Salmos 72 - La'aqtaqa Ñim Lo'onatac 'Enauacna 2013

Da 'eetec da qanatameelec ca nta'a

¹ 'Am maye 'Aro'onatac 'Enauacna 'aỹa'anem qome na nta'a, da ỹaỹamaqchiguiñi qataq nalochiguiñi 'arataxac.

² Yaqto' da nmit na 'aralamaxat nhuo' le'ecpi qataq na choxoraqpi, qalaq ỹo'otec da ỹaỹamaqchiguiñi qataq nalochiguiñi lataxac.

³ Qataq ana qasoxonaxapi ỹanem qome ca nlagaxayec na nhuo' le'ecpi, qataq ana comarelecpi ỹan ca no'on nataxac.

⁴ Qataq ca nta'a ỹo'otec qome ca nalochiguiñi lataxac na choxoraqpi, qataq nca'alaxatec na llalaqpi na huo'o da lhuenaxanaxa, qataq huetaiya' naqa'en na sa iyacnapec namayepi.

⁵ Qaq que'eca nta'a nache 'eetai' qome, da huo'o naq 'enec naqa'en da qoneta, qom ñaq huo'o añi nala' qataq ñi ca'agoxoic.

⁶ Qataq 'eeta'am qome na auot da ipettalec ca nanaxanaqa', qataq na sheue da ipettalec ana 'alhua.

⁷ Qataq caua na'axa'te maye huaiguilo da lo'onataxanaxac, da nta'a ỹataqta no'on qome da lataxac, qataq chochaq huañi da nlagaxayec, choche ivitta'a da qaica so ca'agoxoic.

⁸ Qataq imata'a't qome da ilo'ogue ana auaxai, chegoqchiguiña ye tala Éufrates, nache ivitta'alo naua loga'te ana 'alhua.

⁹ Qataq nañanot qome camaye na mpa'aguenaxauapi, maye netalec ye toolec 'alhua.

¹⁰ Qataq na nta'alpi maye lma' ye Tarsis qataq nam netalec ana ỹaqauga 'alhuapiole, qataq na nta'alpi maye lma' ye Sabá qataq ye Sebá, ndotega qome camaye na lachetaqtaxanaxatpi.

¹¹ Qataq 'enauac na nta'alpi ỹa'aroto naua l-llecte camaye, qataq 'enauac na ỹotta'a't shiỹaxauapi do'onataxanot qome.

¹² Cha'aye que'eca nta'a nca'alaxatec qome, ca choxoraq maye iỹaxaataique ca ntaunaguec, qataq ca deuenaxaatac maye qaica ca itauan.

¹³ Qataq ichoxoren ca choxoraq qataq ca deuenaxaatac, qataq nca'alaxatec da nachaalataxac na choxoraqpi.

¹⁴ Qataq nca'alaxateeguesop ca ipataqtañi qataq saiyacnapec namayepi, qataq da nloquiaxanataguec, cha'aye ỹaỹaten da ỹataqta huo'o naq naigui da nachaalataxac.

¹⁵ Qaq nache 'eetai' qome da nca'altauec que'eca nta'a, qataq qoỹanem na lcat oro maye chegaqa'a ye Sabá, qataq saishet qome da vi'iiguet da qanatameetalec, qataq 'enauaque naua na'axa'te da qaỹasaqtapeguelec da nchoxonnataguec.

¹⁶ Qataq chochaq huañi qome na trigo 'enauac ana 'alhua, qataq imattalec qome na trigo na pa'asheguem ana qasoxonaxapi. Qataq ana ala ñaxat qome 'eeta'am na huetalec ye Líbano, qataq ỹataqta qalota ana ala, 'eeta'am ana huoue maye no'onaxa lashe.

¹⁷ Qataq nache 'eetai' qome da sa imeuo da le'enaxat, qataq da na'aqtaguec nache 'eetai' qome 'eeta'am añi nala'. Qataq chegoqchigui qome da le'enaxat camaye, da 'enauac na ỹotta'a't shiỹaxauapi ỹaconeguet da nchoxonnataguec, qataq 'enauac namayepi da ỹamata'ac da machiguiñi.

¹⁸ Ỹataqta qaỹo'oxoren qome Ñim Lo'onatac 'Enauacna, Ñim Nataxala' maye Natamnaxala' na Israel le'ecpi, cha'aye nacheñita ỹo'ot na lta'araicpi maye ỹo'ot da na'aalaxa.

¹⁹ Nache 'eetai' qome da no'on da ỹo'oxoraic le'enaxat. Qataq 'enauac ana 'alhua imattalec da llo'oxoyec. ¡Aja' nache 'eetec!

²⁰ Qaq 'ena na tachiguiña da natamnaxac so David, maye llalec so Yesé.