Salmos 5 - La'aqtaqa Ñim Lo'onatac 'Enauacna 2013

Da atamnaxac da nte'etom

¹ 'Am Nataxala', ñaq 'aua'axaỹalo naua ỹa'aqtaqa, ña 'aulo'oguet da ñachoxoc.

² Ñaq 'aua'axaỹa da ñachoxonnaxac, 'am ita'a qataq Ñatamnaxala', cha'aye 'am salamaxattot de'era ỹashelaxanaxac.

³ 'Am Nataxala', ye nte'etom qalaq 'aua'aqtega da ivilỹaxac, ye nte'etom qalaq 'am sanot da ñachoxonnaxac, ime nache seuattaique ca 'arasataxac.

⁴ Cha'aye 'Am Atamnaxala', saishet da 'auamaateguet ca qauem, qataq saishet da huetaua'a na 'araỹe na qauemaicpi,

⁵ qataq qaica ca lma' na na'amqaanaxaicpi da nachattaua'a ca qoueta'a, cha'aye saishet da 'auooneguet na 'etaxaloxoicpi,

⁶ qataq sa 'ausheteguet na que'elaqtaxanaxaicpi, qataq na laataxanaxaicpi, 'am 'anlaxaañi qome na shepecaicpi.

⁷ Aỹem, qalaxaye souaxat da ỹataqta lta'araic 'arsoxoyec, nache ishet da senoxoneua'a añi 'aralamaqte atamnaxaqui, qataq ishet da 'am sa'aroto naua illecte, da sootaigui añi qui'itta atamnaxaqui maye 'aralamaqte.

⁸ Qaq 'Am Nataxala', souaxat ne'ena ñepa'aguenaxauapi nache aỹem 'auauega qome da so'ot ca nalochiguiñi lataxac, qataq aỹem 'auachaxanegue ca nalochiguiñi 'anqa'aic.

⁹ Cha'aye namayepi saishet da 'eesora naua la'aqtaqa, qataq naua lhuennataxaco qalaq nda'a't na qauem, ana lqoichiqui qalaq 'eeta'am aca huachiqui nauattangui ñi lachaxat qalaq ỹataqta shepecaic.

¹⁰ 'Am Ñatamnaxala', ñaq 'auauo'o ca nhuaxanaguec namayepi, qataq saipaigui 'anqa'en nam qauemsat maye lapaqteguiñi, qataq 'auamaqauec souaxat na qalota lasouaxashetpi, cha'aye namayepi 'am dataỹa'aguet.

¹¹ Qalaxaye ỹataqta ỹa'amaqchiguiñi qome 'enauac na nmitta'a da 'am ỹe'eguenot, qataq machiguiñi da do'onaxaatac cha'aye 'ampaxattalec qataq machiguiñi qome 'enauac nam ỹauotec da 'are'enaxat,

¹² cha'aye 'Am Nataxala', 'auchoxoren ca no'on da lataxac, da 'arqouagaxanaqtaic qalaq coleesop 'eeta'am aca npaqtaxanaqte.