Salmos 59 - La'aqtaqa Ñim Lo'onatac 'Enauacna 2013

Ñim Nataxala' nacheñi ñi qomi' mpaxattaleguete

¹ 'Am Ñatamnaxala', ñaq aỹem 'antelaqna'aguet na ñepa'aguenaxauapi, qataq aỹem 'anca'alaxateeguesop na aỹem iloquiaxaatacpi.

² Ñaq aỹem 'antelaqna'aguet qome na ỹo'otta'ape naua qauema, ñaq aỹem 'anca'alaxateeguesop na laataxanaxaicpi,

³ 'Am Nataxala' ñaq 'aula'a na ỹalleppi 'añaxaicpi, huaxaỹa't da ỹoiqueetac da ñachaalataxac, na'aictaxa da qaica ca ñe'enaxac qataq qaica ca sasouaxat.

⁴ Qaq namayepi iỹalatapigui' da anac da aỹem iloquiaxan, qamaq qaica ca so'ot saỹaỹamaxañi. Ñaq 'anlouec, nache aỹem 'auanaỹa da yaqto' 'auauaachigui de'era.

⁵ Qaq 'Am Nataxala', Atamnaxala' maye Qaica ca 'Auqalanapec, maye Natamnaxala' na Israel le'ecpi, ñaq 'anlouec nache 'auauo'o ca nhuaxanaguec na ỹotta'a't shiỹaxauapi, saishet da 'auchoxoreetac ne'ena qauemaicpi qataq que'elaqtaxanaxaicpi.

⁶ Namayepi ñe'eguelaxauo ye pe nache dalacotac, 'eeta'am na pioq qataq coleeta'asop na huaqta'a't nỹecpi.

⁷ Nache nauoigui na alap na lcoche. Naua la'aqtaqa qalaq deque'emaqtaxa'n, nache 'eeta': «¡Qaica ca qomi' hua'axaỹalo!»

⁸ Qalaxaye 'Am Nataxala', choche 'alashetac namayepi, 'am 'aue'enai' 'enauac na ỹotta'a't shiỹaxauapi.

⁹ Qaq souaxat da la'añaxac na ñepa'aguenaxauapi, nache seuata'a qome da qoneta, 'Am Ñatamnaxala', cha'aye nache 'amta da aỹem 'ampaxattalec.

¹⁰ Qaq 'Am Atamnaxala', cha'aye aỹem 'auauotec, nache 'aua'auta'ague qome da sata'ague, yaqto' sauaachigui 'anqa'en da nanoxonaguec na ñepa'aguenaxauapi.

¹¹ Qalaxaye saishet qome da 'aualauat namayepi, yaqto' na ỹalamaxat ihuo' le'ecpi saishet da icoua'ai de'era. Nacherata da 'aurolec da 'ara'añaxac da 'aulagaxattac, qataq huetaiya' 'anqa'en. ¡'Am Nataxala', nache 'am maye 'am qarpaqtaxanaxat!

¹² Qaq ỹasouaxa't na maiche 'ena'ape namayepi, qataq naua nanoldec la'aqtaqa nache que'emaxama, souaxat da na'amqaanaxac, qataq souaxat da lsheunaxanaxac qataq latenataxanaxac.

¹³ Qataq 'aurolec da 'aralemataic, da imeuo 'anqa'en namayepi, ỹataqta nmichiguiñi 'anqa'en, yaqto' qaỹaỹateeta da Ñim Lo'onatac 'Enauacna nacheñi ñi Nta'a qataq ilotague' na chegoxoguet so Jacob, qataq ivira'a na netaleguete naua loga'te na 'alhua.

¹⁴ Cha'aye namayepi ñe'eguelaxauo ye pe, nache dalacotac 'eeta'am na pioxoppi, qataq coleeta'asop na huaqta'a't nỹecpi,

¹⁵ nache coleetac ilotaique ca aloq, qataq ỹa'alaqtac souaxat da saishet da icoma'.

¹⁶ Qalaxaye aỹem so'onaxaatac da 'am sho'oxoreetac ye nte'eta, qataq ña'axannec da ivilỹaxac da sa'axatec, da 'arsoxoyec qataq da 'ara'añaxac. Cha'aye nache 'am maye aỹem 'ampaxattalec, qataq 'am ỹe'eguenaxala' da huo'o da ñiqui'ic.

¹⁷ Nache so'onaxaatac da 'am sho'oxoreetac 'am Ñatamnaxala', cha'aye nache 'am 'auo'ot da ỹa'añaxac qataq aỹem 'ampaxattalec, nache 'Am Ñatamnaxala' maye aỹem 'arauotaxat.