Salmos 46 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna qomi' hueta'agueta

¹ Ñim Lo'onatac 'Enauacna nacheñi ñi qomi' npaxattaleguete qataq nacheñi ñi qara'añaxac, Ñimaye sa naỹaloxon da qomi' itaua'n da souaqaigui da qarachetataic.

² Qaq ỹoqo'oye saishet da sho'oqtac, na'aictaxa da cholaxan ana 'alhua, qataq da hualolaguiñi ana qasoxonaxapi da tangui na laiñi aso auaxai,

³ huo'otaq da dellimigui aso auaxai qataq da nachaañi ana lapaxa asomaye, qataq da cholaxan naqa'en ana qasoxonaxapi da la'añaxac.

⁴ Na la'auaxac so tala ỹataqta machiguiñi naqa'en ye huaqta'a't nỹecpi maye lalamaxat Ñim Lo'onatac 'Enauacna, yem ỹataqta qui'itta lanataqa' Ñim Nataỹaña 'enauacna.

⁵ Qaq Ñim Lo'onatac 'Enauacna netangui na laiñi yemaye nache saishet da deraỹapigui', qaq da mashe yo'oxoñi nache Ñim Lo'onatac 'Enauacna itauan yemaye.

⁶ Qaq da da'axaỹaqtaxa'n naua la'aqtaqa Ñim Lo'onatac 'Enauacna nache cholaxan ana 'alhua, qataq ñi'i na ỹotta'a't shiỹaxauapi qataq ỹe'egora't na nta'alpi.

⁷ ¡Ñim Nataxala' maye Qaica ca Ỹaqalanapec, qomi' hueta'agueta! ¡Ñim Natamnaxala' so Jacob nacheñi ñi qaye'eguenaxala'!

⁸ Ñaq qauanaqui, ñaq qaumichiñi na ỹo'otpi Ñim Nataxala', maye ỹo'ot da na'aalaxa ana'ana 'alhua.

⁹ Ñimaye vi'iiguet naqa'en da alaataxac, ivira'a na alaataxac maye huañalo naua loga'te ana 'alhua, qataq huacaigui naqa'en na nchecnecpi qataq ana taquiaxaipi, qataq ỹasaxangui na norec ana naigonapi.

¹⁰ «¡Ñaq qañe'emaxache qome qauaỹaañiteguet da nachaỹem Atamnaxala'! ¡Aỹem ñataỹaña 'enauac na ỹotta'a't shiỹaxauapi qataq 'enauac ana 'alhua!»

¹¹ ¡Ñim Nataxala' maye Qaica ca Ỹaqalanapec, qomi' hueta'agueta! ¡Ñim Natamnaxala' so Jacob nacheñi ñi qaye'eguenaxala'!