Salmos 41 - La'aqtaqa Ñim Lo'onatac 'Enauacna 2013

Da natamnaxac ca sano'on

¹ Ỹataqta machiguiñi qome ca lhuennataxat na choxoraq, cha'aye Ñim Nataxala' nca'alaxatec camaye, da ivita da huo'oi naua qauema na'axa'te.

² Ñim Nataxala' mpaxattalec camaye qataq ỹanem da lca'alaxa, qataq machiguiñi naqa'en da netalec ana 'alhua, qataq saishet da ỹaneguet ca maiche 'eetapeguec na mpa'aguenaxauapi.

³ Ñim Nataxala' ỹanem camaye da la'añaxac da sano'on, qataq ỹa'añaqchet da huetalec ca lmala' souaxat da nqui'ic.

⁴ Qaq aỹem shenapec: «'Am Nataxala', ñaq aỹem 'auchoxoren qome, aỹem 'anataren na'aictaxa da huo'o da ỹasouaxashet 'am hueto'ot.»

⁵ Cha'aye na ñepa'aguenaxauapi aỹem ỹasaqtapeguelec da qauem, 'eeta': «¿Chaq laguio' qaq ileu ñimaye, yaqto' qaicoua'ai?»

⁶ Namayepi da anac da aỹem nmeenaxaneua'a qalaq saishet da ỹoqta 'eesa, cha'aye da lhuennataxa huetaigui 'enauac na qauemsat, ỹoqo'oye da tauga na nqa'aic nache ỹa'axattac.

⁷ Na aỹem nquiỹatega qalaq lapona't, nache aỹem detaqtapigui, cha'aye lhuennataxac da aỹem huo'o da ñeque'eenaxac souaxat na maiche ỹasouaxashetpi.

⁸ Nache 'eeta': «De'era lalolaxa maye hueta'ac damaye chegoqo'ot so saqcha'a na'añaxac leguemaxaic, qaq nagui da huetalec ye lmala', nache saishet qome da qaltaq ñisheguem.»

⁹ Qataq ivira'a so ỹataqta ñauochaxaua, som ỹataqta sepe'etega, som iquia'axaua naxa qalaq aỹem dataỹa'aguet.

¹⁰ Qalaxaye 'am Nataxala', aỹem 'auchoxoren qome, aỹem 'aỹa'anem da soosheguem, yaqto' sanem ca 'itchiguiñi nhuaxanaguec.

¹¹ Huaña qome nache saỹaten da ỹoqta aỹem 'auaỹamaxareeta, qom na ñepa'aguenaxauapi saishet da aỹem ntootalec da aỹem loxonec.

¹² Qaq aỹem souaxat da nalochiguiñi da ñachaalataxac nache aỹem 'anlletañi, qataq nache 'eetai' da 'am ñachatto'ot.

¹³ ¡Ỹataqta qaỹo'oxoren qome Ñim Nataxala', maye Natamnaxala' na Israel le'ecpi, nagui qataq nache 'eetai' qome! ¡Aja', nache 'eetec!