Salmos 52 - La'aqtaqa Ñim Lo'onatac 'Enauacna 2013

Da taỹa'a da na'amqaanaxac na qauemaicpi

¹ ¿Ta'ainco' da 'año'oxoreetapigui na 'aye'etaxaloxosat, 'am 'añaxaic? ¡Ye da lsoxoyec Ñim Lo'onatac 'Enauacna damaye nache 'eetai'!

² Qaq 'am nda'a't da 'auo'ottac na qauemsat, na 'arachaxat qalaq 'eeta'am da llaxa ca ỹeelonec,

³ qataq 'agaqnauec na qauem da 'auauotec, saq 'ena'am ca no'on, qataq 'auauotec ca shepegaxanaxac saq 'ena'am 'anqa'en ca 'eesa.

⁴ Qaq ñi 'arachaxat qalaq tenataxanaxaic, ỹoqo'oye 'anqopitalo naua na'aqtaqa maye deque'emaqtaxa'n.

⁵ Qalaxaye Ñim Lo'onatac 'Enauacna nataqa'en 'am ilaxachigui qome, Ñimaye 'am ỹaconeua'a qome, 'am ỹachegoxotchiguiña ca 'arma' da 'am ỹo'orauec, qataq nqat da 'anachaalataxac.

⁶ Qaq na no'on da lataxac qom ỹauaachigui de'era, nache ỹataqta huo'o da la'aalaxa, nache lashetac que'eca shiỹaxaua, 'eeta':

⁷ «Ña qauloỹa ñim saishet da nmitaique, da ỹe'eguenot Ñim Lo'onatac 'Enauacna, nacherata da pe'etega da lta'araic lsallaxa, qataq nache queto'ot da lle'etaxaloxo.»

⁸ Qalaxaye aỹem sheeta'am aca qo'oipaq olivo, maye darala da sootaña aca atamnaxaqui, maye lalamaqte Ñim Lo'onatac 'Enauacna, qataq nache 'eetai' da sepe'etega da lsoxoyec Ñimaye.

⁹ Qaq 'enauaque naua na'axa'te da 'am sho'oxoreetac, souaxat na 'auo'otpi qataq 'am sacheto'ot da ñaquitaxac da salectaigui na 'am quetague'pi, cha'aye ỹataqta 'am soxoraic.