Salmos 64 - La'aqtaqa Ñim Lo'onatac 'Enauacna 2013

Da taỹa'a na qauemaicpi

¹ 'Am Ñatamnaxala', ña 'aua'axaỹa da ñachoxoc, 'ampaxattalec da nachaalataxac souaxat na chaqaic depa'aguenataxaatacpi.

² Aỹem 'oxocheesop na qauemaicpi, qataq nam saqcha'api maye lapaqteguiñi, aỹem 'anca'alaxateeguesop na lapaqtapiguiñi da ỹo'ot ne'ena qauemaicpi,

³ maye ỹaxaraic naqa'en ñi lachaxat 'eeta'am ca ỹeelonec, qataq da nasaxarec naua la'aqtaqa qalaq 'eeta'ama aca checna maye huo'o na lshenataxanaxa.

⁴ Qaq nache hueta'alo naua nqañoxotaqa'ate, da ỹaỹeetac na qaica ca ỹasouaxat, deque'elaqtaxan da huo'o na ỹaỹen qataq qaica ca lcolanaxa.

⁵ Ñi 'oonolec namayepi maiche ỹa'añaqchettac na lỹa, da yaqto' ỹo'ot ca qauem qataq detaqtega't da ỹo'ot ana lqoinapi maye ỹoxotchiguiñi. Qataq ipettega da qaica ca ishet da ỹauaachigui namayepi.

⁶ Qataq da qaica ca ishet da nmit na qauempi maye ỹo'ot namayepi. Qalaxaye Ñim ishet da ỹauatton ca saqcha'a lhuennataxac ca shiỹaxaua, Ñimaye ishet da nmit qome namayepi.

⁷ Ñim Lo'onatac 'Enauacna ique'emaqchet qome ỹauota'a aca lchecna, qataq ique'elaxat qome da ique'emaqchet.

⁸ Namayepi huañi qome souaxat naua maiche la'aqtaqa, qaq ca ỹauaachigui qome nache ỹe'eetac namayepi.

⁹ Huaña nache 'enauac na shiỹaxauapi huo'o naq 'enec naqa'en Ñim Lo'onatac 'Enauacna, qataq ỹa'axattac na lo'onatacpi, huaña nache qaỹaỹateeta na ỹo'otpi Ñimaye.

¹⁰ Qaq na no'on da lataxac ntootapeguec Ñim Nataxala', qataq nmittaique Ñimaye da yaqto' mpaxattalec, qataq 'enauac na ỹalleppi maye huo'o naq 'enec ỹataqta machiguiñi.