Salmos 82 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna nacheñi ñi nmit 'enauacna

¹ Ñim Lo'onatac 'Enauacna nachaañi da ilo'ogue da laponaxac na laỹepi atamnaxala'pi, nache huetangui namayepi da lapaxañi da lataxac da huo'o ca nmit.

² ¿Chaq laguio' da qaỹa'axañiiñi qami' da qauo'ocheetac nam lataxacpi maye saishet da 'eesa, qataq da qatauañiitac na qauemaicpi?

³ Ña qampaxacheelec taxa na qaica ca la'añaxac qataq na qaicaua caua lta'al, qataq qauo'ochec ca nalochiguiñi lataxac na choxoraqpi qataq na huo'o da lhuenaxanaxa.

⁴ Qaỹa'añim da huesochiguiñi na qaica ca la'añaxac qataq na choxoraq, qataq qaỹe'eltaxañeeguet na qauemaicpi.

⁵ Qalaxaye namayepi qaica ca ỹaỹaten, qataq qaica ca ỹaỹaanapec, cha'aye namayepi quetaigui na napalaxa, nda'a't da ỹacholaxaatac na na'attalecpi ana 'alhua.

⁶ Qaq aỹem mashe shenapec co'ollaxa da qami' atamnaxala'pi, 'enauac da qoñiita qami' llalaqpi Ñim Nataỹaña 'Enauacna.

⁷ Qalaxaye qaullivi qome, qoñiita'am ca camachaqca shiỹaxaua, qataq qoviỹañi qoñiita'am ca camachaqca nta'a maye 'etaxaloxoic.

⁸ 'Am Atamnaxala' ña 'anachaañi qome da 'anmit ana 'alhua, cha'aye nache 'am maye 'aralamaxat 'enauac na ỹotta'a't shiỹaxauapi maye huetalec ana 'alhua.