Salmos 73 - La'aqtaqa Ñim Lo'onatac 'Enauacna 2013

Da lsoxoyec Ñim Lo'onatac 'Enauacna

¹ Ñim Lo'onatac 'Enauacna, ỹataqta soxoraic, ichoxoren na Israel le'ecpi, nam qui'itte' naua lquiyaqte.

² Cha'aye mashe hua'c da souañi, qataq saxanaqca qapio'olec nache sesalvi.

³ Cha'aye huo'o da iquiỹaxa na na'amqaanaxaicpi, qataq souaxat da nquictasheguem da lsallaxa na qauemaicpi.

⁴ Cha'aye namayepi ỹataqta no'oitom da nachaalataxac, ỹoqo'oye qaica da leetapigui lauel da ileu,

⁵ saishet da nque'etaxaatapigui da nque'eenaxac na laỹepi shiỹaxauapi, qataq sa nauane' da huo'o ca nque'eenaxac da 'eeta'am na laỹepi.

⁶ Qaq ỹoqo'oye da ño'oxonnaxac 'eeta'am da nqolaataña aca nqola, qataq da qaica ca iren 'eeta'am naqa'en aca lapoto.

⁷ Naua la'ai'te qalaq npoqtrec souaxat da chaxaraicpi, da lashiguiỹaxac qalaq yo'oqta na qauem lhuennataxacpi.

⁸ Qataq 'enaxanaxaicpi qataq qauema naua la'aqtaqa da ỹo'ot da loquiaxac, qataq ỹe'enai' ca lỹa, qataq ỹareetalec,

⁹ da detaqa qalaq quetega na piguem, naua la'aqtaqa qalaq queuotegueleguete ana 'alhua.

¹⁰ Ỹoqo'oye na shiỹaxauapi ỹo'oxoreetac, cha'aye saishet da ỹanata ca lasouaxashet namayepi.

¹¹ Qataq ivitta'a da 'enapec: ¿Ca 'eeteco' da ỹaỹaten de'era Ñim Lo'onatac 'Enauacna? ¿De'era saishet qome da ỹaỹaten Ñim Nataỹaña 'enauacna?

¹² Qaq 'era da 'eetec ne'ena qauemaicpi, da ỹataqta saishet da nque'eten, qalaq nquictasheguem da lsallaxa.

¹³ Qaq ỹataqta qaica ca naigui da qui'itta ñaqa'en añi iquiyaqte, qataq da qui'itte' ñaqa'en naua ihua'q da saishet da ỹashelgui ca qauem.

¹⁴ Cha'aye imauec ye na'a'q da aỹem qaiuaxaatac, qataq aỹem qaiuaxaatac ye nte'eta.

¹⁵ Qaq taxa da se'enaxat da lhuennataxac namayepi, nache sogote taxa da huo'o ca satenachet na 'aỹa'alaqpi.

¹⁶ Qaq co'ollaq sauotaique da saỹaten de'era, qalaq ỹataqta huo'o da lqalaic.

¹⁷ Qaq co'ollaq sevira da saigui ñi lma' Ñim Lo'onatac 'Enauacna, nache huaña da saỹaten ye taỹa'a qom imeuo namayepi.

¹⁸ Qaq cha'aye 'eesa da maiche 'aỹa'anaña co'ollaxa ye ỹataqta salvi, da yaqto' taỹa'a 'anqa'en da nlaguiñi.

¹⁹ Qaq choche nque'elaxatta qome da nlaguiñi namayepi, nache maiche nlaguiñi naqa'en da lcolanaxa namayepi.

²⁰ Cha'aye qom ivita da 'anachaañi 'Am Nataxala', qalaq qoneta'am ca do'ocheta maye cheta'ague da nlouec, nache ỹataqta 'auo'otan da saq'en lataxac namayepi.

²¹ Aỹem ỹataqta aỹem nlaqchigui co'ollaxa da ñiqui'ic añi iquiyaqte qalaq ỹataqta daỹalli,

²² souaxat da qaica ca saỹaanapec qataq da iualoxonaxac, nache sheeta'am ca shiguiỹac da 'am ñachatto'ot.

²³ Qalaxaye aỹem nache 'eetai' naxa da 'am soota'aguet, nache 'auacoota'a na aỹoiguishec ihuaq,

²⁴ qataq naua 'arqataxaco aỹem ỹauecta'agueta, qaq que'eca pa'atec na'a'q nache aỹem 'auaconeguet, da aỹem ỹo'oxoraq 'anqa'en.

²⁵ ¿Negue'tom ca neto'ot ñaqa'en na piguem? ¡Ye nache 'amta! Qaq da 'am sooto'ot nache qaica ca lỹa ñeqopittega ana 'alhua.

²⁶ Qaq da ỹo'ocỹaxac qataq iquiyaqteỹaxac qaica ca la'añaxac, qalaxaye Ñim Lo'onatac 'Enauacna ỹa'añaqchet añi iquiyaqte. Qaq Ñimaye nache 'eetai' da aỹem hueta'aguet.

²⁷ Qaq na 'am ca'ai qalaq taỹa'a da ileu, cha'aye 'am 'aulaxachigui qome na saishet da 'am ỹalaxaguet.

²⁸ Qalaxaye aỹem ñiquigueua'a Ñim Lo'onatac 'Enauacna, cha'aye nachera da ỹaỹamaqchiguiñi ñaqa'en. Cha'aye aỹem sacho'ot da ñaquitaxac Ñim Nataxala', yaqto' ishet da sa'axatec 'enauac nam lo'onatacpi Ñimaye.