Salmos 71 - La'aqtaqa Ñim Lo'onatac 'Enauacna 2013

Da natamnaxac so ỹa'axaiquiolec

¹ 'Am Nataxala', 'am she'eguenot da yaqto' aỹem 'ampaxattalec, saishet qome da 'auo'ot da ỹa'aloxo.

² Cha'aye ỹataqta no'on da 'arataxac, nache aỹem 'anca'alaxatec qataq aỹem 'ampaxattalec, aỹem 'aua'axaỹa qome qataq aỹem 'anca'alaxatec.

³ Aỹem 'ampaxaalec qome qoneta'am aca coma' maye ỹe'eguenaxaqui, acam coma' maye nache 'eetai' naxa da ỹe'eguenaxaqui. Ỹoqo'oye 'aỹa'an qome ca 'ara'aqtac da aỹem 'anca'alaxatec, cha'aye 'am qoneta'am aca coma' maye ỹe'eguenaxaqui.

⁴ 'Am Ñatamnaxala', ñaq aỹem 'anca'alaxateeguesop da lhuaqỹaxac na qauemaicpi, qataq da la'añaxac na laataxanaxaicpi, qataq loquiaxaicpi.

⁵ Cha'aye 'Am Nataxala', nache chegoqchiguiña, co'ollaq ñaq aỹem nsoqolec da ỹataqta 'am ipe'et qataq aỹem 'antela'a.

⁶ Cha'aye co'ollaq ñaq sootaigui na lauel aso ỹate'e, nache nale'ena da 'am sepe'etega. Qaq nache 'am maye ñañiguiñi 'anqa'en, qaq ỹoqo'oye nache 'eetai' qome da 'am sho'oxoreetac.

⁷ Qaq ỹataqta qalota co'ollaxa na aỹem ỹa'aalac, qalaxaye 'am maye nache 'am ỹe'eguenaxala'.

⁸ Ỹoqo'oye 'enauac ye na'a'q da 'am sho'oxoreetac, qataq da sa'axattac da 'ayo'oxoyec.

⁹ Qaq saishet qome da aỹem 'auo'otan qom mashe aỹem ỹa'axaiquiolec, qataq saishet da aỹem 'aualat qom mashe qaica ca ỹa'añaxac.

¹⁰ Cha'aye na aỹem ipa'agueetacpi qauema naua la'aqtaqa da aỹem detaqtega, qataq huaxaỹa't da aỹem detaqtapigui.

¹¹ Nache 'eeta': «Ña qaucañiỹapec qataq qauacoñiiua'a, cha'aye Ñim Lo'onatac 'Enauacna mashe ca'ai, nache qaica ca ishet da nca'alaxatec.»

¹² 'Am Ñatamnaxala', saishet qome da aỹem qaỹoqtaique 'anqa'en, sa 'anaỹaloxon qome da 'auanac da aỹem 'autauan.

¹³ Ñaq na'aloxoota'acra' 'anqa'en na aỹem ipa'agueetac, ña 'auauo'o qome da na'aloxonaxac na huotaique da aỹem ỹo'otec ca qauem.

¹⁴ Qaq aỹem qalaxaye nache 'eetai' qome da 'am ñaquitto'ot, qataq nache ñequigaxattauec da 'am sho'oxoreetac,

¹⁵ qaq 'enauac qome ye na'a'q da 'am sa'axattac, da nache 'am da qomi' 'anca'alaxatrec, qataq qomi' 'anema da ỹaỹamaqchiguiñi lataxac. Qaq na'aictoxo' da sa sevi' da saỹaten ca lcata damaye.

¹⁶ Qalaxaye sa'axattac qome na lta'araicpi maye 'auo'ot 'Am Nataxala', sa'axattapeguec qome da nachaq 'amta da no'on da 'arataxac.

¹⁷ 'Am Ñatamnaxala', nache chegoqchiguiña co'ollaq ñaq aỹem nsoqolec da aỹem 'auapaxagueetac, qaq nache ivitta'a nagui da sa'axattapeguec na 'auo'otpi maye ỹo'ot da na'aalaxa.

¹⁸ 'Am Ñatamnaxala', saishet qome da aỹem 'aualat, na'aictoxo' da mashe aỹem ỹa'axaiquiolec, qataq ỹapagaq na iqaic cha'aye sauotaique da shecto'ot da sa'aqtaxaateguem da lta'araic 'ara'añaxac ne'ena shiỹaxauapi, qataq ca ñaq natauo maye chegoxoguetpi namayepi.

¹⁹ 'Am Atamnaxala', da ỹaỹamaqchiguiñi 'arataxac ỹataqta iviro'ot na piguem, 'Am Atamnaxala' ỹataqta lta'araic na 'auo'otpi co'ollaxa, qaq ỹataqta qaica ca 'am 'eeta'am.

²⁰ Qaq na'aictoxo' da qalota co'ollaxa na aỹem 'auauanaqchetec, que'eenaxaguesat qataq na sa ỹaỹamaxañisat, qalaxaye qaltaq aỹem 'auachegoxotchiguiña qome, na qaỹoqchiguiña ana 'alhua da qaltaq aỹem 'anca'alaxatec,

²¹ qataq 'anquigaxatec qome da ỹa'amaqchec, qataq 'avi'eguelaxalec da aỹem 'aua'añaqchet.

²² Qaq aỹem 'am sho'oxoreetac qome, sauota'a ana nvique arpa qataq ana salterio, so'onaxaatalec da 'aupacchiguilo naua qona'ape, 'Am Ñatamnaxala' maye qui'itta Natamnaxala' na Israel le'ecpi.

²³ Ỹataqta samachiguiñi da 'am so'onaxaato'ot, cha'aye 'anca'alaxatec da ñachaalataxac.

²⁴ Qataq 'enauac ye na'a'q da sa'axattac, da ỹataqta nalochiguiñi 'arataxac, cha'aye na nmittaique da aỹem ỹo'otec ca qauem, ỹataqta nsomaxana't qataq huo'o da la'aloxo.