Salmos 44 - La'aqtaqa Ñim Lo'onatac 'Enauacna 2013

Da atamnaxac da qaiỹaxaataique ca ltaunaxanaxac Ñim Lo'onatac 'Enauacna

¹ 'Am maye 'Aro'onatac 'Enauacna, qomi' sa'axasoqchigui co'ollaxa so qarta'alpi, da qomi' ỹa'axattapeguema ne'ena 'auo'otpi co'ollaxa, se'esoua na'axa'te maye huetoiguilo soua hua'au' vi'iye.

² Co'ollaq 'auauota'a na 'arhuaq da 'auo'orauec so ỹotta'a't shiỹaxauapi, nache 'auauo'o da nhuaxanaguec somayepi, huaña nache so lma' somayepi 'aỹa'analec so qarta'alpi.

³ Cha'aye saishet da nachera da lhuaqỹaxac, qataq so lainecpi so chegoqchigui da dauegaxan, somayepi saishet da maiche loxonec ne'ena 'alhua, maye nacherata da 'arhuaqỹaxac qataq da 'ara'añaxac, qataq da 'are'eraxa cha'aye 'auauotec somayepi.

⁴ 'Am Ñatamnaxala' ¡'am maye nache 'am ita'a! Nache 'am maye 'aỹa'anem da loxonaxanaxac so Jacob.

⁵ Qataq 'am chegoqchigui da qoroxonec na qampa'aguenaxauapi, chegoqchigui da 'are'enaxat da huetaiya' ñaqa'enaq nam qomi' iloquiaxaata'ape.

⁶ Cha'aye saishet da sepe'etega na ichecnec qataq na ỹainec da ỹo'ot da soxonaxan.

⁷ Cha'aye 'am maye 'auo'ot da qoroxonec na qampa'aguenaxauapi, nache 'auo'ot da huo'o da la'aloxo na qomi' nquiỹategalo.

⁸ Qaq ỹoqo'oye nache 'eetai' qome da 'am sho'oxorenaqtac, 'am maye 'Aro'onatac 'Enauacna, qataq nache 'eetai' qome da sho'oxorenaqtac da 'are'enaxat.

⁹ Qalaxaye nagui qomi' sa 'anashenegueta nache 'auo'ot da qara'aloxo. Qataq saishet da 'annaicapegue' na qanalleppi.

¹⁰ Qataq 'auo'ot da qomi' iqoshaxaate' na qampa'aguenaxauapi, nache na qomi' nquiỹategalo qomi' nhuotte', nache ỹache na nqopita na qaralamaxatpi.

¹¹ Nache qomi' 'aỹa'aarec shenaqta'am aca qagueta da qaỹauega ca nalaataqa', qataq qomi' 'aulagaxatoiguilo na ỹotta'a't shiỹaxauapi.

¹² Qataq saqaỹaua'a da 'aumen na 'aralamaxat nhuo' le'ecpi, qataq qaca aca 'araueque da 'aumen namayepi.

¹³ Nache qomi' 'auo'oteque da qomi' qaisheueeta'ape. Na qarhuoreuapi qomi' ỹe'enai'salo qataq qomi' ne'eetapiguilo.

¹⁴ Qataq 'auo'ot da qomi' ỹe'eeta'ape na ỹotta'a't shiỹaxauapi, nache da qomi' ilota'alo qalaq ỹayogot na lqaic da le'enaxanaxac.

¹⁵ Nache 'enauaque naua na'axa'te da huo'o da icoxo, qataq seshettac na ỹashec da ỹa'aloxo,

¹⁶ souaxat da le'enaxanaxac na aỹem ipa'agueetacpi qataq aỹem isheueetac, qataq souaxat da lasauaqtaxanaxac na ñepa'aguenaxauapi maye ipaltaique ca lvi'.

¹⁷ Qaq de'era souaqaigui saishet da souaxat da 'am secouaqa'ai, qataq saishet da salataq da qanaỹamaxataxac da qoneta.

¹⁸ Qataq saishet da 'am sa salaxasoxoguet, qataq saishet da salataq da 'anqa'aicỹaxac.

¹⁹ Qalaq nache 'ena'am qomi' 'auasaxaugalo ye nachoxoraqa', qataq qomi' 'auachetaiguilo na lta'araic napalaxa.

²⁰ Cha'aye taxa da 'am secouaqa'ai 'am maye 'Aro'onatac 'Enauacna, qataq da ỹaqa'a ca atamnaxala' ñatamnaqtacot da saishet da nache 'am.

²¹ Nache 'am, sogote taxa da qomi' 'auanomalo, cha'aye 'am mashe 'auaỹateetac na ỹataqta ỹapoguiñi nhuennataxacpi.

²² Qalaxaye souaxat da qoneta nache qomi' qaỹauecta'alo da qarleuaxa, shenaqta'am aca qagueta da qaỹauecta'a ca nalaataqa'.

²³ ¡Ñaq 'anlouec 'Am Nataxala'! ¿Ta'ainco' ye 'auo'ocheta? Saishet qome da nache 'eetai' da qomi' sa 'anashenegueta.

²⁴ ¿Ta'ainco' da 'anqañoxottapiguiñi qataq 'aucoua'ai da qanque'eenaxac qataq da qancogaxanataguec?

²⁵ Cha'aye mashe ñequi'itaxauec qataq souaqtaiya', mashe ñeqapegaqtapigui' souaqta'aguet na 'alhua.

²⁶ Ñaq 'anachaañi nache 'auanac da qomi' 'autaua'n qataq qomi' 'anca'alaxatrec souaxat da lta'araic 'arsoxoyec.