Salmos 6 - La'aqtaqa Ñim Lo'onatac 'Enauacna 2013

Da atamnaxac da huo'o da que'eenaxac

¹ 'Am Nataxala', saishet qome da aỹem 'anlaxa qom 'aunotac, qataq saishet da 'auauo'o ca ñeuaxanaguec qom huo'o da 'arayeloxo.

² 'Am Nataxala', aỹem 'auchoxoren qome cha'aye qaica ca ỹa'añaxac. 'Am Nataxala', aỹem 'anataren qome cha'aye mashe iviloxol da ỹo'ocỹaxac.

³ Ỹataqta aỹem iviloxolaqchet da icolanaxa, qaq 'Am Nataxala', ¿chaq laguio' da 'auanac da aỹem 'autauan?

⁴ Ña 'añe'eguelaq 'Am Nataxala', 'anca'alaxatec da ñachaalataxac, ñaq aỹem 'anca'alaxatec cha'aye lta'araic da 'arsoxoyec.

⁵ Cha'aye ca mashe ileu qalaq saishet da 'am iuennatega, qataq ca mashe huetangui aca huachiqui saishet da 'am ỹo'oxoreetac.

⁶ Aỹem ỹataqta ñasamiisop da ñenoinaxac, 'enauaque naua pesa'ache da ñeỹeetac, nache naua ỹache' ỹataqta dapapta naqa'en ye imala'.

⁷ Da ñiqui'ic mashe 'omaleguete naqa'en naua ỹa'ai'te, mashe nquictrañi da la'añaxa'c naua ỹa'ai'te souaxat na ñepa'aguenaxauapi.

⁸ Ñaq aỹem qauỹocheelec qami' maye qauo'ocheetac na qauem, cha'aye Ñim Nataxala' mashe hua'axaỹa da ñenoinaxac.

⁹ Ñim Nataxala' mashe hua'axaỹa da ñachoxonnaxac, Ñim Nataxala' mashe ỹasateguet da ñeqouagaxaunaxac.

¹⁰ Qaq 'enauac qome na ñepa'aguenaxauapi da huo'o da la'aloxo qataq lcolanaxa, nache sanaỹaloxon da datauec, souaxat da la'aloxo.