Salmos 91 - La'aqtaqa Ñim Lo'onatac 'Enauacna 2013

Ñim Nataxala' qomi' npaxattaleguete

¹ Ca shiỹaxaua maye huetaigui da ltelaqtaxanaxac Ñim Nataỹaña 'enauacna, nache Ñim Qaica ca Ỹaqalanapec ipelteetalec camaye.

² Qaq camaye da detaxaỹa Ñim Nataxala', nache 'eeta': «'Am, nache 'am ñaquitaxac, qataq 'am ỹe'eguenaxala', 'Am Ñatamnaxala', maye sepe'etega.»

³ Qaq nacheñita Ñimaye da ishet da 'am isoueeguesop aca nqoina maye saqcha'a, qataq naua napaxaco maye dalaataxana'ape,

⁴ cha'aye naua laua't Ñimaye 'am ỹapoleguete qome. Nache da qoueto'oto naamaye, nache ỹataqta 'avi'imaqtac. Qataq da 'eesa lataxac Ñimaye, nachera da 'am ntela'a qataq 'am npaxattalec.

⁵ Nache saishet qome da 'aye'etega na lcheeguesat ye pe, qataq ana checnapi maye huaỹotega't ye na'a'q,

⁶ qataq naua napaxaco maye quetaiguilo na napalaxa, qataq na napiina maye deque'emaqtaxan ye laiñi ye na'a'q.

⁷ Cha'aye na'aictaxa da mil ca ileu na pa'aỹa'ague na 'ane'emaq, qataq diez mil ca pa'aỹa'ague na 'oic, qalaxaye da qoneta ỹataqta qaica ca machaqca.

⁸ Nacherata da naua 'ara'ai'te ỹauaachigui qome da 'eetec da ỹaconeguet da nsheetenaguec na qauemaicpi.

⁹ Cha'aye mashe 'auo'ot da 'aye'eguenaxala' Ñim Nataxala', qataq da 'am npaxattalec Ñim Nataỹaña 'enauacna.

¹⁰ Nache saishet qome da 'am talec ca sa ỹaỹamaxañi, qataq ca nalolaxa saishet da nviraua'a ca 'arma',

¹¹ cha'aye Ñimaye 'am namaxa qome ca lamaxashecpi piguem le'ecpi, da yaqto' ntela'a 'enauac da 'icỹaxac.

¹² Nache ỹauota'aisalo naua lhua'q da 'am nachesheguem, yaqto' saishet da 'auquia'aqaisop ca coma'.

¹³ Qataq ishet da 'auapigui ca llon, qataq ca na'araxanaq, qataq ishet da 'auque'emaqchet ca shiguiỹac lta'araic qataq aca na'araxanaq late'e.

¹⁴ «Cha'aye ỹataqta Aỹem ỹauotec nache ñeca'alaxatec qome, qataq ñepaxattalec cha'aye ỹauattoota da ỹe'enaxat.

¹⁵ Qataq qom aỹem iỹaxana, nache sasateguet, qataq soota'aguet qom huo'o da nque'eenaxac, qataq ñeca'alaxatec qome qataq sanem da ño'oxonnataguec.

¹⁶ Qataq sanem da qaỹoqtec da nachaalataxac, qataq da ntootapeguec da ica'alaqtaxanaxac.»