Salmos 92 - La'aqtaqa Ñim Lo'onatac 'Enauacna 2013

Da no'onec da qaỹo'ot da ño'oxonnataxanaxac

¹ ¡Ỹataqta 'onaxaic da 'am sho'oxoreetac 'Am Nataxala'! Ỹataqta 'onaxaic da so'ootac da 'are'enaxat, 'am maye 'Anataỹaña 'Enauacna,

² qataq da sa'axattapeguec da lta'araic 'arauotaxanaqtaic ye nte'eta, qataq ye pe, sa'axattac da 'arsoxoyec maye sa nquic,

³ sauota'a ana nvique qataq nasheere, qataq da huesotta l-lamaxa ana arpa qataq ana lira.

⁴ 'Am Nataxala', 'am 'auo'ot da ỹataqta samachiguiñi souaxat na 'auo'otpi, nam 'aro'onatacpi ỹo'ot da aỹem nlaqchigui da ñetonaxac.

⁵ 'Am Nataxala', ỹataqta ỹapac lta'araic na 'aro'onatacpi, qataq ỹataqta qaỹoqotchemeque naua 'arhuennataxaco.

⁶ Qaq ca qaica ca ỹaỹaanapec qalaq saỹaỹate'n, qataq saishet da ỹaỹaanegueta namaye.

⁷ Qaq na'aictoxo' da 'eeta'am na 'auaqpi da ñaxat na qauemaicpi, qataq da ñaxatec 'enauac na 'etaxaloxoicpi, qalaxaye namayepi taỹa'a da qailaxachigui.

⁸ Qalaxaye 'Am Nataxala', nache 'eetai' da qonetasheguema nam ỹataqta qaỹoqotcheguema.

⁹ 'Am Nataxala', ỹoqta 'eesa qome da imeuo na 'ampa'aguenaxauapi, qataq nlagaxattac qome 'enauac na qauemaicpi.

¹⁰ Qalaxaye 'am, 'anquigaxattauec qome da ỹa'añaxac sheeta'am ca huaca no'onaxa le'ec, qataq aỹem 'aucorelec ca 'arcoraxanaxat maye ỹataqta no'on da laitaỹaxac.

¹¹ Qataq sauaachigui qome da huañi na ñepa'aguenaxauapi, qataq sa'aqchigui qome da la'alaxac na qauemaicpi maye aỹem ipa'agueetacpi.

¹² Qaq ca no'on da lataxac qalaq dasovi 'eeta'am ana chaic, qataq nquictasheguem da lañaxataxac 'eeta'am ana cedro ye Líbano.

¹³ Qataq ñaxattalec ye lma' Ñim Nataxala', qataq dasovi da netaña ye nqasoxoc Ñim Qanatamnaxala'.

¹⁴ Qaq na'aictaxa da mashe togoshaapec qalaq huo'o da alaỹaxac, qataq nache 'eetai' da la'añaxac qataq daralata.

¹⁵ Da yaqto' ỹa'axattac da Ñim Nataxala' maye ipaqtaxanaxat, Ñimaye ỹataqta no'on da lataxac, qataq saishet da hueto'ot ca sa nalogoñi lataxac.