Salmos 61 - La'aqtaqa Ñim Lo'onatac 'Enauacna 2013

Qaipi'iỹa'a Ñim Lo'onatac 'Enauacna

¹ 'Am Ñatamnaxala', ñaq 'aua'axaỹa da ñachoxonnaxac, qataq 'auqocha'a da ñatamnaxac.

² Aỹem soota'a na pa'atec ana 'alhua da seỹaxaatac, cha'aye añi iquiyaqte mashe qaica ca la'añaxac, qaq aỹem 'anca'alaxatec qome, nache aỹem 'aỹa'analec aca qaỹoqotcheguemec coma',

³ cha'aye nache 'am maye 'am ỹe'eguenaxala'. 'am 'eeta'am ñaqa'en aca nalloxolate qaramta, maye mpaxateguet na ñepa'aguenaxauapi.

⁴ Cha'aye ñeshetaique da nache 'eetai' qome da sootaña ñi 'arma', nache aỹem mpaxattaleguete naua 'araua't.

⁵ Cha'aye 'Am, Ñatamnaxala', 'am 'aua'axaỹalo co'ollaxa naua san' ỹa'aqtaqa, qataq aỹem 'aỹa'anem na 'auqataxaatapigui' da 'aỹa'anem, na huo'o naq 'enec naqa'en da 'are'enaxat.

⁶ Ñaq 'aỹa'anem qome ne'ena nta'a da qaỹoqtec da nachaalataxac, qaỹoqteguelo 'anqa'en naua vi'iye da nachaalataxac,

⁷ qataq da lo'onataxanaxac da nta'a, nache 'eetai' qome da 'am hueta'aguet. Qataq da 'arsoxoyec qataq naua 'eesora 'ara'aqtaqa mpaxattaleguete qome.

⁸ Yaqto' nache 'eetai' qome da so'ootac na no'onec, da sho'oxoren da 'are'enaxat, qataq sepacteleguete naua ỹa'aqtaqa maye san' 'enauaque naua na'axa'te.