Salmos 87 - La'aqtaqa Ñim Lo'onatac 'Enauacna 2013

Da no'onec da qaỹo'onaxaalec ye Jerusalén

¹ So lo'oxonaxala' ye huaqta'a't nỹecpi maye lalamaxat Ñim Lo'onatac 'Enauacna, na'attalec añi qui'itta qasoxonaxa.

² Ñim Nataxala' ỹataqta ỹauotec na ñegueuopi ye Sión, da lauoche napacalec na lma'pi so Jacob.

³ ¡Qaq 'am Sión maye 'am lalamaxat Ñim Lo'onatac 'Enauacna, ỹataqta huo'o da 'ayo'oxoyec da 'am qaitaqtega!

⁴ Qaq Ñimaye, 'eeta': «Seuennata'a qome na le'enaxatpi na Aỹem ỹauattoota, Egipto, Babilonia, Filistea, Tiro, qataq na lma' ye Etiopía. Cha'aye 'enauac namayepi, lañoqo' co'ollaxa ye Sión.»

⁵ Qaq ỹoqo'oye na lma' ye Sión qome, 'eeta': «Ne'ena qataq de'era maiche lañoqo' yemaye.» Ñim Nataỹaña 'enauacna maiche ỹanalec namaye.

⁶ Qaq Ñim Nataxala', ỹerelec qome aca le'enaxat lmalate na nhuo' le'ecpi, 'eeta': «Ne'ena lañoqo' ye Sión.»

⁷ Qaq ne'ena 'onaxanaxaicpi qataq nvicnaxanaqpi, 'eeta': «'am, nache 'am chegoqchigui da ñetonaxac.»