỹalaxaguet Ñimaye, qataq ỹeltaxaneguet da lhuaqỹaxac nam qauemaicpi.

¹¹ Na yo'oqchiguiñi qalaq talec ca no'on da lataxac, qataq da namaicỹaxac talec ca ỹaỹamaqchiguiñi da lquiyaqteỹaxac.

¹² Qaq qami' maye no'on da qarataxaqui, qantoñiitapeguec qome Ñim Nataxala', qataq qavio'oxoyiñi da qui'itta le'enaxat Ñimaye.