Salmos 88 - La'aqtaqa Ñim Lo'onatac 'Enauacna 2013

Da 'eetec da qaiỹaxanaique da ltaunaxanaxac Ñim Nataxala'

¹ 'Am Nataxala', 'Am Atamnaxala' maye ica'alaxaqui, ye na'a'q qataq ye pe, 'am seỹaxaatacot da aỹem 'autauan,

² Ñaq 'auasateguet qome da ñeqouagaxaunaxac, qataq 'aua'axaỹa da iỹaxanaxac.

³ Cha'aye ỹataqta qalota na qauemsat maye aỹem talec, nache mashe sootaua'a na laỹe añi huachiqui.

⁴ Qataq mashe salectaigui qanqa'en na leuaxaicpi, sheeta'am ca mashe qaica ca la'añaxac.

⁵ Aỹem qaỹalata'a't, salectaigui na leuaxaicpi, sheeta'am ca ileuaigui ca alaataxac maye mashe qailareñi, cam mashe 'aucoua'ai cha'aye saishet da 'ampaxattalec.

⁶ Nache aỹem 'auasaxangui aca qaỹoqtegue nshere, acam qaỹoqchiguingui maye ỹataqta napalñi.

⁷ Qaq ỹataqta aỹem huetalec da 'aralemataic, nache 'auo'ot da ana lapaxa aỹem iyiiñi naqa'en.

⁸ Qataq 'auo'otec da aỹem ỹalat na ñauochaxauapi, qataq da aỹem deqaiga namayepi. Nache sheeta'am ca ncoñeteguishec maye saishet da datauec.

⁹ Naua ỹa'ai'te qalaq mashe huotaique da sa nauaayiñi souaxat da ñenoinaxac. Qaq 'enauaque naua na'axa'te da 'am seỹaxaatacot, 'Am Nataxala', 'am sachaxaato'oto naua ihuaxaye.

¹⁰ ¿Peta'a isheto' da 'auachaxana ca ỹo'ot da na'aalaxa na leuaxaicpi? ¿Peta'a isheto' da 'am ỹanot da na'achecỹaxac na leuaxaicpi?

¹¹ ¿Peta'a isheto' da qaỹa'axattac da 'arauotaxanaqtaic da huaña aca huachiqui, qataq da 'eesa 'arataxac da huaña ye lma' na leuaxaicpi?

¹² Cha'aye ye huaña na napalaxa, ¿peta'a isheto' da qaỹauatton na 'auo'otpi maye ỹo'ot da na'aalaxa, huo'otaq na 'auo'otpi maye ỹaỹamaqchiguiñi da lataxac, da huaña ca 'alhua maye qaica ca qaiuennatapega?

¹³ Ỹoqo'oye aỹem, 'am seỹaxaatacot da aỹem 'autauan, 'Am Nataxala', ye nte'eta qalaq 'am ñeqouagaxaueetacot.

¹⁴ Qalaq ¿ta'ainco' da aỹem 'auo'otan, 'Am Nataxala'? ¿Ta'ainco' ye aỹem 'oxocheesop da 'arashiguiỹaxac?

¹⁵ Cha'aye nache chegoqchiguiña co'ollaq ñaq aỹem nsoqolec, da huo'o da iuogoxo qataq huac da seleu, aỹem 'anamaxa na qalota ñeque'eenaxac qaq mashe sa ñalo'oguet.

¹⁶ Aỹem talec 'anqa'en da 'arayeloxo, qaq damaye mashe aỹem loxonec,

¹⁷ nache 'enauac ye na'a'q da aỹem coleesop 'eeta'am na 'etaxat, nache ivitta'a da aỹem ỹapolec.

¹⁸ Qataq aỹem ca'ai 'anqa'en na ñauochaxauapi qataq na ỹaỹepi, qaq nagui nda'a't da ñauochaxaua na napalaxa.