Salmos 96 - La'aqtaqa Ñim Lo'onatac 'Enauacna 2013

Da dalaxaic no'onec da qaỹo'onaxaato'ot Ñim Nataxala'

¹ Qauo'oñi ca dalaxaic no'onec da qauo'onaxañiito'ot Ñim Nataxala', qauo'onaxañiito'ot Ñim Nataxala' 'enauac qami' maye qoñiitalec ana 'alhua.

² Qauo'onaxañiito'ot Ñim Nataxala', qataq huo'o naq 'enec qanqa'eñi da le'enaxat, qataq 'enauaque naua na'axa'te da qaua'axacheetac da lca'alaqtaxanaxac.

³ Qaua'aqtaxañim qome na ỹotta'a't shiỹaxauapi da llo'oxoyec, qataq qaua'aqtaxañim 'enauac na nhuo' le'ecpi na ỹo'ot da na'aalaxa maye ỹo'ot Ñimaye.

⁴ Cha'aye Ñim Nataxala' ỹataqta lta'araic qataq 'itchiguiñi da ishet da qaỹo'oxoren. Ñimaye ỹataqta huo'o da lchec napacalec 'enauac na laỹepi atamnaxala'pi.

⁵ 'Enauac na natamnaxala'pi na ỹotta'a't shiỹaxauapi qaica ca naigui, qalaxaye Ñim Nataxala', ỹo'ot co'ollaxa na piguem.

⁶ Qaq da lta'araic ño'oxoyec qataq da na'amaqchec hueto'ot Ñimaye. Qataq huo'o da la'añaxac qataq da lyacỹaxac yem lanataqa' Ñimaye.

⁷ Qaq 'enauac qami' nhuo' le'ecpi qaỹa'añim qome Ñim Nataxala', da na'añaxac qataq da ño'oxoyec.

⁸ Qataq qaỹa'añim Ñim Nataxala', da 'itchiguiñi llo'oxoyec da le'enaxat, qandoiuo ana qarachetaqtaxanaxache qataq qauanaiua'a ye nqasoxoc Ñimaye,

⁹ qataq qaua'ayiỹoto naua qarllectelli' Ñim Nataxala' da qoviita'a ye ỹataqta huo'o da lyacỹaxac lanataqa', qataq 'enauac na shiỹaxauapi da huo'o naq 'enec naqa'en Ñimaye.

¹⁰ Qataq qaua'aqtaxañim qome na ỹotta'a't shiỹaxauapi da: «Ñim Nataxala' nacheñi ñi Nta'a.» Ñimaye ỹa'ayiñi co'ollaxa ana 'alhua, da yaqto' saishet da deraỹai', qataq 'eeta'a't naqa'en da nmit na nhuo' le'ecpi.

¹¹ Qaq machiguiñi qome na piguem qataq ana 'alhua, qataq dauaxan qome aso auaxai qataq 'enauac na huetangui asomaye.

¹² Qataq machiguiñi qome na no'onaxa qataq 'enauac na huetalec namaye, qataq ỹa'alaqtai' qome da ntonaxac ana qo'oipaqpi maye netauga na aviaq.

¹³ Qauo'onaxañiitac qome cha'aye mashe anacta Ñim Nataxala', Ñimaye mashe anacta da nmit qome ana 'alhua, nache irolec da nalochiguiñi lataxac da nmit ana 'alhua, qataq da 'eesa lataxac da yaqto' nmit na nhuo' le'ecpi.