Salmos 85 - La'aqtaqa Ñim Lo'onatac 'Enauacna 2013

'Am Nataxala' ñaq qomi' 'anca'alaxatrec

¹ 'Am Nataxala', ỹataqta huo'o da 'archoxonnataxanaxa co'ollaxa ne'ena 'aralamaxat 'alhua, cha'aye 'avi'eguelaxalec co'ollaxa da 'anauaxaỹaxaasheguem so Jacob.

² Qataq 'auapalaxat da lle'etaxaloxo na 'aralamaxatpi nhuo' le'ecpi, qataq 'enauac na lasouaxashetpi.

³ Qataq 'avia'axaneguet 'enauac da 'aralemataic, qataq 'anllañi da ỹataqta lta'araic 'annogoxonaxac.

⁴ 'Am Atamnaxala' maye qarca'alaxaqui, ñaq qomi' 'anca'alaxatrec, ñaq 'avia'axaneguet da 'aralemataic da shenaqta.

⁵ ¿Qalqo' chochaq tatec peta'a da qomi' 'aunotegalo? Qataq ¿chochaq tatec peta'a da 'aralemataic?

⁶ Qataq ¿saishet peta'a da qomi' 'avi'eguelaxatema qome da qanachaalataxac, da yaqto' na 'aralamaxatpi nhuo' le'ecpi 'am ntootapeguec?

⁷ 'Am Nataxala' ñaq qomi' 'auachaxanalo da 'arauotaxanaqtaic, qataq qomi' taleguete 'anqa'en da 'arca'alaqtaxanaxac.

⁸ Aỹem ña'axaỹaxana qome ca la'aqtac Ñim Nataxala', cha'aye Ñimaye ỹa'axatem qome da nlagaxayec na lalamaxat nhuo' le'ecpi, yaqto' namayepi saishet da ỹe'eguelaxa da lle'etaxaloxo.

⁹ Cha'aye Ñimaye ỹataqta saqaỹapeque da nca'alaxatec na huo'o naq 'enec naqa'en Ñimaye, yaqto' da llo'oxoyec nache 'eetai' da hueta'a ne'ena qana'alhua.

¹⁰ Da nauotaxanaqtaic qataq da 'eesa lataxac nauana't qome, da nlagaxayec qataq da nalochiguiñi lataxac qalaq napigoqtega't qome.

¹¹ Ana 'alhua qalaq ñaxaalec qome da 'eesa lataxac, qaq da nalochiguiñi lataxac qalaq chegoqtot qome na piguem da lmeenaxanaxac.

¹² Ñim Nataxala' qomi' ỹanema qome ca qaraỹamaxa, nache na qana'alhua huo'o qome da alaỹaxac.

¹³ Qaq da nalochiguiñi lataxac qalaq hua'auta'ague qome da llec Ñimaye, nache da lqauaxac ỹo'otegue qome da qanqa'aicỹaxac.