Salmos 94 - La'aqtaqa Ñim Lo'onatac 'Enauacna 2013

Ñim Nataxala' nacheñi ñi nmit 'enauacna

¹ 'Am Nataxala', maye ishet da 'apalaique ca nvi', 'Am Atamnaxala', ñaq 'anachaxan qome.

² Ña 'anachaañi qome, 'am maye 'anmit na netalec ana 'alhua, ña 'aỹa'anem ca 'itchiguiñi nhuaxanaguec na na'amqaanaxaicpi.

³ 'Am Nataxala', ¡Chaq laguio' da ỹaxaañi da le'enaxanaxac na 'etaxaloxoicpi!

⁴ 'Enauac ne'ena qauemaicpi ỹataqta na'amqaanaxaicpi, qataq taxaỹaxaicpi souaxat da na'amqaanaxac.

⁵ 'Am Nataxala', namayepi ỹataqta petapigui na 'aralamaxat nhuo' le'ecpi, qataq huetaiya' naqa'en nam 'aralamaxatpi.

⁶ Qataq ỹalauat ana pa'aipi qataq na chegaqauecpi, qataq ỹalauat na qaicaua caua lta'al.

⁷ Qataq ivira'a da 'enapec: «Ñim Nataxala' sa nauaañi, Ñim Natamnaxala' so Jacob saishet da nanoma de'era.»

⁸ Qaq ỹoqo'oye, qami' maye qaica ca qauaỹaañiỹapec, ña qauaỹaañiteguet qome de'era cha'aye qami' 'enaqaiqa ¿che laguio' da huo'o ca qauaỹachiñi?

⁹ ¿Peta'a sa hua'axaỹa qome de'era Ñim ỹo'o't naua ntela lauaco? Qataq ¿peta'a sa ila'a qome de'era Ñim ỹo'o't co'ollaxa naua na'ai'te?

¹⁰ Qataq ¿peta'a saisheto' da ỹo'ot qome ca nhuaxanaguecna, Ñim ishet da nmit na ỹotta'a't shiỹaxauapi, qataq ỹapaxaguenec da naỹaanec 'enauac na huetalec ana 'alhua?

¹¹ Ñim Nataxala' ỹaỹaten da lhuennataxac na shiỹaxauapi, da ỹataqta qaica ca naigui.

¹² Qaq ỹataqta machiguiñi qome ca shiỹaxaua maye 'auaỹamaxaañi 'Am Nataxala', cam 'aỹa'anema naua 'arapaxaguenataxanaxaco,

¹³ da yaqto' ỹe'emaqtac da ivita da nvi' caua na'axa'te maye huaiguilo da nhuogoxo. Qalaxaye ca qauemaic qaiqataxaatai' aca nshere maye laỹe'.

¹⁴ Qalaxaye 'Am Nataxala', saishet qome da qoca'ai na 'aralamaxat nhuo' le'ecpi, qataq saishet da 'andoxottec nam 'aralamaxatpi.

¹⁵ Maye nacherata da ca nmit na nasouaxashetpi, qalaq ỹe'eguelaxa qome da nalochiguiñi lataxac, qaq 'enauac na no'on da lataxac quelec qome damaye.

¹⁶ Qaq ¿negue't ca nachaañi co'ollaxa da aỹem iueelec da nqanaxat na 'etaxaloxoicpi? Qataq ¿negue'tom ca huetaua'a na ỹaỹe da aỹem itauan da nqanaxat na qauemaicpi?

¹⁷ Cha'aye da saishet taxa da aỹem itauan Ñim Nataxala', nache saqaỹaloq taxa da sootaigui da ntochiguiñi nleuaxa.

¹⁸ Qaq co'ollaq huo'o so huaña da sheeta': «Naua ỹapia'ate desalvi'.» Nache da 'archoxonnataxanaxa 'Am Nataxala', anac da aỹem itauan.

¹⁹ Qataq co'ollaq nquictauec da ỹaquicoxo, nache da 'ara'añaqtaxanaxac ỹo'ot da aỹem nlaqchigui da ñetonaxac.

²⁰ Cha'aye 'am, saishet da 'anauochaxaua na nta'alpi maye cachaxaicpi, nam ỹo'ot na sa ỹaỹamaxañi da yaqto' dataỹa'aguet na namaxasoxonaxacpi,

²¹ nam dataỹa'aguet na shiỹaxauapi maye no'on da lataxac, qataq ỹaneguet da l-leuaxa na qaica ca ỹasouaxat.

²² Qalaxaye Ñim Nataxala', nacheñi ñim ỹe'eguenaxala', qataq Ñim Ñatamnaxala', nacheñi ñi coma' maye aỹem mpaxattalec.

²³ Ñimaye ỹo'ot qome da maiche talec namayepi da lle'etaxaloxo, qataq nam qauemsat maye ỹo'ottac maiche nlaxaañi namayepi. Ñim Nataxala' maye Qanatamnaxala' ilaxachigui qome namayepi.