Salmos 90 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna chochaq tatec

¹ 'Am Nataxala', nache 'am da qomi' 'ampaxattaleguete, 'enauaque naua vi'iye.

² Co'ollaq saxanaxa da huo'o ana qasoxonaxapi, qataq saxanaxa da yo'oq ana 'alhua qataq 'enauac na huetalec, chegoqchiguiña co'ollaq la'atchiguiñi 'enauacna, qataq ivitta'a ca pa'atec na'a'q, da nache 'amta da 'Am Atamnaxala'.

³ Qataq ca shiỹaxaua 'auo'otec da ỹe'eguelaxa da lsoche na 'alhua, da ivita da qoneta': «Qami' shiỹaxauapi, qavi'iguelaqỹa da qami' lsoche na 'alhua.»

⁴ Cha'aye caua mil vi'iye qalaq 'am, 'eeta'am 'anqa'en so na'a'q maye ỹoxogue shecait. Qataq 'eeta'am 'anqa'en ye 'oonolec pe.

⁵ 'Am, ỹataqta sa 'auren da 'auauogoleetac na shiỹaxauapi, namayepi 'eeta'am ca choche nchoxonaxac,

⁶ 'eeta'am ana huoue da ñaxat nache ye nte'eta ñaxatec ana lauoxo, qalaxaye da avit nquictañi da la'añaxac nache ivitta'a da deqaqa.

⁷ Da 'arayeloxo ỹataqta qomi' icolanaqche't, qataq da 'aralemataic ỹataqta qomi' imetreuo naqa'en.

⁸ Na qauemsat maye so'otaq qalaq 'auaỹateetac, qataq 'enauac na saqcha'a qarasouaxashetpi yo'oqta 'anqa'en.

⁹ Qaq souaxat da 'aralemataic nache imeuo 'enauac da qanachaalataxac. Naua vi'iye da qanachaalataxac 'eeta'am da 'oonolec qancosaueegue na na'at.

¹⁰ Da qanachaalataxac qalaq ivi' naua setenta vi'iye. Qaq na ỹoqta 'añaxaicpi qalaq ivi't naua ochenta vi'iye, qalaxaye da ño'oxonnaxac ca shiỹaxaua da qaỹoqtec da nachaalataxac, damaye ỹataqta qapa'atta qataq ỹauo'o da ndaxac qataq da no'onataxanaxac. Naua vi'iye sa qaỹaloq da imereuo, nache 'eeta'ama qomi'.

¹¹ Qaq ¿negue'tom ca ỹauatton da la'añaxac da 'aralemataic? Qataq ¿negue't ca ỹauatton da 'arayeloxo maye ỹo'ot da qarcolanaxa?

¹² Qaq ñaq qomi' 'auapaxagueneque qome da saỹatenaq da ñaloqtena'q naua qana'axa'te, yaqto' da qarauattonaxanaxac ishet da ivi' da naỹaanec.

¹³ 'Am Nataxala', ñaq qomi' 'añe'eguelaxalo, ña 'auchoxoren qome ne'ena 'aralamaxat 'aramaxashecpi.

¹⁴ Ñaq qomi' 'anlaxatchiguilo qome da 'arauotaxanaqtaic da ñaq nte'eta, yaqto' 'enauaque naua na'axa'te da qanachaalataxac da so'onaxanaqtai' da qantonaxac.

¹⁵ Ña qomi' 'aỹa'anema qome caua vi'iye maye huaiguilo da qaramaicỹaxac, maye 'eeta'ama soua vi'iye maye huaiguilo da qanque'eenaxac.

¹⁶ Ña ỹauaachigui 'anqa'en da 'aro'onataxanaxac na 'aramaxashecpi, qataq da 'ayo'oxoyec ỹauaachigui 'anqa'en qome cam chegoxoguetpi namayepi.

¹⁷ Qaq da lsoxoyec Ñim Nataxala' maye Qanatamnaxala', qomi' huetaleguete qome. Qataq nache 'eetai' qome da na'attañi naqa'en de'era qaro'onataxanaxac, Aja', nache 'eetai' qome na'attañi naqa'en de'era qaro'onataxanaxac.