Salmos 77 - La'aqtaqa Ñim Lo'onatac 'Enauacna 2013

Da qaiuennataxaalec na ỹo'otpi Ñim Lo'onatac 'Enauacna

¹ Ỹataqta ña'axannec da ivilỹaxac da seỹaxanot Ñim Lo'onatac 'Enauacna, yaqto' Ñimaye ishet da aỹem hua'axaỹa.

² Da huo'o da ỹaquicoxo qalaq ñimittaique Ñim Nataxala', qataq sachaxaato'oto naua ihuaxaye da ñeqouagaxaueetac ye pe, qalaxaye sa sanata ca ỹo'ot da ỹamaxayec.

³ Qaq naxa da tachigui ye iuel Ñim Lo'onatac 'Enauacna, nache ñeỹeetac da seuennataxaatac qalaq qaica ca ỹa'añaxac.

⁴ 'Am Nataxala' ỹataqta qaica 'anqa'en ca ỹo'ochaxa, qataq qaica ca ñaỹanqa', ivira'a da saishet da setaqa.

⁵ Qaq huo'o naxa da tachigui ye iuel soua hua'au' na'axa'te, qataq soua hua'au' vi'iye,

⁶ qataq tachigui naxa ye iuel da so'onaxaatac ye pe, nache seuennataxaatapeguelec de'era, nache ñenattapeguela't, sheeta':

⁷ «¿Peta'a chochaq tatec qome da denotac Ñim Nataxala', nache saishet da qaltaq ỹe'eguelaxa da qomi' nqouagueeque?

⁸ ¿Mashe imeuo peta'a da lsoxoyec? Qataq ¿mashe imereuo peta'a naua ỹa'n la'aqtaqa co'ollaxa?

⁹ Ñim Lo'onatac 'Enauacna, ¿peta'a mashe icoua'ai da lqouagaxanaqtaic? ¿Peta'a ỹataqta dalemata Ñimaye, nache saishet da huo'o ca ichoxoren?»

¹⁰ Qaq nagui da seuennataxaatac qalaq ỹataqta huo'o da lqui'ic ñaqa'en da Ñim Nataỹaña 'enauacna saishet da 'eeta'am so hua'autec lataxac da qomi' ilo'ogueta.

¹¹ Qaq nacherato' da seuennate, nam qaica ca 'ena'am da llo'oxoyec maye ỹo'otpi Ñimaye, nam ỹo'otpi co'ollaxa soua hua'au' vi'iye.

¹² Qataq seuennataxaalec 'enauac nam ỹo'otpi co'ollaxa Ñimaye, qataq sa'axatec 'enauac qome damaye.

¹³ 'Am Atamnaxala', ỹataqta qui'itte' naua 'aro'onataxanaxaco, ¿negue'tom ca lỹa Atamnaxala' da 'eeta'am da 'ara'amaqchec?

¹⁴ 'Am maye 'Aro'onatac 'Enauacna nache 'am da 'auo'ot na qaica ca 'ena'am da llo'oxoyec, qataq 'auauattonaxanaxanec co'ollaxa da 'ara'añaxac, na ỹotta'a't shiỹaxauapi ana 'alhua.

¹⁵ Qataq 'auauota'a co'ollaxa de'era 'ara'añaxac, da 'anca'alaxatec na 'aralamaxat nhuo' le'ecpi, nam llalaqpi so Jacob qataq so José.

¹⁶ 'Am maye 'Aro'onatac 'Enauacna, co'ollaq 'am ilo'ot na 'etaxat nache huo'o da lcolanaxa, qataq cholaxan na 'etaxat maye ỹataqta qaỹoqchiguingui,

¹⁷ nache na lo'oc na piguem anacot na auot, qataq ỹalachigui na piguem, qataq hueteguelo na lqashelgaxa.

¹⁸ Nache qaỹa'axaỹa na lalataxa Ñimaye, chemaqtapoigui ana daua'ache, nache ana 'alhua yo'oqchiguiñi souaxat na lqashelgaxa, nache ana 'alhua deraỹapec souaxat na nacholaxanaxa.

¹⁹ Nache 'auo'otegue so ñec huangui aso auaxai, nache 'aua'axasoxoolec na qalota 'etaxat, qalaxaye qaica da huo'o ca ỹanata so lliguiyiñi naua 'arapia'ate.

²⁰ Qataq 'auauecta'aguet na 'aralamaxat nhuo' le'ecpi, 'eeta'am 'anqa'en ana nlo qagueta, 'auachegoxotchiguilo soua Moisés qataq so Aarón.