Salmos 83 - La'aqtaqa Ñim Lo'onatac 'Enauacna 2013

Da atamnaxac da qaiỹaxaataique da ltaunaxanaxac Ñim Lo'onatac 'Enauacna

¹ 'Am Ñatamnaxala', saishet qome da 'aue'enaxaatai', qataq saishet qome da 'añe'emaxat qataq da choche 'avi'imaqtom.

² Ña 'aumeten na 'ampa'aguenaxauapi maye 'am nquiỹatega, namayepi ỹataqta huotaique da 'am dataỹa'aguet.

³ Qataq ỹataqta sa nqalaate' da lapaxañi na 'eetapeguecpi, da yaqto' dataỹa'aguet na 'aralamaxat nhuo' le'ecpi, qataq detaxaỹapigui da dataỹa'aguet na 'ampaxattalecpi.

⁴ Qataq 'eeta': «Ña qauanaqui da yaqto' ỹataqta ñelaxataqchiguiñi ne'ena nhuo' le'ecpi, qaq yaqto' saishet da qaltaq qaiuennatapega da le'enaxat so Israel».

⁵ Nache namayepi 'eeta'am ca 'oonolec ỹale, da naỹamaxara't da 'am dataỹa'aguet.

⁶ Nam Edom le'ecpi maye netaigui na lpe'lpi, qataq na Ismael le'ecpi qataq nam chegoxoguetpi aso Agar, Moab,

⁷ Gebal, Amón, Amalec, qataq na filisteopi, qataq na lma' ye Tiro,

⁸ nache nataqa'en na asiiriopi da huaxaiguet namayepi, qataq itaunaua'a nam chegoxoguetpi so Lot.

⁹ Qaq namayepi 'aue'enaxatchigui qome da qonetec co'ollaxa so Madián le'ecpi, qataq da qonetec so Sísara qataq so Jabín co'ollaq huaña so la'auaxac Cisón,

¹⁰ soua nlachiyiñi co'ollaq huaña ye Endor, nache 'eeta'am na huaca la'atec da ỹaleeguet na 'alhua.

¹¹ Qaq nache qonetec qome na nalleppi 'amaqtaqaicpi, da qonetec co'ollaxa so Oreb qataq so Zeeb, qataq 'enauac na llalaqpi na nta'alpi, 'aue'enaxatteguet da qonetec co'ollaxa so Sébah qataq so Salmuná,

¹² maye nshetaique da ỹauo'o lalamaxat na 'auaqpisat na 'alhua, maye lalamaxat Ñim Lo'onatac 'Enauacna.

¹³ 'Am Ñatamnaxala', ñaq huaỹoxon qome 'anqa'en namayepi 'eeta'am ana huoue, qataq ana qo'oipaq laue deqaqta maye ỹaỹoxonaqchet na la'at,

¹⁴ qataq na norec da ỹavigaxat na aviaq, qataq na norec le'eraxa da ỹavigat ana qasoxonaxapi,

¹⁵ ña 'aucanapec qome namayepi, 'aurolec na la'at lta'araic qataq 'aucolanaqchet qome 'auroleguete naua la'a'che lta'al.

¹⁶ Ñaq 'auo'ot qome da la'aloxo namayepi, 'Am Nataxala', yaqto' namayepi ishet da iỹaxana da 'are'enaxat.

¹⁷ Qataq chochaq tatec qome 'anqa'en de'era la'aloxo namayepi, qataq nache lỹachiguiñi' qome de'era la'aloxo qom ileu.

¹⁸ Yaqto' namayepi ỹaỹateeta da nache 'Am Nataxala', qataq da nache 'amta da 'Anataỹaña 'Enauacna, maye 'aulo'ogue 'enauac ana 'alhua.