Salmos 47 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna nacheñi ñi nta'a 'enauac ana 'alhua

¹ Qami' ỹotta'a't shiỹaxauapi, qauaxañiỹa't naua qarhuaxayilli', qavio'oxoyiñi Ñim Lo'onatac 'Enauacna qaua'alqaitai' da qantonaxaqui.

² Cha'aye Ñim Nataxala', Ñim Nataỹaña 'enauacna, Ñimaye ỹataqta huo'o da lchec, Ñimaye nacheñi ñi lta'araic nta'a 'enauac na huetalec ana 'alhua.

³ Ñimaye qomi' ỹanema da seloxogue na ỹotta'a't shiỹaxauapi, qataq da qomi' datato'oto na nhuo' le'ecpi.

⁴ Ñimaye iqataxanai' co'ollaxa yem ỹauotaique da qaralamaxat, maye ỹo'ot da llo'oxoyec so Jacob, som lauotaxat Ñimaye.

⁵ Ñim Lo'onatac 'Enauacna maye Nataxala' huenotsheguem, nache qaỹa'alaqtalec qataq qaỹashiiyigui ana nasheerepi souaxat da tonaxac.

⁶ ¡Qauo'oñi na no'onecpi, qauo'onaxañiito'ot Ñim Lo'onatac 'Enauacna! ¡Qauo'oñi na no'onecpi, qauo'onaxañiito'ot ñim qarta'a!

⁷ ¡Cha'aye nacheñi ñi nta'a 'enauac ana 'alhua! ¡Ỹoqo'oye qauo'oñi ca ỹataqta 'onaxaic no'onec da qauo'onaxañiito'ot Ñimaye!

⁸ Ñim Lo'onatac 'Enauacna ilotague' 'enauac na ỹotta'a't shiỹaxauapi, Ñim Lo'onatac 'Enauacna nso'ootangui añi qui'itta nso'onaxaqui.

⁹ Na 'amaqtaqaicpi maye lataxala'pi na ỹotta'a't shiỹaxauapi, huaxaiguet na nhuo' le'ecpi maye lalamaxatpi Ñim Natamnaxala' so Abraham.

¹⁰ Cha'aye Ñim Lo'onatac 'Enauacna lalamaxat nam 'amaqtaqaicpi maye huetalec ana 'alhua. Ñimaye nataỹaña 'enauac na huetalecna.