Salmos 51 - La'aqtaqa Ñim Lo'onatac 'Enauacna 2013

'Am Ñatamnaxala' aỹem 'auchoxoren qome

¹ 'Am Ñatamnaxala', ñaq aỹem 'auchoxoren souaxat da lta'araic 'arsoxoyec, qataq 'auapalaxat na ỹasouaxashetpi cha'aye huo'o da 'arauotaxanaqtaic.

² Qataq 'auỹouec qome na ỹe'etaxaloxosat, qataq 'auỹouec na ỹasouaxashetpi.

³ Cha'aye aỹem ñaỹateetela't da ỹoqta sa salaq, na ỹasouaxashetpi qalaq ỹataqta saq ỹoxouga.

⁴ Qaq nachaq 'amta da 'am hueto'ot na ỹasouaxashetpi, aja', nachaq 'amta, cha'aye so'ot co'ollaxa na qauemsat, nam sa 'auaỹamaxaren da qaỹo'ot. Qaq ỹoqo'oye naua 'arhuaxanaxanaxaco ỹataqta nalochiyiñi, ỹataqta 'am saqaimaqpec da huo'o ca 'anmit.

⁵ Cha'aye saỹateeta da qauem da ỹañoxoc, nale'ena da aỹem 'etaxaloxoic, co'ollaq ñaq sootaigui na lauel aso ỹate'e.

⁶ Qataq saỹateeta da 'auauotec, da lquiyaqteỹaxac ca no'on ỹale, ỹoqo'oye saqcha'a 'anqa'en da aỹem 'aỹa'anem da ỹaỹaanec.

⁷ ¡Aỹem 'auqui'itaxatta qome, aỹem 'aurolec ana nquetegaxanaqte hisopo yaqto' aỹem qui'itta! ¡Aỹem 'auỹo yaqto' aỹem qui'itta, nache ñapacalec da lapagaxa ana aloñi!

⁸ ¡Aỹem 'anlaxatchigui qome da ñetonaxac, qataq ỹamaicỹaxac, aỹem 'avi'eguelaxatem qome da ỹamaicỹaxac, na'aictaxa da 'auo'ot co'ollaxa da ñeque'eenaxac!

⁹ Saishet qome da 'aulogui na ỹasouaxashetpi, qataq 'auapalaxat 'enauac qome na ỹe'etaxaloxosat.

¹⁰ 'Am Ñatamnaxala', ñaq aỹem 'aỹa'anaigui qome aca qui'itta nquiyaqte, qataq 'aỹa'anem so saqcha'a ica'alaxa da saq 'am ca'ai.

¹¹ Saishet qome da aỹem 'auỹotec qataq saishet qome da aỹem 'anqateeguesop so ỹataqta Qui'itta Saqcha'a 'Ara'añaxac.

¹² ¡Qataq aỹem 'avi'eguelaxatot qome da ñetonaxac maye chegoqchigui da 'arca'alaqtaxanaxac! ¡Qataq aỹem ỹa'añaqchet 'anqa'en qome so Saqcha'a 'Ara'añaxac maye huotaxanaqtaqaic!

¹³ Yaqto' sapaxaguenec qome da 'anqa'aicỹaxac na saỹalaq, yaqto' 'am ỹe'eguelaxa na 'etaxaloxoicpi.

¹⁴ Ñaq aỹem 'eltaxaneguet qome da salaataxan, 'Am maye 'Aro'onatac 'Enauacna, 'Am Ñatamnaxala' maye ica'alaxaqui, yaqto' da so'onaxaatac, nache sa'axattac da no'on da 'arataxac.

¹⁵ 'Am Nataxala', ña 'auauachigui na aỹap, yaqto' ishet da so'onaxan da 'am sa'axatec.

¹⁶ Cha'aye aỹem 'am sanot taxa aca nachetaqtaxanaqte, huo'otaq aca nachetaqtaxanaqte qaỹavigaxatta, qalaxaye 'am sa 'auaỹamaxaren.

¹⁷ Cha'aye ca nachetaqtaxanaxat maye 'auaỹamaxareeta da 'am qoỹanot nachera da saqcha'a nca'alaxa maye huo'o nque'eenaxac, 'Am Ñatamnaxala', 'am saishet da 'auo'otan aca nquiyaqte maye ỹataqta huo'o da nqui'ic.

¹⁸ Qataq 'auo'otec qome da ỹaỹamaqchiguiñi ye Sión, souaxat da 'arauotaxanaqtaic, qataq 'avi'eguelaxalec qome da 'anauaxaỹaxaasheguem so lpaqtaxat ye Jerusalén.

¹⁹ Huaña nache 'auaỹamaxareeta qome na nachetaqtaxanaxat maye ỹaỹamaqta da lataxac, qataq ana nachetaqtaxanaqte qaỹavigaxatta. Huaña nache ishet da qaỹachalec añi nca'atoxonaxalate, maye 'aralamaqte ca qoỹaneuo huaca llalec.