Salmos 48 - La'aqtaqa Ñim Lo'onatac 'Enauacna 2013

Da lyacỹaxac qataq da llo'oxoyec ye Sión

¹ Ñim Nataxala' ỹataqta 'amaqtaqaic, qataq 'itchiguiñi da ño'oxonnataguec da huaña yem huaqta'a't nỹecpi, maye lalamaxat Ñim Qanatamnaxala', qataq añim qui'itta nqasoxonaxa.

² Ỹataqta qaica ca 'ena'am da lyac ye lshequitcheguema añi qasoxonaxa Sión da huetaña na loga't da sheu', yemaye ỹo'ot da ntonaxac na netalec ana 'alhua. Yem lalamaxat nỹecpi ñim lta'araic Nta'a.

³ Ñim Lo'onatac 'Enauacna, hueta'a ñim nma' lta'araic ye Jerusalén, Ñim Lo'onatac 'Enauacna nachaxan co'ollaxa da nacheñi ñim qaica ca 'ena'am da ñe'eguenaxala'.

⁴ Ỹoqo'oye huo'o co'ollaxa so nta'alpi ỹo'ot so laponaxac, nache huaxaỹa't da qanqo'oneua'a yemaye,

⁵ qalaxaye co'ollaq ila'a yi'iye huaqta'a't nỹecpi, nache ỹataqta huo'o da la'aalaxa, nache saỹaỹaten ca 'eetec nache datauec.

⁶ Da lcolanaxa ỹataqta ỹalauat somayepi, nache huo'o da nqui'ic, 'eeta'am ana 'alo da deco'otapigui'.

⁷ Qataq 'eeta'am na la'at maye chegoxogue da yo'oxoñi, da nlaxaañi ana notaxaquipi maye quelec na 'etaxat maye lalamaqtepi na lma' ye Tarsis.

⁸ Yi'iye huaqta'a't nỹecpi maye lalamaxat Ñim Qanatamnaxala', Ñim Nataxala' maye Qaica ca Ỹaqalanapec, qaq qomi' ỹataqta sauanaqchigui qataq nachera da 'eetec naxa da qomi' qaỹa'axattapeguema. Ñim Lo'onatac 'Enauacna nache 'eetai' qome naqa'en yi'iye Jerusalén.

⁹ 'Am Qanatamnaxala', naxa da souaqtaigui na pa'auo añi atamnaxaqui maye 'aralamaqte, qalaq tachigui qarhuel de'era 'arsoxoyec.

¹⁰ 'Am Qanatamnaxala', 'enauac na huetalec ana 'alhua 'am ỹo'oxoreetac, cha'aye nachera da 'eetec da lataxac da 'are'enaxat. Qataq 'auo'onataxana da 'ara'añaxac da 'auo'ot da nalochiguiñi lataxac.

¹¹ Qaq ỹataqta ntootapigui' qome añi qasoxonaxa Sión, qataq parenaxaatac qome da ntonaxac na lma' ye huaqta'a't nỹecpi ye Judá, souaxat naua ỹaỹamaqchiyiñi maye 'auo'o't.

¹² Qauconñeetecoto qome naua loiguiye añi qasoxonaxa Sión, nache qaua'axacheetac qome naua nalloxolatel maye netaleguete añimaye,

¹³ nache qaumichiñeetac qome na npaqtaxanaxatpi qataq na nma' lta'araicpi, yaqto' ishet da qaua'axacheetapeguem qome nam dalaxaicpi maye ñaq taỹa'a da ñiguiñipi.

¹⁴ Da Ñim Qanatamnaxala', Ñimaye chochaq tatec. Qaq Ñimaye nache 'eetai' qome da qomi' ỹauecta'agueta.