Salmos 81 - La'aqtaqa Ñim Lo'onatac 'Enauacna 2013

Da lauotaxanaqtaic Ñim Lo'onatac 'Enauacna

¹ ¡Qantoñiitapigui' da qauo'oñi da le'enaxat Ñim Lo'onatac 'Enauacna, maye nacheñi Ñim qara'añaxac! ¡Qaua'alaqaitai' da qavio'oxoyiñiitac Ñim Natamnaxala' so Jacob!

² Qauo'onaxañiita'ai' ana nasaquiaxanata da qauo'oñi na no'onecpi, qataq ana nvique arpa, salterio, maye ỹo'oxoraq da l-lamaxa.

³ Qataq qauashiiyigui ana peenaq lcoue da ivita da dalaxaic so ca'agoxoic, qataq da ivita da nlaqchigui so ca'agoxoic, maye huetoigui naxa da so'otaq da qarquia'axac.

⁴ Cha'aye nachera da lamaxasoxonaxac Ñim Natamnaxala' so Jacob maye ỹanem na Israel le'ecpi.

⁵ Qataq nachera da lapaxañi naỹamaxataxac, co'ollaq naỹamaxate' so José, co'ollaq ca'ai ye 'alhua Egipto. Qaq aỹem sa'aqchigui so nvilỹaxac maye sa saỹaaneguet, 'eeta':

⁶ «'Am ñeqateeguesop so 'aya'ac maye huetaleguete naua 'arallaco, qataq naua 'arhuaxaye da yaqto' saqallegueme da ỹache na qapa'atta.

⁷ Qaq co'ollaq huo'o da 'anque'eenaxac nache aỹem 'aỹaxana nache Aỹem 'am ñeca'alaxatec, qataq 'am sasateguet co'ollaq sootaigui se'eso lo'oc maye ỹalattapigui, qataq 'am she'eguen co'ollaq huaña so 'etaxat ye Meribá.»

⁸ Ña qana'axaỹaxañiỹa da iviraqtaxanaxac qami' nhuo' le'ecpi maye ỹalamaxatpi. ¡Da iyoxo' da aỹem qana'axaỹañiỹa qami' Israel le'ecpi!

⁹ Saishet qome da 'auauo'o ca 'anatamnaxala' chegaqauec, qataq saishet da 'anatameetacot ca ỹaqa'a atamnaxala'.

¹⁰ Aỹem, nachaỹem Nataxala' maye 'Anatamnaxala', maye 'am ñeqateeguesop co'ollaxa ye 'alhua Egipto, ñaq 'auauachigui na 'ap, nache ỹataqta 'am comaraxaic ñaqa'en.

¹¹ Qalaxaye ne'ena ỹalamaxat nhuo' le'ecpi saishet da aỹem hua'axaỹa, ¡na Israel le'ecpi saishet da aỹem ỹalaxaguet!

¹² Qaq ỹoqo'oye namayepi saxanec da quegue ca maiche 'eetapeguec, qataq maicheye ca lauela da ỹo'ot.

¹³ ¡Qamaq taxa da aỹem na'axaỹaxana ne'ena ỹalamaxat nhuo' le'ecpi! ¡Qataq da quetegue taxa da ñeqa'aicỹaxac ne'ena Israel le'ecpi,

¹⁴ nache sasaỹaloxon taxa da selaxachigui ne'ena mpa'aguenaxauapi, qataq sauo'o da nhuaxanaguec nam ipa'agueetacpi namayepi!

¹⁵ Nache na nquiỹatapega Ñim Nataxala', ỹe'eguenot taxa Ñimaye, qalaxaye chochaq tatec taxa da nhuaxanaguec namayepi.

¹⁶ Nache Ñim Lo'onatac 'Enauacna ỹanem taxa na lalamaxat nhuo' le'ecpi da chectac na ỹataqta no'on trigo, qataq ỹanem taxa na no'onaxa le'ec te'esaq lta'a lli'i da yaqto' saishet da iqouat.