Salmos 45 - La'aqtaqa Ñim Lo'onatac 'Enauacna 2013

Da no'onec da qaỹo'onaxaalec da laronaxac ca nta'a

¹ Ỹataqta 'onaxaiqa naua na'aqtaqa maye huetaiguilo da ñetoonaxac, ñi ỹachaxat qalaq, 'eeta'am ca leraxanaxat ca ỹaỹaten da leraxanaxac. Qaq nagui ñanoldec naua so'onaxaataueguelo ỹa'aqtaqa da sanema ñi nta'a.

² Da 'aryacỹaxac ỹataqta napacalec na laỹe ỹalleppi, qaq na 'ap qalaq chegaqaiguilo naua no'oñi na'aqtaqa, ỹoqo'oye Ñim Lo'onatac 'Enauacna nache 'eetai' da 'am huetalec naqa'en da lchoxonnataxanaxa.

³ ¡Ñaq 'auo'ogoxona da 'ara'amaqchec qataq da 'ayo'oxoyec, da 'ana'achigui ca 'ainec 'am 'añaxaic! ¡Cha'aye nachera da ỹo'ot da 'ayo'oxoyec!

⁴ Cha'aye de'era 'ayo'oxoyec nache chegoqchigui da queta da 'am 'añaxaic, souaxat da 'auetteguelec da 'eesa lataxac, qataq da huesota nataxac qataq da nalochiguiñi lataxac. Qaq na 'oiguishec 'arhuaq, qalaq ỹo'ot qome na lta'araic da llo'oxoyec.

⁵ Qaq ana ỹaxarai 'archecnapi 'am nta'a, ñaq ỹapacaviiguilo qome ana lquiyaqtepi na 'ampa'aguenaxauapi. Qataq huañi qome nache huetañoto naua 'archel na ỹotta'a't shiỹaxauapi.

⁶ Da 'aro'onataxanaxac 'am maye 'Aro'onatac 'Enauacna damaye chochaq tatec, qaq de'era 'aro'onataxanaxac damaye ỹataqta nalochiguiñi.

⁷ 'Am ỹataqta 'auauotec da no'on, qalaxaye 'auaỹemec da qauem. Qaq ỹoqo'oye 'am lca'ateua'a Ñim Lo'onatac 'Enauacna, Ñim 'Anatamnaxala', da 'am talec naqa'en da 'antonaxac, qaq saq 'ena'am na 'araỹepi.

⁸ Qaq 'enauac na 'ogoxot ỹataqta quichigui da laitaỹaxac na coraxat maye chegaqaigui ana mirra, áloe, qataq ana canela. Qataq da l-lamaxa ana nviquepi maye huo'oi naua lque'ete, ỹo'ot da 'antonaxac da qouetaigui ca nỹec lta'araic maye llo'oxoraxat na marfil.

⁹ Qaq ca 'aro'onataxanaqa' da 'am nta'a nache hueta'a ana llale na nta'alpi, qaq na pa'aỹa'ague na 'oic nache hueta'a aca nate'e, ỹaatañi ca no'otaxat maye chegaqaigui na oro.

¹⁰ Ñaq aỹem 'ana'axaỹaxana 'am ỹalole, ñaq 'ana'axaỹaxaachigui da shenapec: Ñaq 'aucoua'aisalo qome caua 'arta'al qataq ca 'arhuo' le'ecpi,

¹¹ cha'aye ñi'iñi nta'a ỹataqta nqopita da 'aryacỹaxac, qaq ñimaye nacheñi ñi 'arataxala', qaq no'on da 'aualaxaguet qome ñimaye.

¹² Cha'aye ana llalpi ye Tiro le'ecpi, qataq na ỹataqta sallaxanecpi, anac qome da 'am nda'a na lachetaqtaxanaxatpi da yaqto' 'auo'otec ca ỹaỹamaqchiguiñi.

¹³ Qaq ana llale ca nta'a mashe nnoxoneuo lỹateuo da lyacỹaxac, ỹaatrañi naua alogo maye chegaqaigui na oro.

¹⁴ Qataq na no'on llo'oxoraxat naua alogo da qaỹauegueua'a ñi nta'a, nache ca'attaueegue na qa'ampi maye nauochaxauapi anamaye.

¹⁵ Nache lỹateuo da lamaicỹaxac qataq da ntonaxac, da huenoxoneua'a ñi lma' lta'araic ñi nta'a.

¹⁶ Qaq na 'aỹa'alaqpi nachena qome na talec da lo'onataxanaxac so hua'au 'arta'alpi, namayepi ilo'ogue qome 'anqa'en 'enauac na 'alhua.

¹⁷ Qaq aỹem so'ot qome da nache 'eetai' da lhuennataxat da 'are'enaxat 'enauac ca dalaxaic shiỹaxauapi, ỹoqo'oye 'enauac qome na ỹotta'a't shiỹaxauapi da chochaq tatec da 'am ỹo'oxoreetac.