Salmos 86 - La'aqtaqa Ñim Lo'onatac 'Enauacna 2013

'Am 'oonolec da 'Am Atamnaxala'

¹ 'Am Nataxala', ñaq aỹem 'aua'axaỹa qataq aỹem 'auasateguet, cha'aye huo'o da ỹachoxoyec qataq da iuenaxanaxa.

² Ñaq 'antela'a qome da ñachaalataxac, cha'aye aỹem ỹataqta 'am salaxaguet. Cha'aye nache 'Am Ñatamnaxala', qataq nache 'am da 'am sa'amaqteetac, ñaq 'anca'alaxatec qome ne'ena 'aramaxashec.

³ Ñaq aỹem 'auchoxoren qome, 'Am Nataxala', cha'aye 'enauaque naua na'axa'te da 'am seỹaxaatacot.

⁴ 'Am Nataxala', ñaq machiguiñi 'anqa'en da nachaalataxac ne'ena 'aramaxashec, cha'aye 'am ỹalamaqtot ñaqa'en da ñeqouagaxaunaxac.

⁵ Cha'aye 'Am Nataxala', 'am soxoraic qataq choxonnataxanaxaic, qataq lta'araic da 'arauotaxanaqtaic 'enauac na 'am iỹaxaatacot.

⁶ Ñaq 'aua'axaỹa qome da ñatamnaxac 'Am Nataxala', qataq 'aulo'oguet da ñeqouagaxaunaxac.

⁷ Da huo'o naxa da ñeque'eenaxac, qalaq 'am seỹaxanot, cha'aye 'am aỹem 'auasateguet naxa.

⁸ Cha'aye qaica ca lỹa atamnaxala' da 'am 'eeta'am, 'Am Nataxala', qataq qaica ca no'onatac da 'eeta'am na 'aro'onatacpi.

⁹ 'Am Nataxala', 'enauac na ỹotta'a't shiỹaxauapi maye 'aro'onatacpi, anac qome da 'am natamnot qataq ỹo'oxoreetac da 'are'enaxat.

¹⁰ Cha'aye nache 'amta da 'am 'amaqtaqaic qataq 'auo'ot nam ỹo'ot da na'aalaxa, qaq nache 'amta da 'Am Atamnaxala'.

¹¹ Ñaq aỹem 'auapaxaguenec da 'anqa'aicỹaxac, 'Am Nataxala', yaqto' ỹataqta salemaqtelec da shectague' damaye, qataq nalochiguiñi 'anqa'en da iquiyaqteỹaxac, yaqto' huo'o naq 'enec ñaqa'en da 'are'enaxat.

¹² 'Am Ỹataxala' qataq Ñatamnaxala', ỹataqta 'am semato'ot da iquiyaqteỹaxac da 'am sho'oxoreetac, qaq nache 'eetai' qome da sho'oxoreetac da 'are'enaxat.

¹³ Cha'aye ỹataqta lta'araic da 'arauotaxanaqtaic da sheeta, ỹoqo'oye aỹem 'anca'alaxateeguesop añi huachiqui.

¹⁴ 'Am Atamnaxala', na shiỹaxauapi na'amqaanaxaicpi qalaq aỹem iloquiaxan, na laataxanaxaicpi huaxaỹa't da nshetaique aỹem ỹalauat, qaq namaye ỹataqta saq taỹapigui lauel da qoneta.

¹⁵ Qalaxaye 'Am Nataxala', 'Am Atamnaxala', 'am nhualaxaunaxaic qataq 'am choxonnataxanaxaic.

¹⁶ Ñaq aỹem 'anamata'a qataq aỹem 'auchoxoren, ñaq 'aỹa'anem ca 'ara'añaxac ne'ena 'aralamaxat 'aramaxashec, ñaq 'anca'alaxatec ne'ena 'aỹa'alec.

¹⁷ Aỹem 'auachaxana qome ca la'anaxat da 'arauotaxanaqtaic, yaqto' da ỹauaachigui na ñepa'aguenaxauapi nache na'aloxon. Cha'aye 'Am Nataxala', aỹem 'aỹa'anem da 'artaunaxanaxac qataq aỹem 'aua'añaqchet.