Salmos 68 - La'aqtaqa Ñim Lo'onatac 'Enauacna 2013

Co'ollaq dauegaxan na Israel le'ecpi

¹ Da nachaañi Ñim Lo'onatac 'Enauacna, nache na mpa'aguenaxauapi nlagaxattac, qataq datauec na nquiỹatega Ñimaye da ila'aguet,

² nache 'eeta'am na lmala'q da nlagaxat. Qataq quiguiñi 'eeta'am ana dapic lapa da tangui na norec, da huo'o Ñimaye nache qanauec na qauemaicpi.

³ Qaq na no'on da lataxac qalaq ntootapigui' da huo'o Ñim Lo'onatac 'Enauacna, Qataq ỹataqta nlaqchigui da ntonaxac, nache dasottac souaxat da ntonaxac.

⁴ Qauo'onaxañi da qavio'oxoyiñi Ñim Lo'onatac 'Enauacna, qauo'oñi na no'onec da qavio'oxoyiñi da le'enaxat. Qavio'oxoyiñi Ñim netalec naxa na lo'oc na piguem, qantoñiitapeguec Ñim Nataxala'. Qantoñiitapeguec da Ñimaye qami' hueta'agueta.

⁵ Ñim Lo'onatac 'Enauacna maye netaña añi qui'itta lalamaqte atamnaxaqui, Ñimaye nacheñi ñi lta'a na qaicaua caua lta'al. Qataq nacheñi ñi iueettapeguelec ana pa'aipi.

⁶ Ñim Lo'onatac 'Enauacna ỹanem ca lma' ca ndogoñi shiỹaxaua, qataq huesouec naqa'en ca ncoñeteguishec, nache ỹanem da qaica ca iueetac. Qalaxaye ca saỹalaq qalaq netalec naqa'en, ca 'alhua maye qaica ca ñaxaalec.

⁷ 'Am Ñatamnaxala' co'ollaq 'annoxonec, nache 'am natataueegue na 'aralamaxat nhuo' le'ecpi, nache qoquetalec ye toolec 'alhua,

⁸ nache na 'alhua cholaxan qataq na piguem anacot na auot. Nache Ñim Lo'onatac 'Enauacna ỹataqta cholaxan naqa'en añi qasoxonaxa Sinaí, Ñim Natamnaxala' na Israel le'ecpi.

⁹ 'Am Ñatamnaxala' 'auanacot co'ollaxa so lta'araic auot, nache na 'aralamaxat nhuo' le'ecpi ỹataqta nasamñi co'ollaxa, nache 'am 'aỹa'anem da la'añaxac.

¹⁰ Huaña nache ne'ena 'aralamaxat nhuo' le'ecpi nalec yi'iye lma'. Qaq 'am Ñatamnaxala' souaxat de'era 'arqouagaxanaqtaic, nache 'aỹa'anem na choxoraqpi na lhuenecpi.

¹¹ Ñim Nataxala' ỹan da la'aqtac, nache qalota na 'alpi na jec da ỹa'axatec de'era la'aqtac, 'eeta':

¹² «Mashe datauec so nta'alpi qataq so nalleppi.» Qaq ne'ena 'alpi maye hueta'a ne'ena nỹecpi, nache ỹanec na nhuotaxanaxat maye chegaqaigui ne'ena pa'aguenaxauapi.

¹³ Nam 'eeta'am ana laua na qoto' maye qalapaxalec na lcat plata, qataq na laue qalapaxalec na no'on lcat oro. Qalaxaye da qoñiita huo'o na no'onaigui na 'atetpi.

¹⁴ Qaq Ñim Qaica ca Ỹaqalanapec co'ollaq datauec naqa'en so nta'alpi, nache ana aloñi talec añi qasoxonaxa Salmón.

¹⁵ Ỹataqta qaỹoqotcheguemec ana qasoxonaxapi ye Basán, qataq qaỹoqotcheguemec ana lmilo.

¹⁶ Qami' qasoxonaxal maye qami' qaỹoqotcheguemeque, ¿ta'ainco' da ỹataqta qarquiỹaitega da qauloita'a, añi qasoxonaxa maye huotaique da netaña Ñim Lo'onatac 'Enauacna? Qaq Ñim Nataxala', nache 'eetai' qome da netaña añimaye.

¹⁷ Ñim Lo'onatac 'Enauacna ỹataqta qalota ana laigonapi maye nalaataxaquipi, qaq nache chegoqchiguiña añi qasoxonaxa Sinaí da netangui anamayepi da naỹa añi lalamaqte atamnaxaqui.

¹⁸ 'Am Ñatamnaxala', 'asheguema co'ollaxa na qaỹoqotcheguema da 'auauec na 'oxonecpi, nache 'auaconeguet ana lsheetenaxanaqte na shiỹaxauapi, qataq ivira'a na saỹalaq huo'o 'anqa'en añi isheeten.

¹⁹ Qaỹo'oxoren qome Ñim Nataxala', Ñim Qanatamnaxala' qataq qarca'alaxaqui, maye 'enauaque naua na'axa'te da ỹachetac na qaya'acpi.

²⁰ Ñim Nataxala', maye Qanatamnaxala' Ñimaye Lo'onatac 'Enauacna maye deca'alaqtaxan, qataq ishet da qomi' nca'alaxateeguesopa da nleuaxa.

²¹ Ñim Lo'onatac 'Enauacna ilaxachigui qome na lqaic na mpa'aguenaxauapi, na lqaic na queto'ot da ỹo'ottac na lasouaxashetpi.

²² Ñim Nataxala' 'enapec: «'Auachegoqchiguiña qome ye Basán da 'am ñe'eguelaxat, qataq 'auachegoqchiguiña ñaqa'en ye ỹataqta qaỹoqchiguiña, aso auaxai da 'am ñe'eguelaxatsheguem,

²³ da yaqto' nachilliguilo naua 'arapia'ate na ltago'q na 'ampa'aguenaxauapi, qataq na 'arelo pioxoppi, napilec qome ne'ena ntago'q.»

²⁴ 'Am 'Aro'onatac 'Enauacna, maye Ñatamnaxala' qataq Ita'a, añi 'aralamaqte atamnaxaqui qailota'a na inoicchiguiñi shiỹaxauapi maye ỹo'oxoreetac da 'ayo'oxoyec.

²⁵ Na do'onaxaatacpi hua'auta qaq na ivictapigui ana nvique nca'ataxaatauo. Qaq na qa'ampiolec huetangui na laiñi, iuaxaatagui ana lasaquiaxanatapi.

²⁶ Qavio'oxoyiñi qome Ñim Lo'onatac 'Enauacna da qalapoñiita'a't, Qavio'oxoyiñi Ñim Nataxala', qami' maye qauachegoqoiguet so Israel.

²⁷ Qaq somayepi datataueegue so chegoxoguetpi so Benjamín, qataq so qalota lataxala'pi ye Judá, Zabulón, qataq ye Neftalí.

²⁸ 'Am Ñatamnaxala', ña 'auachaxan da 'ara'añaxac, ña 'avi'eguelaxalec da 'auachaxan de'era 'ara'añaxac, maye sauanaqchigui co'ollaq qomi' 'autaua'n.

²⁹ Qaq souaxat añi 'aralamaqte atamnaxaqui maye naña ye Jerusalén, añim taỹa naxa na nta'alpi da 'am iroua'a na lachetaqtaxanaxatpi,

³⁰ nache 'aviraxato'ot ne'ena shiỹaxauapi, maye 'eeta'am na shiguiỹacpi da netaigui ana na'aate, maye 'eeta'am na ỹataqta yeloxoicpi toropi qataq na ỹotta'a't shiỹaxauapi maye 'eeta'am na huaca llalaqpi. Qataq 'auo'ot qome da 'am nmanot, nache 'am ndoua'a na lcat plata, qataq 'aulagaxat qome na ỹotta'a't shiỹaxauapi maye loquiaxaicpi.

³¹ Qaq ye Egipto le'ecpi namaq qome na ltaxaỹaxanaxanecpi, qataq ye Etiopía qalaq ỹanot da lhuaqỹaxac Ñim Lo'onatac 'Enauacna.

³² Qami' maye qauloitague' na netalec ana 'alhua, qauo'onaxañiito'ot qome Ñim Lo'onatac 'Enauacna, qauo'oñi ca no'onec da qavio'oxoyiñi Ñim Nataxala',

³³ ñim netalec na piguem, nam piguem maye nache 'eetai' co'ollaxa. Ñimaye qaỹa'axaỹa naqa'en da lavilỹaxac, dam ỹataqta 'añaxaic lavilỹaxac.

³⁴ Ñaq qauauattoñiita qome da la'añaxac Ñim Lo'onatac 'Enauacna, da la'amaqchec huetalec na Israel le'ecpi, qataq da la'añaxac iviro'ot na piguem.

³⁵ Ỹataqta huo'o da 'archec 'Am 'Auo'otapecna, da qoueta'a añi atamnaxaqui maye 'aralamaqte. Ñim Natamnaxala' na Israel le'ecpi ỹanem da la'añaxac qataq da lquesaxanaxa na lalamaxat nhuo' le'ecpi. ¡Qaq ỹataqta qaỹo'oxoren qome Ñim Lo'onatac 'Enauacna!