Salmos 53 - La'aqtaqa Ñim Lo'onatac 'Enauacna 2013

Da qauem lataxac ca shiỹaxaua

¹ Na qaica ca ỹaỹaanapec, lhuennataxac da qaica Ñim Lo'onatac 'Enauacna, 'enauac namayepi da saỹaỹamaq, qataq 'enauac da ỹo'ottac na qauemsat, qaica da chochaq 'oonolec ca ỹo'ottac ca no'on.

² Qaq Ñim Lo'onatac 'Enauacna maye neto'ot na piguem namataña na shiỹaxauapi, cha'aye huotaique da ila'a da huo'o ca ỹaanataxanaxaic da nmittaique Ñimaye.

³ Qalaxaye 'enauac namayepi da dasheuec, qataq nache 'eeta'a't da sa ỹaỹamaq da lataxac. Nache qaica da huo'o ca ỹo'ottac ca no'on, qaica taxa da choche 'oonolec.

⁴ Qaq ỹataqta qaica ca laỹaanataxanaxac 'enauac na ỹo'ottac na qauem, nam chectac na ỹalamaxat nhuo' le'ecpi 'eeta'am da chec ca nallec, qataq saishet da iỹaxaatega da le'enaxat Ñim Lo'onatac 'Enauacna.

⁵ Qaq na'aictaxa da qaica ca ỹo'ot da lcolanaxa, qalaq namayepi iviloxolaqchet da lli'iỹaxa, cha'aye Ñim Lo'onatac 'Enauacna ilagaxattac na lpi'inecpi na depa'aguenataxaatacpi. Nache huo'o da la'aloxo cha'aye Ñim Lo'onatac 'Enauacna, saiuooneguet namayepi.

⁶ Qaq 'onaxaictaxa da chegoqchiguiña añi qasoxonaxa Sión ca lca'alaxa na Israel le'ecpi qom ivita da Ñim Lo'onatac 'Enauacna ỹe'eguelaxa da ỹaỹamaxaañi na lalamaxat nhuo' le'ecpi. Nache machiguiñi qome na chegoxoguet so Jacob, qataq 'enauac na Israel le'ecpi.